Հայաստանից և Ադրբեջանից ռազմական փորձագետները կասկածում են կորուստների պաշտոնական թվերին
Ղարաբաղյան հակամարտության կողմերը, ինչպես ցանկացած պատերազմում, նվազեցնում են իրենց կորուստների թիվը և ուռճացնում հակառակորդի զոհերի և վիրավորների թիվը: Բացի այդ, պատերազմն այժմ ակտիվ փուլում է, ուստի կողմերի մարտական կորուստներին հստակ գնահատական տալը սխալ է: Այս մասին խոսում են փորձագետներ Հայաստանից և Ադրբեջանից, որոնց կարծիքը մեջբերում է «Կովկասյան հանգույց» գործակալությունը:
Հակամարտության կողմերը կանխամտածված կերպով աղավաղում են սեփական կորուստների մասին տվյալները՝ փորձելով չկոտրել իրենց բանակի մարտական ոգին և ժողովրդի հայրենասիրական ոգևորությունը, և չափազանցնում են թշնամու կորուստները՝ փորձելով անորոշություն սերմանել նրա բանակում և խաթարել ժողովրդի հավատը դրա նկատմամբ,- կարծում է ռազմական փորձագետ, Ադրբեջանի ՊՆ տեղեկատվական-վերլուծական վարչության նախկին աշխատակից Ազադ Իսազադեն:
•Ո՞վ է մրցակցում Հարավային Կովկասում․ Հայասատնն ու Ադրբեջա՞նը, թե՞ Պուտինն ու Էրդողանը։ Կարծիք
•Կարծիք Ղարաբաղից․ «Սրացման առանձնահատկությունը կարող է կանխորոշել դրա ելքը»
Նրա խոսքով՝ Ադրբեջանն առաջին անգամ տվյալներ չի տրամադրում մարտական կորուստների մասին, մինչդեռ 1992-1994 թվականների ռազմական գործողությունների ընթացքում և 2016-ի ապրիլին ադրբեջանական բանակը հաղորդում էր այդ տեղեկությունները:
«Այս անգամ, ըստ երևույթին, որոշել են չզեկուցել և տեղեկացնել ռազմական գործողությունների ավարտից հետո: Նման դեպքեր եղել են միջազգային պրակտիկայում: Իհարկե կորուստներ կան: Տեղեկություններ կան Բաքվում և շրջաններում սպանվածների հուղարկավորության մասին: Կան վիրավորներ, և վերջերս նախագահ Իլհամ Ալիևը նրանց այցելեց հիվանդանոցում»,- ասել է Իսազադեն «Կովկասյան հանգույց»-ին:
Նա դժվարացավ գնահատել նույնիսկ մոտավոր կորուստները, բայց նշեց, որ յուրաքանչյուր կողմը հստակ տիրապետում է իր կորուստների մասին տեղեկությանը:
Ինչ վերաբերում է թշնամու կորուստներին, ապա դրանց գնահատականները մոտավոր են, հատկապես ժամանակակից պատերազմներում, երբ մարտերը հաճախ ընթանում են հեռակա կարգով:
Նրա կարծիքով, անկախ դիտորդները կարող են մոտավորապես գնահատել նաև կողմերի կորուստները՝ հիմք ընդունելով իրենց տվյալները և որոշ այլ անուղղակի ցուցանիշներ, օրինակ` ոչնչացված մարտական անձնակազմի կամ զրահամեքենաների անձնակազմի քանակը:
«Ռազմական իրավաբաններ» հասարակական կազմակերպության ղեկավար Թելման Աբիլովը նույնպես կարծում է, որ կողմերն ուռճացնում են հակառակորդի կորուստները և նվազեցնում են սեփականը: Մասնավորապես, նշում է նա, հայկական կողմը չափազանց ուռճացնում է Ադրբեջանի կորուստները:
«Նրանք խոսում են ադրբեջանական կողմից գրեթե 1300 սպանվածների մասին, սակայն հավաստի ապացույցներ չեն տրամադրում: Ընդհակառակը, Ադրբեջանի ՊՆ-ն իր կայքում և Telegram ալիքում ամեն օր ցուցադրում է հրամանատարական կետերի, ավտոմեքենաների շարասյուների, զրահամեքենաների, զենքի և այլ իրերի պահեստների ոչնչացման տեսանյութեր: Տեսանյութերում երևում է նաև ուղղակիորեն անձնակազմի ոչնչացում»,- ասել է Աբիլովը:
Պատերազմն այժմ ակտիվ փուլում է, և կողմերի մարտական կորուստներին հստակ գնահատական տալը ճիշտ չէ, կարծում է Razm.info հայկական ռազմական լրատվական գործակալության ռազմական փորձագետ Ռոբերտ Նազարյանը:
Հակամարտության գոտում օտարերկրյա լրագրողների և դիտորդների առկայությունը մասամբ հնարավորություն կտար իրական գնահատական ստանալ կատարվածի վերաբերյալ,- կարծում է նա:
Նրա կարծիքով, Լեռնային Ղարաբաղի պաշտպանության նախարարության տվյալները ադրբեջանական բանակի կորուստների վերաբերյալ իրատեսական են, բայց կարող են լինել աննշան անճշտություններ:
«Կատաղի մարտերի վեցերորդ օրը, հաշվի առնելով, որ հարձակումը սկսել է հենց Ադրբեջանը, բնական է, որ նրա մարտական կորուստները մի քանի անգամ ավելին կլինեն, քան Արցախի Պաշտպանության բանակի կորուստները»,- կարծում է ռազմական փորձագետը:
Նա շինծու անվանեց Լեռնային Ղարաբաղի Պաշտպանության բանակի մի ամբողջ ստորաբաժանման ոչնչացման մասին Ադրբեջանի տեղեկությունները:
