Հայաստանը մտադիր է արբանյակների արտադրություն հիմնել
Արբանյակների արտադրություն Հայաստանում
Հայաստանի կառավարությունը մտադիր է երկրում հիմնել արբանյակների արտադրություն: Այս մասին «Ազատության» հետ զրույցում հայտարարել է Բարձր տեխնոլոգիական արդյունաբերության նախարար Ռոբերտ Խաչատրյանը։
Ընդամենը երկու ամիս առաջ պաշտոնական Երևանը հայտնել էր, որ տիեզերք է արձակվել Հայաստանի առաջին արբանյակը: Խաչատրյանն ասում է՝ հավակնոտ նպատակներ են դնում ու ձգտում հասնել դրանց:
Հայաստանում արբանյակների արտադրություն հիմնելու ուղղությամբ աշխատանքներ արդեն իսկ տարվում են: Նախարարը տեղեկացրել է, որ ներկա պահին բանակցում են հիմնական գործընկերոջ՝ իսպանական Satlantis-ի հետ, սակայն բաց են նաև նոր համագործակցությունների համար:
Satlantis-ը հիմնադրվել է ԱՄՆ-ում 2013 թ.-ին, մեկ տարի անց կենտրոնակայանը տեղափոխվել է Իսպանիա։
2022 թ.-ի մայիսի վերջին հայկական պետական «Գեոկոսմոս» փակ բաժնետիրական և իսպանական Satlantis ընկերությունների համագործակցության արդյունքում է տիեզերք արձակվել Հայաստանի առաջին արբանյակը:
«Խոսքը կապի արբանյակի մասին չէ»
Բարձր տեխնոլոգիական արդյունաբերության նախարարի խոսքով՝ այս փուլում նաև երկրի կարողություններն են գնահատում.
«ԽՍՀՄ տարիներին նման կարողություններ Հայաստանում եղել են: Կարելի է ասել՝ դրանք մասամբ պահպանվել են. ունենք թե՛ լավ գաղափարներ, թե՛ կադրեր՝ մասնագետներ, որոնց գիտելիքները կարելի է շատ լավ օգտագործել»,- նշել է Ռոբերտ Խաչատրյանը:
Նախարարի փոխանցմամբ՝ խոսքը կապի արբանյակի մասին չէ.
«Մեր արբանյակը կապի արբանյակ չէ, Երկրի հեռահար զոնդավորման արբանյակ է»։
Ի՞նչ ներդրումներ են արվելու
Նախարար Խաչատրյանը չի հստակեցրել՝ որքան գումար կպահանջվի ծրագրի իրագործման համար: Ասել է միայն, որ «քննարկում են տարբեր մոդելներ, այդ թվում՝ պետություն-մասնավոր սեկտոր համագործակցության տարբերակը»։
Հայաստանի երկրորդ արբանյակը՝ շուտով
ԲՏԱ նախարարը վստահեցրել է ՝ հավակնոտ ծրագրերը շարունակական են լինելու: Փակագծերը բացել, սակայն, չի ցանկացել:
Խաչատրյանի տեղեկացմամբ՝ Հայաստանի երկրորդ արբանյակը տիեզերք կարձակվի մոտ ապագայում.
«Երկրորդը լինելու է նույնպես նկարներ անող արբանյակ։ Ժամկետներ չեմ կարող ասել, 2023 թվականի, 2024 թվականի մոտակայքում կլինի»:
Խոսելով առաջին արբանյակի կառավարման կենտրոնի և ընդունիչ կայանի ստեղծման մասին՝ Խաչատրյանն ասել է, որ սարքավորումների մատակարարումը մեկնարկել է, զուգահեռ իրականացնում են մասնագետների վերապատրաստում:
«Մենք մինչև տարվա վերջ պետք է ունենանք կառավարման և ընդունիչ կայան, աշխատանքներն արդեն ընթանում են»,- «Ազատության» հետ զրույցում նշել է նա:
Մայիսի 26-ի նիստի ընթացքում վարչապետ Նիկոլ Փաշինյանն հայտարարել էր, որ տիեզերք է արձակվել Հայաստանի առաջին արբանյակը, Հայաստանը թևակոխում է «տիեզերական գործունեության դարաշրջան»:
«Արբանյակի կողմից արված լուսանկարները Հայաստանում կօգտագործվեն սահմանների հսկողության, արտակարգ իրավիճակների կանխարգելման և կառավարման, շրջակա միջավայրի պահպանության՝ ներառյալ կլիմայական փոփոխությունների մոնիթորինգի, քաղաքաշինության, ճանապարհաշինության, երկրագիտության և այլ ոլորտներում»,- ընդգծել էր վարչչապետը:
Նա հայտնել էր նաև, որ մինչև 2023 թ.-ի ավարտը ստեղծվելու են արբանյակի կառավարման կենտրոնն ու ընդունիչ կայանը:
Արբանյակների արտադրություն Հայաստանում
