Նիկոլ Փաշինյանը Facebook-ի իր էջում գրել է, որ իրեն է «համարում ստեղծված վիճակի թիվ 1 պատասխանատուն»: Նա կարծում է, որ այն հաղթահարելու և երկրում կայունություն ու անվտանգություն հաստատելու հիմնական պատասխանատուն նույնպես ինքն է:
Վարչապետը հայտնում է, որ մտադիր չէ հրաժարվել այդ պատասխանատվությունից, այսինքն չի պատրաստվում հրաժարական ներկայացնել։ Փոխարենը նա ներկայացրել է 15 կետից բաղկացած ծրագիր, որը մտադիր է իրականացնել մոտակա վեց ամիսների ընթացքում:
Նիկոլ Փաշինյանը անվանել է այս կետերը «ամենակարևոր անելիքների ճանապարհային քարտեզ», որի նպատակն է Հայաստանի ժողովրդավարական կայունության ապահովումը։ Նա հայտնում է, որ ծրագրի իրագործման համար կառավարության կազմում փոփոխություններ է իրականացնում՝ աշխատանքի արդյունավետությունն ապահովելու համար։
2021 թվականի հունիսին վարչապետը պատրաստվում է հանդես գալ ճանապարհային քարտեզի իրագործման հաշվետվությամբ, որի արդյունքներով, նաև հանրային կարծիքը հաշվի առնելով, պատրաստվում է որոշում կայացնել իր հետագա անելիքների վերաբերյալ:
Նիկոլ Փաշինյանի ներկայացրած ծրագրի կետերն ամբողջությամբ․
1. Ղարաբաղի հարցի բանակցային գործընթացի վերականգնում ԵԱՀԿ ՄԽ համանախագահության ձեւաչափով՝ Արցախի կարգավիճակի եւ իրենց բնակության վայրեր արցախցիների վերադարձի հարցի առաջնահերթության ընդգծմամբ:
2. Ապահովել արցախցիների վերադարձը իրենց հայրենի օջախներ: Ամբողջությամբ վերականգնել Արցախի բնականոն կյանքը: ԼՂ իշխանությունների վերահսկողության տակ գտնվող տարածքների վնասված տների, բնակարանների եւ ենթակառուցվածքների վերականգնում:
3. Զոհված զինծառայողների եւ քաղաքացիների ընտանիքների սոցիալական երաշխիքների ապահովում:
4. Պատերազմական գործողությունների ընթացքում Հայաստանի Հանրապետության տարածքում տուժած բնակելի եւ հանրային կառույցների եւ ենթակառուցվածքների վերականգնում:
5. Հաշմանդամություն ստացած զինծառայողների սոցիալական երաշխիքների, պրոթեզավորման գործընթացի եւ մասնագիտական վերապատրաստման ապահովում:
6. Գերեվարված զինվորականների եւ քաղաքացիական անձանց շուտափույթ վերադարձ: Նրանց ընտանիքների սոցիալական երաշխիքների ապահովում: Անհետ կորածների ճակատագրերի շուտափույթ պարզաբանում: Նրանց ընտանիքների սոցիալական երաշխիքների ապահովում:
7. Պատերազմին մասնակցած անձանց եւ ընդհանուր առմամբ հանրության հոգեբանական ռեաբիլիտացիայի համակարգի ձեւավորում:
8. Զինված ուժերի բարեփոխումների ծրագրի հաստատում եւ բարեփոխումների մեկնարկ:
9. Կորոնավիրուսի համավարակի հաղթահարում եւ դրա հետեւանքների վերացում:
10. Տնտեսական ակտիվության միջավայրի վերականգնում:
11. Ժողովրդագրական խնդիրների լուծման ծրագրերի ակտիվացում:
12. Ընտրական օրենսգրքի փոփոխությունների եւ կուսակցությունների մասին նոր օրենքի ընդունում:
13. Մասնագիտացված դատավորների ինստիտուտի ներդրում՝ որպես հակակոռուպցիոն դատարանի ստեղծման առաջին քայլ: Ապօրինի գույքի բռնագանձման օրենքի կիրարկման մեկնարկ:
14. Հայաստանյան քաղաքական և քաղաքացիական համայնքի ներկայացուցիչների հետ մշտական թեմատիկ կոնսուլտացիաների անցկացում:
15. Սփյուռքի հայկական կառույցների և առանձին անհատների հետ մշտական թեմատիկ կոնսուլտացիաների անցկացում: Հայաստանյան և սփյուռքի առանձին անհատների և կառույցների ներգրավում վերոնշյալ գործընթացների մեջ:
