Զրադաշտական սրբավայրն Ադրբեջանում վերածվել է արգելոցի՝ սրճարանով և ամֆիթատրոնով
Կապիտալ վերակառուցումից հետո Բաքվից ոչ հեռու գտնվող «Յանարդաղ» արգելոցն անճանաչելիության աստիճանի փոխվել է։ Դրա այցելության գները նույնպես փոխվել են և աճել։
Յանարդաղը՝ «վառվող լեռը», անմար բնական կրակ է Բաքվից ոչ հեռու գտնվող բլրի լանջին։ Բնական գազը, որը երկրի մակերես է դուրս գալիս, այրվում է թթվածնի հետ շփումից։ Հնում Յանարդաղը զրադաշտների սրբատեղի է եղել։
• Ե՞րբ է ավարտվելու ադրբեջանական նավթը
• Ֆոտոզբոսանք «ոչ զբոսաշրջային Բաքվում»
• Անհետացած երկաթուղի․ ապոկալիպտիկ լուսանկարներ և պատմություն Վրաստանից
Նախկինում Յանարդաղը պարզապես վառվող բլուր էր, որը պահպանվել էր իր նախնական տեսքով։
Յանարդաղը՝ մինչ ենթակառուցվածքների ստեղծումը
Վերակառուցումից հետո դրա դիմացի հրապարակը պատվել է բետոնով, իսկ շուրջը թանգարան է կառուցվել՝ կենցաղի հնագույն առարկաներով, համերգների համար ամֆիթատրոնով, սրճարանով, հուշանվերների կրպակով, երեխաների համար խաղային գոտիով, կայանատեղիով, պատմում է Report-ը։
Եթե նախկինում արտասահմանցի զբոսաշրջիկները կարող էին «վառվող լեռը» տեսնել 1 դոլարով, ապա այժմ պետք է վճարեն 5 դոլարին համարժեք մանաթ։
Ադրբեջանի քաղաքացիների համար գինը նույնն է մնացել՝ 1 դալար։
Դպրոցականները կարող են արգելոց անվճար այցելել (նախկինում դա արժեր $0.10)։
Զբոսաշրջության պետական գործակալության նախագահ Ֆուադ Նագիևի խոսքով «Յանարդաղն» օրական 500-700 արտասահմանցի է այցելում, և այս թիվն աճում է։
Բաքվեցիներին հին «լեռան» նոր տեսքն այնքան էլ դուր չի եղել։ Սոցցանցերի շատ օգտատերեր համարում են այդ ողջ ենթակառուցվածքն անտեղի և անճաշակ։ Ավելին, նրանք մտավախություն ունեն, որ բետոնե ծածկը կարող է խանգարել բնական գործընթացներին, և կրակը կարող է մարել։
«Նման տխմարությունն ունակ է նույնիսկ հավերժ կրակը մարել»;
«Նախկինում ամեն ինչ իսկական էր, աուտենտիկ մթնոլորտ, իսկ հիմա անհասկանալի մի բան է»։
Թեև կան նաև այնպիսիք, ովքեր կարծում են, որ վերակառուցումն օգտակար է եղել արգելոցի համար․
«Շատ ավելի հարմար և գեղեցիկ է հիմա ամեն ինչ դարձել։ Եվ զբոսաշրջիկներն այլևս հիասթափված հոգոց չեն հանի»։
