ՆԱՏՕ-ի գլխավոր քարտուղարը ողջունել է Երևանի համերաշխությունը Ուկրաինային
Յենս Ստոլտենբերգը Երևանում
«Ուկրաինայում Ռուսաստանի պատերազմը սթափեցնող հիշեցում է, որ չենք կարող խաղաղությունը չգնահատել: Ես ողջունում եմ ձեր համերաշխությունն Ուկրաինայի հետ և բոլոր գործընկերներին կոչ անում իրենցից կախված ամեն ինչ անել, որ Պուտինը չհաղթի ագրեսիայի իր պատերազմում»,- Երևանում հայտարարել է ՆԱՏՕ-ի գլխավոր քարտուղարը:
Յենս Ստոլտենբերգը ռուս-ուկրաինական պատերազմին անդրադարձել է Հայաստանի վարչապետ Նիկոլ Փաշինյանի հետ հանդիպումից հետո մամուլի համար արված հայտարարության ժամանակ: Նրա գնահատմամբ՝ եթե Պուտինը Ուկրաինայում հաջողության հասնի, կա իրական ռիսկ, որ «նրա ագրեսիան այնտեղ կանգ չի առնի, և ավտորիտար այլ սուբյեկտները կոգեշնչվեն դրանից»։ Թե որոնք են դրանք՝ չի մատնանշել։
Նախքան հայտարարություններով հանդես գալը Նիկոլ Փաշինյանն ու Յենս Ստոլտենբերգը առանձնազրույց են ունեցել։ Վարչապետի աշխատակազմի փոխանցմամբ՝ զրուցակիցները քննարկել են Հայաստան-ՆԱՏՕ փոխգործակցությանը վերաբերող հարցեր, մտքեր փոխանակվել տարածաշրջանային գործընթացների, Հայաստան-Ադրբեջան խաղաղության պայմանագրի հետ կապված քննարկումների շուրջ:
Այնուհետև հանդիպումը շարունակվել է ընդլայնված կազմով: Հայաստանի վարչապետը տեղեկացրել է, որ ՆԱՏՕ-ի գլխավոր քարտուղարին է ներկայացրել ՀՀ կառավարության «Խաղաղության խաչմերուկ» նախագիծը, ինչպես նաև «1991թ. Հայաստան-Ադրբեջան սահմանագծից զորքերի հայելային հետքաշման, սպառազինությունների փոխադարձ վերահսկման, չհարձակվելու մասին պայմանագրի ստորագրման առաջարկները, որոնք դրական արձագանք չեն ստացել պաշտոնական Բաքվից մինչև օրս»։ Անդրադարձ է կատարվել նաև ՀՀ ԶՈՒ բարեփոխումների օրակարգին։
Ստոլտենբերգն, իր հերթին, ողջունել է ժողովրդավարական ինստիտուտների ուժեղացմանը, օրենքի գերակայությանն ուղղված Երևանի քայլերը, ինչպես նաև այն, որ ՀՀ-ն Ուկրաինային մարդասիրական օգնություն է հասցնում։
«ՆԱՏՕ-ն աջակցում է Հայաստանի խաղաղ ձգտումներին»
Հայտարարել է ՆԱՏՕ-ի գլխավոր քարտուղարը։ Նշել է նաև, որ կառույցն աջակցում է երկրի ինքնիշխանությանն ու տարածքային ամբողջականությանը։ Ստոլտենբերգի խոսքով՝ Հարավային Կովկասի կայունությունը կարևոր է նաև Եվրոատլանտյան անվտանգության համար, քանի որ «կանգնած ենք ավելի վտանգավոր աշխարհի առջև»․
«Այսօր Հայաստանն ու Ադրբեջանը հնարավորություն ունեն տևական խաղաղության հասնել տարիների հակամարտությունից հետո: Ահա թե ինչու եմ ես երկու երկրներին կոչ անում համաձայնության հասնել, որն ուղի կհարթի հարաբերությունների կարգավորման ու ձեր ժողովուրդների համար տևական խաղաղության համար»։
Խոսելով Հայաստանի հետ գործընկերության մասին՝ Ստոլտենբերգը դրական է գնահատել ՀՀ ներդրումը ՆԱՏՕ-ի առաքելություններին և գործողություններին: Հիշեցրել է՝ մոտ 20 տարի է, ինչ ՀՀ-ն ՆԱՏՕ-ի KFOR խաղաղապահ առաքելության կարևորագույն գործընկերներից է, օգնում է անվտանգ ու ապահով միջավայր երաշխավորել Կոսովոյում բնակվող բոլոր համայնքների համար:
Օգտագործելով առիթը՝ ՆԱՏՕ-ի գլխավոր քարտուղարը Հայաստանի վարչապետ Նիկոլ Փաշինյանին շնորհակալություն է հայտնել Հայաստանի ու տարածաշրջանի համար ավելի պայծառ ապագա կառուցելուն ուղղված աշխատանքի համար:
«Լիահույս եմ, որ կշարունակենք ուժեղացնել գործընկերությունը՝ միասին աշխատելով ավելի մեծ խաղաղության, կայունության և բարեկեցության համար Հարավային Կովկասում և տարածաշրջանից անդին»,- շեշտել է նա։
«Որևէ համագործակցություն չի կարող ուղղված լինել մեր իսկ տարածաշրջանի դեմ»
«Հայաստանը շարունակում է հավատարիմ մնալ տարածաշրջանացման քաղաքականությանը։ Մեր առանձնահատուկ հարաբերությունները Վրաստանի և Իրանի Իսլամական Հանրապետության հետ չափազանց կարևոր են, և մեր որևէ համագործակցություն չի կարող ուղղված լինել մեր իսկ տարածաշրջանի դեմ»,- ընդգծել է Հայաստանի վարչապետը։
Նիկոլ Փաշինյանի խոսքով՝ Ստոլտենբերգի այցը ՀՀ լավ հնարավորություն է ինչպես Հայաստան-ՆԱՏՕ համագործակցության, այնպես էլ տարածաշրջանային և գլոբալ կայունության և անվտանգության խնդիրների վերաբերյալ կարծիքներ փոխանակելու համար։
«Մենք շահագրգռված ենք՝ շարունակելու զարգացնել առկա քաղաքական երկխոսությունը և ընդլայնելու գործընկերությունը դաշինքի, ինչպես նաև առանձին անդամ պետությունների հետ»,- նկատել է Փաշինյանը։
Հույս է հայտնել, որ Հայաստան-ՆԱՏՕ համագործակցության նոր ձևաչափը՝ «Անհատապես հարմարեցված գործընկերության» ծրագիրը շուտով կհաստատվի։ Մանրամասներ, սակայն, չի հաղորդել։ ՀՀ վարչապետի խոսքով՝ Հայաստանի համար չափազանց կարևոր է ուժեղացնել իր դիմակայունությունը և զարգացնել պաշտպանական կարողությունները։
Փաշինյանը ևս կարևորել է Հայաստանի մասնակցությունը խաղաղապահ գործողություններին՝ այն համարելով կարևոր ներդրում միջազգային խաղաղության և անվտանգության ապահովման գործում։
«Ինչպես տեղյակ եք, 2023 թվականի հուլիսին, երբ Կոսովոյում որոշակի անկայուն վիճակ էր, Հայաստանն իր խաղաղապահ ստորաբաժանման անձնակազմն ավելացրեց լրացուցիչ 17 զինծառայողով»,- հիշեցրել է նա։
Հետևեք մեզ — Facebook | Youtube | Telegram
Յենս Ստոլտենբերգը Երևանում
