«Գյումրին՝ հակահեղափոխության պլացդարմ»․ ընդդիմության թեկնածուն քաղաքապետ ընտրվեց
Վարդան Ղուկասյանն ընտրվեց Գյումրու քաղաքապետ
Հայաստանի մեծությամբ երկրորդ քաղաքում՝ Գյումրիում այսօր կայացել է ավագանու առաջին նիստը։ Դրա ընթացքում ներկա 18 ավագանու անդամների դռնբաց քվեարկությամբ քաղաքապետ է ընտրվել Հայաստանի կոմունիստական կուսակցության թեկնածու Վարդան Ղուկասյանը։ Իշխող «Քաղաքացիական պայմանագիր» կուսակցության ներկայացուցիչները չեն մասնակցել նիստին, հայտարարել են արտահերթ ընտրությունների անհրաժեշտության մասին։
Ղուկասյանը երդմնակալությամբ պաշտոնը կստանձնի ապրիլի 19-ին։ Նախկինում նա 13 տարի ղեկավարել է քաղաքը։ Նրա անունը շատերը կապում են ՀՀ երկրորդ նախագահ Ռոբերտ Քոչարյանի հետ։ Ինքը՝ Ղուկասյանը, այսօր հայտարարել ՝ «քաղաքական հենարան չունի», եթե ունի էլ, այդ հենարանը ժողովուրդն է։
Քաղաքագետ Ռուբեն Մեհրաբյանը JAMnews-ի հետ զրույցում հիշեցրել է՝ ժամանակին նույնաբովանդակ հայտարարություններ էր անում նաև Ռոբերտ Քոչարյանը։ Կարծում է՝ գործ ունենք նույն խոսույթի և ծխածածկույթի հետ։ Քոչարյանին ու Ղուկասյանին համարում է «քաղաքական խաբեբայության նույն դպրոցի շրջանավարտներ»։
Ըստ Մեհրաբյանի՝ այսօր Գյումրիում իշխանության եկած ուժերը քաղաքի կառավարման գործում ներգրավված են եղել «կրիմինալ դիկտատուրայի տարիներին» և «սևը բերել են քաղաքի գլխին»։ Կարծում է՝ այս անգամ ևս նրանց համայնքապետարան բերողը քաղաքի խնդիրների լուծման նպատակը չէ։
«Այդ մարդիկ պարզապես եկել են վրեժխնդրության, ռևանշի, հակահեղափոխության տրամադրություններով։ Իսկ Գյումրին օգտագործելու են որպես դրա համար պլացդարմ»,- ընդգծել է նա։
Գյումրիում արտահերթ ընտրություններ էին կայացել մարտի 30-ին։ Ընտրությունների արդյունքներով ոչ մի ուժ 50+1% ձայն չէր հավաքել։ Ամենաշատ ձայները ստացել էր ՔՊ-ն։ Սակայն ոչ ոք կոալիցիա չկազմեց իշխող ուժի հետ։ Անցողիկ շեմը հաղթահարած 4 ընդդիմադիր ուժերից 3-ը՝ «Իմ քաղաքը» դաշինքը, «Իմ հզոր համայնք» կուսակցությունը և «Մայր Հայաստան» դաշինքը աջակցեցին Հայաստանի կոմունիստական կուսակցության թեկնածու Վարդան Ղուկասյանին։
Ավագանու առաջին նիստի մանրամասները, փորձագիտական կարծիք
- «Ցուցադրական պատիժ»․ Հայաստանի իշխող կուսակցությունից պատգամավոր է հեռացվել
- «ՀՀ-ում կարող են արտահայտել իրենց տեսակետը՝ առանց վախենալու». ԱՄՆ ՄԶԳ
- Փաշինյանի հրաժարականի պահանջը հասավ Հանրային հեռուստատեսության եթեր
«Նոր ընտրություններ են պետք»․ իշխող ուժ
«Քաղաքացիական պայմանագիր»-ը մինչ օրս հայտարարում էր, թե պատրաստվում է ավագանու նիստում առաջադրել Սարիկ Մինասյանի թեկնածությունը։ Այսօր, սակայն, ՔՊ-ն բոյկոտեց նիստը։ Մինասյանը ֆեյսբուքյան գրառմամբ տեղեկացրեց՝ ավագանու առաջին նիստին չեն մասնակցելու:
Իշխող ուժի թեկնածուի դիտարկմամբ՝ ստեղծված իրավիճակում Գյումրու կառավարումը դատապարտված է ձախողման, ճգնաժամն անխուսափելի է․
«Գյումրին չպետք է դառնա մշուշոտ ապագայով քաղաք։ Սա չի բխում գյումրեցու շահից:Հանուն Գյումրու և գյումրեցու պետք է գնալ նոր, արտահերթ ընտրությունների»:
«Փաշինյանին ու նրա քաղաքական հայացքներին դեմ եմ»․ Ղուկասյան
Արձագանքելով Ռոբերտ Քոչարյանի հետ կապ ունենալու մասին հարցին՝ Ղուկասյանը հայտարարել է․
«Այս պահի դրությամբ ոչ մեկի հետ քաղաքական առումով ճանապարհ չեմ գնում։ Հետագայում միգուցե կլինի։ Երբեք մի ասա երբեք»։
Գյումրու քաղաքապետը հերթական անգամ նկատել է՝ վարչապետ Նիկոլ Փաշինյանին և նրա քաղաքական հայացքներին ու իրականացրած քայլերին դեմ է։ Բայց աշխատանքի մեջ պատրաստ է «պահել սուբորդինացիան»։
Խոսելով արտահերթ ընտրությունների մասին՝ նշել է՝ թող լինի այնպես, ինչպես Աստված կկամենա․
«Փողով, ռեպրեսիաներով, մարդկանց դրսից բերելով ընտրություն չլինի։ Իսկական՝ մաքուր, թափանցիկ, նորմալ ընտրություն կազմակերպեն»։
Գյումրու նորընտիր քաղաքապետը կողմ է ՀՀ-ի՝ միութենական պետությանը միանալուն
Լրագրողները Վարդան Ղուկասյանից հետաքրքրվել են՝ արդյո՞ք կողմ կլինի, եթե Հայաստանը որոշի դառնալ միութենական պետության մաս։
«Կողմ եմ միութենական պետությանը Բելառուսի սկզբունքով»,- արձագանքել է նա։
Ասում է՝ պայման պետք է լինի ՀՀ անկախության պահպանումը, խոսքը ուրիշի ոտքերի տակ ընկնելու մասին չէ։
Գյումրու քաղաքապետի կարծիքով՝ պետք է այնպիսի երկիր, որի վրա Հայաստանը կկարողանա հենվել։ Ինքը՝ Ղուկասյանը, Ռուսաստանի Դաշնությունը նկատի ունի։
«ՌԴ-ից գալու են գործարարներ, հիվանդանոցի խնդիր պետք է լուծենք, համատեղ գործարանների, ձեռնարկությունների խնդիր պետք է լուծենք։ Կտեսնեք, որ այդ ամենը կլինի»,- իր ծրագրերի մասին խոսելիս նկատել է նա։
Ըստ Ղուկասյանի՝ եվրոպամետ կուսակցություններն էլ կարող են նույն սկզբունքը որդեգրել Եվրոպայի հետ աշխատանքում, որպեսզի «շահեն Գյումրի քաղաքն ու Հայաստանը»։
Փորձագիտական կարծիք
Քաղաքագետ Ռուբեն Մեհրաբյանի խոսքով՝ որևէ նոր, անսպասելի բան տեղի չի ունեցել։ Ըստ նրա՝ Ղուկասյանի քաղաքապետ ընտրվելը կանխատեսելի սցենար էր։ Նրան ավելի վաղ իրենց աջակցության մասին բաց տեքստով հայտարարել էին անցողիկ շեմը հաղթահարած ընդդիմադիր ուժերը։
«Սա հետևանք էր նրա, որ իշխող «Քաղաքացիական պայմանագիրն» իր բարեփոխումներն արել է կիսատ։ Քայլերն արել է կիսատ՝ մարդկանց մոտ բարեփոխումների և ժողովրդավարության նկատմամբ հավատը սասանելով։ Գյումրիի ընտրությունների արդյունքները ահազանգ էին։ Եվ դեռ ժամանակ կա հետևություններ անելու»,- նկատել է նա։
Քաղաքագետի գնահատմամբ՝ իշխող ուժը Գյումրիում կդիրքավորվի որպես արմատական ընդդիմություն։
Մեհրաբյանը նման կերպ է մեկնաբանում Սարիկ Մինասյանի հայտարարությունն այն մասին, որ քաղաքի կառավարումը դատապարտված է ձախողման։ Կարծում է՝ լինելու է կոշտ դիմակայություն։
Չի բացառում որ կառավարությունը գնա համայնքի ղեկավարի լիազորությունների վաղաժամկետ դադարեցման ճանապարհով․
«Մեր իրավապահ մարմինների և դատական, քննչական մարմինների բարեփոխումների խայտառակ ձախողման պատճառով այդ ամենը մինչև վերջ տեղ չի հասնում։ Կարծում եմ՝ առաջիկայում այդ ուղղությամբ կունենանք նորություն։ Չեմ պատկերացնում այլ տարբերակ։ Եթե լինի այլ տարբերակ, դա նշանակում է՝ մենք պետությունն ենք ձախողում։ Դա ուղղակի անթույլատրելի է»։
«Տեղական ինքնակառավարման մասին» ՀՀ օրենքի համաձայն՝ գործադիրը կարող է վաղաժամկետ դադարեցնել համայնքի ղեկավարի լիազորությունները մի շարք դեպքերում։ Այդ թվում՝ դատարանի` օրինական ուժի մեջ մտած վճռով ազատազրկման դատապարտվելու և պատիժ կրելու պարագայում։
Վարդան Ղուկասյանն արդեն իսկ քրեական գործով է անցնում։ Վարույթը վերաբերում է հավաքին մասնակցելուն հարկադրելուն և հավաքին մասնակցելու կամ չմասնակցելու նպատակով նյութական շահագրգռմանը։ Հետաքննությունն իրականացնում է Քննչական կոմիտեն։
Իշխող ուժի ներկայացուցիչ, ԱԺ նախագահ Ալեն Սիմոնյանը պարբերաբար հայտարարում է՝ Ղուկասյանի տեղը բանտում է։ Գյումրու նորընտիր քաղաքապետն այսօր ասել է, թե քրեական գործերով անցնելու պայմաններում քաղաքապետի պարտավորություն ստանձնելը ցույց է տալիս, որ սիրում է հայրենիքն ու ճշմարտության ջատագով է։ Խոսելով իրեն պատասխանատվության ենթարկելու հնարավորության մասին՝ նկատել է՝ «ամեն ինչ կարող են անել»։
Ռուբեն Մեհրաբյանի խոսքով՝ ներկա պահին Գյումրին արդեն իսկ կորցրել է քաղաքի խնդիրներով զբաղվող իշխանություն ունենալու հնարավորությունը։
Ասում է՝ որոշ ժամանակ դա կշարունակվի։ Թե որքան՝ պարզ չէ։ Պետությունն, ըստ նրա, պետք է դրսևորի իր ունեցած կարողությունները․
«Պետք է իրականացնել բարեփոխումներ և իրերը կոչել իրենց անուններով։ Այսինքն՝ մարտահրավերը պետք է ընդունել պատշաճորեն և հաղթահարել այն»։
Իսկ մարտահրավերն, ըստ նրա, հետևյալն է՝ իշխանության եկած ուժերը Գյումրին դիտարկում են որպես պլացդարմ, որը պատրաստվում են օգտագործել «իշխանափոխության, հակահեղափոխություն իրականացնելու, քրեական, կոռումպացված ռեժիմը ՀՀ-ում վերականգնելու համար»։
Հետևեք մեզ — Facebook | Youtube | Telegram
Վարդան Ղուկասյանն ընտրվեց Գյումրու քաղաքապետ
