Եվրամիությունը Վրաստանին կտրամադրի 180 միլիոն եվրո

COVID-19 համաճարակին հակազդելու և վնասները նվազագույնի հասցնելու համար Եվրամիությունը Վրաստանին կտրամադրի ավելի քան 180 միլիոն եվրո: Վրաստանը ֆինանսական օգնություն կստանա նաև միջազգային ֆինանսական հաստատություններից:

Ապրիլի 9-ի դրությամբ Վրաստանում արձանագրվել է կորոնավիրուսով վարակման 214 դեպք: Կարանտինում է 4559 մարդ, ստացիոնար հսկողության տակ՝ 253-ը: 50 հիվանդ ապաքինվել է, 3-ը մահացել:

«Հպարտությամբ ուզում են հայտնել, որ ԵՄ-ն Վրաստանին է հասցեագրում և կարագացնի ավելի քան 180 միլիոն եվրոյի տրամադրումը համաճարակին հակազդելու համար», — հայտարարել է Վրաստանում ԵՄ դեսպան Կարլ Հարցելը:

Դեսպանի խոսքերով՝ դրամաշնորհի տեսքով հատկացվող միջոցները կօգնեն Վրաստանին պատվով հաղթահարել դժվարությունները: Նա հստակեցրեց, որ այդ գումարը լրացում է ԵՄ օգնության փաթեթին, որի մասին զեկուցվել էր անցած շաբաթ, և այդպիսով օգնության չափը կգերազանցի 250 միլիոն եվրոն:

Աջակցություն է սպասվում նաև միջազգային ֆինանսական հաստատություններից: Այսօր ստացված նամակում ասվում է, որ Վրաստանը պանդեմիայի պատճառով հայտնվել է հատուկ ռիսկի խմբում, քանի որ նրա տնտեսությունը խիստ կախված է զբոսաշրջությունից, առևտրից, ինչպես նաև արտերկրից դրամական փոխանցումներից: Նամակում ընդգծվում է, որ Վրաստանին օգնություն ցուցաբերելու ուղղությամբ արագացված աշխատանքներ են տարվում՝ օգնելու նրան հաղթահարել աննախադեպ ճգնաժամը:

Նամակը ստորագրել են Վրաստանում ԱՄՀ մշտական ներկայացուցիչը, Վրաստանում Ֆրանսիայի դեսպանը, Հարավային Կովկասում Եվրոպական ներդրումային բանկի տարածաշրջանային ներկայացուցչության ղեկավարը, Վերակառուցման և զարգացման եվրոպական բանկի տարածաշրջանային տնօրենը և ֆինանսական հաստատությունների այլ ղեկավարներ:

• Ի՞նչ է նշանակում արտակարգ դրությունը, ինչի՞ իրավունք ունեն և չունեն Վրաստանի բնակիչները
• Կորոնավիրուսը Կովկասում: Թարմացվում է

Վրաստանում կորոնավիրուսով վարակման առաջին դեպքը արձանագրվել է 2020 թվականի փետրվարի 26-ին: Մարտի 21-ին Վրաստանում արտակարգ դրություն է հայտարարվել, իսկ մարտի 31-ից սահմանվել է համընդհանուր կարանտին: