Հայաստանի ընդդիմությունը կշարունակի բոյկոտը․ ԱԺ նոր նստաշրջանը մեկնարկեց
Հայաստանի ընդդիմությունը կշարունակի բոյկոտը
Հայաստանի խորհրդարանում մեկնարկել է աշնանային նստաշրջանը։ Ընդդիմադիր «Հայաստան» և «Պատիվ ունեմ» խմբակցությունները հայտարարել են, որ շարունակելու են քաղաքական բոյկոտը։ Նրանք նիստին չեն ներկայացել, փոխարենը նույն օրը կազմակերպել են «Հայաստանի իրական օրակարգը» խորագրով քննարկում։
2022 թվականի մայիսի 1-ից խորհրդարանական ընդդիմությունը դուրս էր եկել փողոցային պայքարի՝ փակելով Երևանի կենտրոնական հանգույցներից մեկը՝ Ֆրանսիայի հրապարակը։ Պահանջը վարչապետ Նիկոլ Փաշինյանի հրաժարականն էր։ Բողոքի ակցիաները մեկնարկեցին այն բանից հետո, երբ Փաշինյանը խորհրդարանի ամբիոնից հայտարարեց, որ «միջազգային հանրությունն առաջարկում է մի փոքր իջեցնել Արցախի կարգավիճակի նշաձողը»։
Պայքարի մեկնարկից մեկուկես ամիս անց, երբ պարզ դարձավ, որ շարժումը չի հավաքում բավարար չափով համախոհներ, հրապարակը բացվեց, հանրահավաքներ հազվադեպ էին հրավիրվում։ Ավելի ուշ ընդդիմադիրները հայտարարեցին, թե փոխում են իրենց մարտավարությունը։ Թեև խոսվում էր պայքարի ընդլայնման մասին, սակայն մարզային կառույցների ստեղծման, Արցախում և Սփյուռքում շարժումների ձևավորման մասին այդպես էլ ոչինչ չհաղորդվեց։
Ամռանն ընդդիմությունը դադար էր վերցրել։ Օգոստոսի վերջին հայտարարվեց՝ սեպտեմբերին կրկին փողոց են դուրս գալու, հանրահավաքներն ու բողոքի ցույցերը շարունակվելու են։
Արդեն մի քանի ամիս է, ինչ ընդդիմադիր պատգամավորները չեն մասնակցում Ազգային ժողովի աշխատանքներին։ Իշխող «Քաղաքացիական պայմանագիրն» ակտիվորեն քննարկում էր նրանց մանդատից զրկելու հարցը, սակայն գործընթաց այդպես էլ չսկսեց։ Առաջին աշխատանքային օրը ԱԺ նախագահը հայտարարեց, որ այս հարցով որոշումը կկայացվի նստաշրջանի ավարտին՝ դեկտեմբերին։
Ո՞րն է Հայաստանի իրական օրակարգը․ քննարկում ԱԺ-ից դուրս
Փողոցային պայքարի դուրս եկած ընդդիմությունն ամիսներ շարունակ հայտարարում էր, որ խորհրդարան կվերադառնա միայն «իր օրակարգով»՝ նշելով, որ իշխող թիմի քննարկած նախագծերը որևէ կապ չունեն Հայաստանի առջև ծառացած մարտահրավերների հետ։
Նստաշրջանի աշխատանքի առաջին օրն էլ «Հայաստան» և «Պատիվ ունեմ» խմբակցությունները խորհրդարանից դուրս նախաձեռնել էին «Հայաստանի իրական օրակարգը» խորագրով քննարկում։ Ընդդիմադիր պատգամավոր, «Դիմադրություն» շարժման առաջնորդներից Իշխան Սաղաթելյանը քննարկման ժամանակ հայտարարել է, որ Հայաստանի իրական և առաջնային օրակարգը Հայաստանի և Արցախի անվտանգության ապահովումն է, որը պահանջում է «ազգային պետական ուղեգծի հաստատում»: Նրա խոսքով՝ հենց այս օրակարգը պաշտպանելու համար են իրենք Հայաստանի քաղաքացիներից մանդատ ստացել։
ԱԺ նախագահ Ալեն Սիմոնյանն անլուրջ է համարել խորհրդարանի նիստը բոյկոտելն ու Ազգային ժողովից դուրս քննարկում անելը։
«Մի հատ էլ թող այլընտրանքային պետություն հիմնեն»,- ասել է Սիմոնյանը։
Նրա գնահատմամբ՝ ընդդիմության այդ քայլն Ազգային ժողովի աշխատանքներին վնաս հասցնել չի կարող, քանի որ խորհրդարանն ունի ամենաբարձր լեգիտիմությունը։ Խորհրդարանի խոսնակը կարծիք է հայտնել, որ ներկայիս ընդդիմությունը «ամենացածր լեգիտիմություն ունեցողն» է երկրի պատմության մեջ։
Ընդդիմությանը կհաջողվի՞ հասնել իշխանափոխության
Այս հարցին հստակ պատասխան ընդդիմադիր գործիչները չեն տալիս։ Միայն հույս են հայտնում, թե ավելի շատ մարդիկ փողոց դուրս կգան, քանի որ «օրեցօր իշխանություններից հիասթափությունն ու դժգոհությունները մեծանում են»։ «Ազատության» հետ զրույցում նման կարծիք է հայտնել ԱԺ ընդդիմադիր «Հայաստան» խմբակցության դաշնակցական պատգամավոր Գեղամ Մանուկյանը․
«Մեր ժողովուրդը նոր հարված է ստանում, և այս օրերի զարգացումները դրա վառ վկայությունն են: Այս իշխանությունը ձեռքերն ամբողջովին լվացել է արցախյան խնդրից, թողել է բեռը արցախցիների, Արցախի ղեկավարության վրա, ու կարծես ոչինչ տեղի չի ունեցել, ոչինչ չի պատահել»:
Մինչ իշխանական պատգամավորները քննադատում են նրանց «ամառային արձակուրդի» մեկնելու, հետո պայքարը վերսկսելու համար, ընդդիմադիրները պնդում են՝ պայքարը չեն դադարեցրել, ակտիվ աշխատել են ինչպես մայրաքաղաք Երևանում, այնպես էլ Հայաստանի մարզերում։
Վարչապետին անվստահություն հայտնելու ցանկություն ընդդիմությունը ունի, անհրաժեշտ ձայներ՝ ոչ։
«Այս իշխանության մեկ օր անգամ իշխանության ղեկին մնալը մեր երկրի անվտանգության, արտաքին քաղաքական դերի, տեղի թուլացման, Արցախի հայաթափման վտանգի ավելացման նոր սպառնալիք է»,- շեշտում է ընդդիմադիր պատգամավոր Գեղամ Մանուկյանը:
«Մանդատից զրկելու մասին կխոսենք տարեվերջին»
Ամիսներ առաջ Ազգային ժողովի խոսնակ Ալեն Սիմոնյանը հայտարարում էր, թե «խիստ է տրամադրված» անհարգելի բացակաների հիմքով պատգամավորներին մանդատից զրկելու հարցում։ Աշնանային նստաշրջանի մեկնարկի օրը՝ սեպտեմբերի 12-ին լրագրողների հետ զրույցում նա նշել է, որ հարցն օրակարգ կմտնի, «երբ լրանա թույլատրելի բացակությունների չափը»։
«Դեկտեմբերին, երբ ավարտվի նստաշրջանը, դրա մասին կարող ենք խոսել։ Վստահ եմ, որ իրենք փորձելու են ինչ-որ ձևով խուսափել դրանից՝ կամ բժշկի թուղթ ներկայացնել, կամ ինչ-որ ձևով գալ մասնակցություն ապահովել, իբր, իրենց օրակարգով։ Պարզ չէ՝ դա ինչ է նշանակում։ Իսկ տարվա վերջում, երբ նստաշրջանը կավարտվի, ըստ տվյալների հարցը կմտնի խորհուրդ և որոշում կկայացվի»,- ասել է նա։
ԱԺ խոսնակի գնահատմամբ՝ իշխող թիմը կարող էր պատգամավորներին զրկել մանդատներից՝ հարցն ուղարկելով Սահմանադրական դատարան, սակայն նման քայլի չի գնացել, «կառուցողական» է գտնվել նաև այդ հարցում։
Ինքը՝ Սիմոնյանը անընդունելի է համարում այն, որ պատգամավորները չեն ներկայանում աշխատավայր, սակայն և նրանք, և նրանց օգնականները շարունակում են վարձատրվել։
«Եթե մինչև տարեվերջ իրենք չվերադառնան և կոնկրետ պատգամավորների բացակայությունների չափը անցնի թույլատրելին, վստահ եմ, որ Սահմանադրական դատարանը ճիշտ որոշում կկայացնի, և իրենց կփոխարինեն այն պատգամավորները, որոնք հասկանում են, որ պատգամավորը ԱԺ-ում աշխատելու համար է»,- շեշտել է նա։
Բացակայությունների պատճառաբանությամբ հուլիսին իշխող «Քաղաքացիական պայմանագիր» խմբակցությունը պաշտոնանկ արեց ընդդիմության առաջնորդներից Իշխան Սաղաթելյանին՝ փոխնախագահի, իսկ պատգամավոր Վահե Հակոբյանին՝ տնտեսական հարցերով հանձնաժողովի նախագահի պաշտոններից։ Խորհրդարանի ընդդիմադիր գործիչների մեծ մասը հրաժարվեց զբաղեցրած պաշտոնից՝ պահպանելով միայն պատգամավորական մանդատը։
Հայաստանի ընդդիմությունը կշարունակի բոյկոտը
