Ադրբեջանցի ակտիվիստ Բախտիյար Հաջիևը դատապարտվել է 10 տարվա ազատազրկման
Բախտիյար Հաջիևը 10 տարով դատապարտվեց
Ադրբեջանում ավարտվել է հասարակական ակտիվիստ Բախտիյար Հաջիևի նկատմամբ հարուցված քրեական գործով դատավարությունը։ Մի շարք տնտեսական հանցագործությունների և խուլիգանության մեջ մեղադրվող ակտիվիստը դատապարտվել է երկարատև՝ տասը տարվա ազատազրկման։
- «Ալիևը սպառնում է, քանի որ չի ստացվում մաշեցնել ՀՀ ներուժը»․ կարծիք Երևանից
- «ԱՄՆ-ն տեղեկացված է Իվանիշվիլիի՝ Կրեմլի համար կատարած գործողությունների մասին»․ Ֆրիդ
- Աբխազիայում հուղարկավորել են մասնավոր տներից մեկում հրդեհի զոհ դարձած 5 երեխաների
Հունվարի 13-ին Բաքվի ծանր հանցագործությունների դատարանի նախագահող դատավոր Ալի Մամեդովի նախագահությամբ կայացած նիստում հրապարակվել է դատավճիռը։ Դատարանի որոշմամբ՝ Հաջիևը դատապարտվել է 10 տարվա ազատազրկման։
Դատավճռի համաձայն՝ Բախտիյար Հաջիևի՝ Բաքվի Հ․ Զարդաբի փողոցում գտնվող տունը և բանկային հաշիվներում առկա դրամական միջոցները կառգրավվեն։ Դատարանը նաև որոշել է արգելել նրան ազատազրկումից հետո 1 տարի զբաղվել ուսումնադաստիարակչական աշխատանքով։
Նախորդ նիստում դատախազը պահանջել էր Բախտիյար Հաջիևին դատապարտել 11 տարվա ազատազրկման։
Հաջիևի բնորոշմամբ՝ դատավճիռը քաղաքական դրդապատճառներ ունի։ Նա նշել է, որ իրեն վերագրված բոլոր մեղադրանքները իրավաբանորեն հերքվել են։
«Ինչ վերաբերում է խուլիգանության մեղադրանքներին, դրանք շինծու են, հորինվել են Ուլվիա Ալովլուի բողոքի հիման վրա, ով կատարել է իր՝ իշխանություն ունեցող վերադասների հրամանը»,- ասել է ակտիվիստը։
Հաջիևը մյուս բոլոր տնտեսական մեղադրանքներն անհեթեթ է որակել․
«Դրանք առաջ են քաշվել անանուն էլեկտրոնային նամակի հիման վրա, թե, իբր, նա դրամաշնորհներ է ստանում արևմտյան կազմակերպություններից և պլանավորում է Ադրբեջանում պետական հեղաշրջում իրականացնել»։
Հաջիևը այս մեղադրանքներն անվանել է «բացարձակապես հորինված»։ Ակտիվիստը կարծում է, որ իր ձերբակալման իրական պատճառը Ադրբեջանում մարդու իրավունքները խախտողների դեմ պատժամիջոցների կիրառման ուղղությամբ տարած ակտիվ աշխատանքն է։
Նա ուշադրություն է հրավիրել այն հանգամանքի վրա, որ իրեն ձերբակալել են անմիջապես այն բանից հետո, երբ թիրախային պատժամիջոցներ են կիրառվել Ադրբեջանի ՆԳՆ կազմակերպված հանցավորության դեմ պայքարի գլխավոր վարչության աշխատակցի նկատմամբ։
Հաջիևը աջակցության համար երախտագիտություն է հայտնել իր ընտանիքին, լրագրողներին (հատկապես կալանքի տակ գտնվողներին), ինչպես նաև միջազգային կառույցներին՝ ԱՄՆ պետքարտուղարությանը, Կոնգրեսին, ԵՄ-ին, ԵԽԽՎ-ին, Եվրոպայի խորհրդին, Եվրախորհրդարանին։
Միևնույն ժամանակ նա ընդգծել է իր պաշտպանության գործում իրավապաշտպան Ռուֆաթ Սաֆարովի ունեցած ներդրումը, ով նույնպես վերջերս հայտնվել է ճաղերի հետևում։
«Ռուֆաթ Սաֆարովը մինչև վերջ պաշտպանել է մարդու իրավունքները։ Նա ցույց տվեց, որ գլխավորը ոչ թե պաշտոնն ու արտոնություններն են, այլ խղճի ձայնը լսելով աշխատելն ու մարդու իրավունքների պաշտպանությունը»,- նշել է Հաջիևը։
