«Պետք է Բաքվի հետ բանակցել ԼՂ-ի ինքնավարության շուրջ»․ Սամվել Բաբայան
Սամվել Բաբայանի առաջարկը Բաքվին
Արցախի Անվտանգության խորհրդի նախկին քարտուղար Սամվել Բաբայանը տեսնում է արցախցիների՝ Լեռնային Ղարաբաղ վերադառնալու հնարավորություն։ Ասում է՝ դրա համար պետք է ընդունել Ադրբեջանի տարածքային ամբողջականությունը, ստանալ անձնագիր և քննարկել այդ երկրի կազմում «ավտոնոմ պետություն» դառնալու հարցը։
Կարծում է՝ Արցախի իշխանությունները, քաղաքական ուժերը, որոնք կապ ունեն Ադրբեջանի հետ, պետք է ներկայացնեն հետևյալ առաջարկը՝ բանակցային լուծումներ գտնել «ավտոնոմ» պետության շրջանակում։
«Եթե համաձայնեն, Հայաստանի իշխանությանն էլ տեղյակ կպահվի, և կշարունակվեն արդեն ռեալ բանակցությունները»,- «Ազատություն» ռադիոկայանին տված հարցազրույցում հայտարարել է նա։
Բաբայանի փոխանցմամբ՝ այս պահին էլ կա «թեթև, ոչ խորացված» գործընթաց ադրբեջանական կողմի հետ։ Չի հստակեցրել՝ անձա՞մբ է ներգրավված այդ գործընթացում, թե՞ Արցախի իշխանություններն են դրանց մասնակցում։
Ադրբեջանը պատրա՞ստ է Արցախին ինքնավարություն շնորհել
Բաբայանը չի համաձայնել լրագրողի այն պնդմանը, թե «Բաքուն չի խոսում ավտոնոմ կարգավիճակ տալու մասին»։ Վկայակոչել է Ադրբեջանի նախագահ Իլհամ Ալիևի ելույթն այն մասին, որ ԼՂ-ի հայերը պետք է իրենց գտնեն երկրի Սահմանադրության շրջանակում։
«Իրենց Սահմանադրության շրջանակում կա երկու կետ՝ մեկը՝ փոքրամասնության իրավունքները, երկրորդը՝ ավտոնոմ ռեսպուբլիկան, որի օրինակը Նախիջևանն է: Ասում ենք՝ մենք մեզ գտել ենք ավտոնոմ ռեսպուբլիկայի շրջանակում»։
Պնդում է՝ հայկական կողմը պետք է բանակցային լուծումներ գտնելու այս առաջարկն անի ինչպես Բաքվին, այնպես էլ միջազգային հանրությանը, որպեսզի «որևէ ռևանշի հարց չլինի»։
«Առաջարկները տվել ենք, կտեսնենք՝ ինչ կասեն»
Տեղեկացրել է Արցախի Անվտանգության խորհրդի նախկին քարտուղարը։
«Առայժմ, քանի որ Ադրբեջանում ընտրություններ են, ավարտվեն` նոր կխոսենք դրա մասին, չխորանանք»,- նկատել է նա։
Բաբայանը հույս է հայտնել, որ Ադրբեջանում կայանալիք ընտրություններից հետո տեղի կունենա որոշակի տեղաշարժ, կլինեն շփումներ պաշտոնական Բաքվի և Արցախի քաղաքական ուժերի միջև:
Չի մատնանշել՝ արցախյան կողմից ով է նախաձեռնելու այդ շփումները։ Նշել է միայն, որ դա կորոշվի Արցախի քաղաքական ուժերի և ղեկավարության հետ քննարկումներից հետո։ Բաբայանի խոսքով՝ ինքը մշտապես կապի մեջ է Արցախի նախագահ Սամվել Շահրամանյանի հետ, երեկ էլ քննարկել են տարբեր հարցեր։
«Եթե ԼՂ-ի հարցը չլուծենք, ռևանշ լինելու է»
Սամվել Բաբայանը համաձայն չէ այն դիրքորոշման հետ, թե Արցախի հայաթափումից հետո ԼՂ-ի խնդիր չկա, թեման փակ է։ Վստահեցնում է՝ ինքը փորձում է ամեն ինչ անել, որպեսզի հնարավոր լինի արցախցիների վերադարձի հարցը լուծել քաղաքակիրթ ձևով՝ բանակցությունների միջոցով։
Նրա դիտարկմամբ՝ կարևոր է հասկանալ՝ Բաքուն կընդունի՞ «ավտոնոմ պետության» առաջարկը, թե՞ պատրաստ է նրան, որ երկու երկրների միջև թշնամանքը շարունակվի, իսկ «տարածաշրջանով շահագրգռված ուժերն էլ նրանց ռևանշի տանեն»։
«Ուզում ես պայմանագրի [ՀՀ և Ադրբեջանի միջև կնքվելիք խաղաղության համաձայնագիր] մեջ գրենք, ուզում ես պատին գրենք, ռևանշ լինելու է, եթե Ղարաբաղի հարցը չենք լուծում»,- շեշտել է նա։
Վստահ է՝ խաղաղություն լինում է ոչ թե որևէ փաստաթղթով, այլ այն դեպքում, երբ ժողովուրդներն իրար հասկանում են։
Արցախի լուծարման հրամանագիրն «ուժի մեջ չէ»
Անվտանգության խորհրդի նախկին քարտուղարի խոսքով՝ Արցախի լուծարման մասին նախագահի հրամանագիրն ուժի մեջ չէ, քանի որ չի հրապարակվել։
«Դուք տեսե՞լ եք այդ ստորագրած հրամանագիրը: Արցախի Սահմանադրությունն ասում է՝ նախագահի հրամանագիրը գործում է հրապարակման պահից։ Հրապարակում չի եղել, վերջ, այսինքն՝ մենք քննարկում ենք մի բան, որը ոչ ոք չի տեսել, չկա»,- պարզաբանել է նա։
Բաբայանը կարծում է՝ այդ քննարկումները հայկական կողմին ոչինչ չեն տալիս։
Խորհուրդ է տալիս չմտնել այդ դաշտ՝ «հանուն Հայաստանի Հանրապետության և հանուն խաղաղության»։
«Առիթ չդառնանք, որ հետո ասեն՝ մեղավորը ղարաբաղցիք էին, որ խաղաղության պայմանագիրը չստացվեց: Հայտարարում են, չէ՞, որ առանց Ղարաբաղի պատրաստ են պայմանագիր ստորագրել, թող ստորագրեն։ Եթե դա Հայաստանին խաղաղություն է բերելու, գնացեք ստորագրեք»,- ընդգծել է նա։
Հետևեք մեզ — Facebook | Youtube
Սամվել Բաբայանի առաջարկը Բաքվին
