Փետրվարի 6-ին Վրաստանի ռեստորանները կբացվեն՝ որպես բողոքի նշան
Վրաստանի ռեստորանները, որոնք մինչ օրս փակ են կորոնավիրուսի համավարակի հետ կապված սահմանափակումների պատճառով, որպես արգելքների երկարաձգման դեմ բողոքի նշան՝ ինքնակամ կբացվեն շաբաթ օրը՝ փետրվարի 6-ին։
Այս տեղեկությունը հաստատել է Ռեստորանների ասոցիացիայի ղեկավար Շոթա Բուրջանաձեն։
Նրա խոսքով՝ փետրվարի 6-ին կբացվի մինչև 200 ռեստորան, սակայն, ըստ ամենայնի, դրանց թիվը կավելանա։
Այս որոշման մասին Ֆեսյբուքում գրել է Գաստրոնոմիական ասոցիացիայի ղեկավար Լևան Կոկիաշվիլին։
«Ցավոք, հյուրընկալության ոլորտի սպասումները չարդարացան։ Խելամիտ լուծում գտնելու փոխարեն՝ կառավարության ներկայացուցիչների հետ հանդիպումը հետաձգվեց։ Քանի որ, չնայած բոլոր ջանքերին, այլ ելք չենք տեսնում, որոշել ենք ռեստորանները բացել շաբաթ օրը՝ փետրվարի 6-ին։
Մենք ամբողջությամբ գիտակցում ենք մեր որոշման բոլոր կողմերը, ու այն դժվարությամբ ենք կայացրել», — գրել է Կոկիաշվիլին։
Վրաստանում ռեստորանները փակ են նոյեմբերի 28-ից ի վեր՝ խիստ սահմանափակումների պատճառով, որոնք կիրառվել են երկրում կորոնավիրուսի համավարակի առնչությամբ։
Փետրվարի 1-ից կառավարությունը որոշել է չեղարկել որոշ սահմանափակումներ, սակայն դրանք չեն վերաբերում սրճարանների և ռեստորանների բացմանը։
Մեկ անգամ ռեստորանների տերերն արդեն բողոքել են․ նրանք մեկ օրով հրաժարվել էին հաճախորդներին սնունդ առաքել և պետությունից պահանջել էին թույլ տալ լիարժեք բացվել։
Տարբեր սահմանափակումների չեղարկման պահանջով կառավարության վարչակազմի շենքի դիմաց ակցիաներ են անցկացվում արդեն երկու շաբաթ։