Բախտիյար Հաջիևը ձերբակալվել էր 2022 թվականի դեկտեմբերին։ Սկզբում նրան մեղադրանք էր առաջադրվել Ադրբեջանի քրեական օրենսգրքի 221.2.2 (խուլիգանություն, որն իրականացվել է հասարակական կարգի պահպանության պարտականություններ կատարող անձի նկատմամբ դիմադրություն ցույց տալու միջոցով) և 289.1 (դատարանի նկատմամբ անհարգալից վերաբերմունք) հոդվածներով։
Հաջիևին մեղադրանք էր առաջադրվել լրագրող Ուլվիա Ալովլուի ներկայացրած բողոքի հիման վրա։ Հաջիևի և Ալովլուի միջև վաղուց կա կոնֆլիկտ՝ նրանք միմյանց զրպարտության մեջ են մեղադրել։ Դատական նիստերից մեկի ժամանակ նրանց միջև լեռվակռիվ է սկսվել, որը վերաճել է ծեծկռտուքի։ Մեղադրանքի համաձայն՝ այդ միջադեպի ժամանակ Հաջիևը բռնություն է կիրառել ինչպես Ալովլուի, այնպես էլ դատական կարգադրիչ Օրխան Աբդուլաևի նկատմամբ։
Ալովլուի հետ կոնֆլիկտը սկսվել է կատուների ձագերի պատճառով։ Այսպես, լրագրողն ու ակտիվիստը վիճաբանել են կողմերից մեկի՝ մյուսին իր կատվի ձագերը տալու ցանկության բացակայության պատճառով։ Կենցաղային վեճը վերածվել է փոխադարձ մեղադրանքների և դատական քննության։
Բախտիյար Հաջիևը մեկ անգամ չէ, որ հայտարարել է՝ իշխանություններն օգտագործել են այդ փաստը՝ «քննադատության համար իրենից վրեժ լուծելու» նպատակով։
2023 թվականի հունիսի 16-ին ակտիվիստին նոր մեղադրանքներ էին առաջադրվել։ Դրանք հիմնականում կապված էին ֆինանսական հարցերի հետ՝ տրամադրված դրամաշնորհների ոչ նպատակային վատնման։ Նրան մեղադրանք էր առաջադրվել Ադրբեջանի քրեական օրենսգրքի 192 (ապօրինի ձեռնարկատիրություն), 193-1 (հանցավոր ճանապարհով ստացված գույքի օրինականացում), 206 (մաքսանենգություն) և 320 (կեղծ փաստաթղթերի օգտագործում) հոդվածներով։
Նույն թվականի նոյեմբերին նրան ևս մեկ մեղադրանք էր առաջադրվել։ Այս անգամ Հաջիևին մեղադրել էին հարկերից խուսափելու մեջ (Ադրբեջանի քրեական օրենսգրքի 213.1 հոդված)։
Բախտիյար Հաջիևը, սակայն, չի ընդունում այս մեղադրանքներից և ոչ մեկը։ Ակտիվիստը ինքն իրեն մեղավոր չի ճանաչում, պնդում է, որ ձերբակալվել է «հրամանով և պատժվել ներքին գործերի նախարար Վիլայաթ Էյվազովի հասցեին հնչեցրած քննադատության համար»։ ՆԳՆ-ն հայտարարել է, որ այդ մեղադրանքներն անհիմն են։
42-ամյա Բախտիյար Հաջիևը մագիստրոսի որակավորում է ստացել ԱՄՆ Հարվարդի համալսարանում։ Նա հայտնի է որպես Ադրբեջանի իշխանությունների քաղաքականության քննադատ։
Հաջիևը բազմիցս ձերբակալվել է և ենթարկվել բռնաճնշումների։ 2011 թվականին նրան ձերբակալել են զինվորական ծառայությունից խուսափելու մեղադրանքով։ Մեկ տարի անց նա պայմանական ազատ է արձակվել։
2022 թվականի օգոստոսին Բախտիյար Հաջիևը նախագահի վարչակազմում թողել է հայտարարության տեքստ՝ իր իրավունքների խախտման պատճառով Ադրբեջանի քաղաքացիությունից հրաժարվելու մասին։ Հայտարարությունը չի էլ քննարկվել։
Հետևեք մեզ — Facebook | Youtube | Telegram
Բախտիյար Հաջիևը 10 տարով դատապարտվեց
