Հանրապետության օրն Ադրբեջանում․ իշխանությունները արգելել են տոնական երթը, չորս մարդ ձեռբակալվել է

Ադրբեջանում նշվել է Առաջին ժողովրդավարական հանրապետության (ԱԺՀ) հռչակման 101-ամյակը։ Այս տարի իշխանություններն արգելել են մայիսի 28-ի ավանդական տոնական երթը դեպի քաղաքի կենտրոնում տեղակայված ԱԺՀ հուշարձանը՝ պատճառաբանելով Եվրոպայի լիգայի եզրափակչի նախապատրաստական աշխատանքներով, որը նախատեսված է մայիսի 29-ին։ Ասել են, որ ոստիկանության համար դժվար կլինի կարգուկանոն պահպանել։ Ընդդիմադիր կուսակցությունները որոշել են ցույց անցկացնել Նովխանիյում՝ Բաքվի մոտակայքում, որտեղ էլ չորս ընդդիմադրի ձեռբակալել են։ 

• Յոթ սակավ հայտնի փաստ ԱԺՀ մասին

• Հայաստանի երեք հանրապետություններ՝ մեկ դարում

• Թե ինչպես Վրաստանը նշեց Անկախության օրը

Ինչպես նշեցին

Ընդդիմադիր «Հանրապետական այլընտրանք» կուսակցությունը (ՌԵԱԼ) այսօր պատրաստվում էր երթ կազմակերպել դեպի հուշարձան։ Սակայն իշխանությունները նրանց խորհուրդ տվեցին նման բան չանել՝ դա պատճաաբանելով նրանով, որ այս օրերին Բաքվում անցկացվում են Չեմպիոնների լիգայի եզրափակչի հետ կապված միջոցառումներ, և ոստիկանության զբաղվածությունը մեծ է լինելու։

Կայանալիք խաղի պատճառով քաղաքում ուժեղացվել է կարգուկանոնի պահպանումը։ Եվ դա, իրավապահների ընկալմամբ, նշանակում է նաև արգելել ցանկացած զանգվածային միջոցառման անցկացումը։

Ընդդիմադիր «Հանրապետական այլընտրանք» կուսակցությունը որոշել էր «մարաթոն» անցկացնել՝ կուսակցության անդամներին առաջարկելով ժամը 12:00-ից մինչև 20:00-ն «անհատական կարգով» ծաղիկներ դնել ԱԺՀ հուշարձանին։ Եվ միաժամանակ խորհուրդ էր տվել իր համախոհներին չհակաճառել ոստիկաններին, որոնք մեծապես կենտրոնացած էին հուշարձանի մոտ։

Մյուս ընդդիմադիր կուսակցությունները գնացել էին տոնը նշելու Բաքվի մերձակայքում գտնվող Նովխանի ավան, որտեղ ծնվել է ԱԺՀ առաջնորդներից մեկը՝ Մամեդ-Էմին Ռասուլզադեն, և հենց այդտեղ է նրան նվիրված միակ հուշարձանը Բաքվում։

«Մուսավաթ» կուսակցության մամուլի ծառայության ղեկավարը  հաղորդել է Թուրան գործակալոիթյանը, որ այս միջոցառման մասնակցելու ճանապարհին կուսակցության չորս անդամների ձեռբակալել են։

Երեկոյան Ափամերձ բուլվարում պլանավորված էր համերգ և հրավառություն։

Անհարգալից վերաբերմունք տոնի՞ն, թե՞ ընդդիմությանը խանգարելու առիթ

Ընդհանուր առմամբ, կայանալիք եզրափակչի առիթով տոնական երթերի արգելքը հասարակությունում բացասաբար ընկալվեց։ Շատերը դա երկրի գլխավոր տոնի հանդեպ անհարգալից վերաբերմունք համարեցին։

«Արտասահմանցիների զվարճանալու իրավունքը չպետք է ավելի բարձր լինի, քան Հանրապետության օրը նշելու ադրբեջանցիների իրավունքը», — Ֆեյսբուքյան իր էջում գրել է ՌԵԱԼ-ի առաջնորդ Իլգար Մամեդովը։

Մամեդովն, ինչպես և մյուսները, կարծում է, որ ֆուտբոլի եզրափակիչը միայն առիթ է, որից օգտվել են իշխանությունները, որպեսզի ընդդիմությանն ու քաղաքացիներին թույլ չտան մեծ շուքով նշել տոնը։

«NİDA» շարժման ակտիվիստ և նախկին քաղբանտարկյալ Գիաս Իբրահիմովն ընդդիմադիր կուսակցություններին քննադատել է այն բանի համար, որ նրանք լսել են իշխանություններին՝ միավորվելու և այնուամենայնիվ Իսթիգլալիաթ փողոցով երթ կազմակերպելու փոխարեն։

Անցյալ տարի, երբ նշվում էր ԱԺՀ 100-ամյակը, ՌԵԱԼ-ի երթ անցկացնելու փորձը ոստիկանության հետ բախման վերածվեց, իսկ կուսակցության առաջնորդներից մեկը կալանավորվեց 30 օրով։