«Ընտրակեղծիքների ապացույցների ոչնչացման վտանգ կա»․ «Հանուն Վրաստանի» կուսակցություն
«Հանուն Վրաստանի» կուսակցության հայտարարությունը
Ընդդիմադիր «Հանուն Վրաստանի» կուսակցության հաղորդմամբ՝ դատարանը չի բավարարել ԿԸՀ սերվերներում և քվեարկության սարքերում տվյալների պահպանման հրատապ անհրաժեշտության վերաբերյալ իր պահանջը։
Կուսակցության պնդմամբ՝ դատախազությունը կեղծ քննության շրջանակներում փորձում է առգրավել վերիֆիկացման սարքերը։ Ահազանգում է՝ հոկտեմբերի 26-ի խորհրդարանական ընտրությունների կեղծման կարևորագույն ապացույցները կարող են ոչնչացվել։
«Հանուն Վրաստանի» կուսակցության հայտարարությունը
«Ինչպես ակնկալվում էր, դատախազությունը ԿԸՀ-ի հետ միասին մասնակցել է ցուցակների և մյուս ապացույցների կեղծման գործընթացին։ Դատարանը չի բավարարել ԿԸՀ սերվերներում և քվեարկության սարքերում տվյալների պահպանման հրատապ անհրաժեշտության վերաբերյալ մեր պահանջը, իսկ դատախազությունը փորձում է կեղծ քննության շրջանակներում առգրավել վերիֆիկացման սարքերը։
Սա նշանակում է, որ կա ընտրակեղծիքների կարևորագույն ապացույցների ոչնչացման հավանականություն։ Սա իմաստազրկում է ցանկացած օբյեկտիվ քննություն և իրական ցուցակների հրապարակում, ինչն իր հերթին հանցագործություն է։
Ինչպես սկզբից ևեթ նշել էինք, վերիֆիկացման սարքերը և դրանցում պարունակվող տեղեկատվությունը կարող են լինել կեղծիքների հիմնական ապացույցները։ Այդ պատճառով դատախազությունը փորձում է կեղծ քննության շրջանակներում վերահսկողություն հաստատել դրանց նկատմամբ, փաստացի պատանդ է վերցնում ինչպես ապացույցները, այնպես էլ ճշմարտությունը պարզելու ողջ գործընթացը։
ԿԸՀ-ն գրեթե 10 օր թաքցնում է տեղեկատվությունը, չի նշում տվյալների պահպանման ժամկետը և դատախազության հետ միասին նպաստում է ապացույցների ոչնչացմանը։
Այդ մասին է վկայում այն, որ՝
- հոկտեմբերի 29-ին մենք պահանջեցինք ցուցակների հրապարակում
- հոկտեմբերի 30-ին դատախազությունը սկսեց կեղծ քննություն՝ ԿԸՀ-ի դիմումի հիման վրա,
- նոյեմբերի 1-ին մենք դիմեցինք դատարան՝ ապացույցների պահպանման պահանջով, նոյեմբերի 1-ին ԿԸՀ նախագահը «Իմեդի» հեռուստաալիքի եթերում ակնարկեց տվյալները դատախազությանը փոխանցելու մասին։
Հենց նոյեմբերի 1-ին դատախազությունը դիմեց ԿԸՀ-ին։ Այսինքն՝ ԿԸՀ-ն և դատախազությունը «Վրացական երազանքի» հետ համակարգված են գործել։
