Վրացի և հայ դպրոցականները հատուկ չվերթով ԱՄՆ–ից Թբիլիսի կժամանեն

Վրաստանի և ԱՄՆ կառավարությունները համատեղ որոշում են կայացրել ԱՄՆ–ում կրթական ծրագրի շրջանակում գտնվող 79 վրացի դպրոցականների հայրենիք վերադառնալու ուղիների մասին, հաղորդել է Վրաստանի վարչապետ Գիորգի Գախարիան։

Գախարիան շնորհակալություն է հայտնել ամերիկյան կողմին համագործակցության համար։ Գախարիայի խոսքով՝ այդ նույն հատուկ չվերթից կօգտվի 35 հայ դպրոցական՝ տուն վերադառնալու համար։

ԱՄՆ–ից Թբիլիսի ավիաչվերթը՝ Դոհայում միջանկյալ վայրէջքով, կիրականացվի ապրիլի 10-ին։

ԱՄՆ–ից Դոհայով Վրաստան հատուկ չվերթով կժամանեն 79 վրացի և 35 հայ դպրոցական։ Երեխաներին վերադարձնում են նրանց ծնողների խնդրանքով։ ԱՄՆ–ում, ինչպես աշխարհի շատ երկրներում, դպրոցները ժամանակավորապես փակ են պանդեմիայի պատճառով։

Ըստ ապրիլի 9–ի առավոտյան 10.00–ի տվյալների՝ Վրաստանում գրանցվել է կորոնավիրուսով վարակման 214 դեպք։ Կարանտինի մեջ է 4559 մարդ, ստացիոնար վերահսկողության տակ՝ 353 մարդ։ 50 հիվանդ ապաքինվել է, երեքը՝ մահացել։

Մինչև Դոհա թռիչքի ծախսերն իր վրա է վերցրել ԱՄՆ կառավարությունն, իսկ Դոհայից մինչև Թբիլիսի՝ Վրաստանի կառավարությունը։

Վրաստանի վարչապետ Գիորգի Գախարիան շնորհակալություն է հայտնել ԱՄՆ կառավարությանը և հաղորդել, որ հայ գործընկերների խնդրանքով նույն չվերթով Դոհա, այնուհետև՝ Թբիլիսի կժամանեն նաև հայ երեխաները։

Վրաստանում կորոնավիրուսով վարակման առաջին դեպքը գրանցվել է 2020թ–ի փետրվարի 26–ին։ Մարտի 21–ին Վրաստանում արտակարգ դրություն է հայտարարվել, իսկ մարտի 31–ից՝ համընդհանուր կարանտին։