Պատգամավոր Նադեժդա Սավչենկոյին ձերբակալել են Ուկրաինայի Գերագույն Ռադայում պետական հեղաշրջման փորձի համար
Ուկրաինացի պատգամավոր Նադեժդա Սավչենկոյին ձերբակալել են Ուկրաինայի Գերագույն Ռադայում:
Ինչպես հաղորդում է Հրոմադսկոյեն, ձերբակալելուց առաջ դատախազը կարդացել է, թե ինչի համար է նա կասկածվում, որից հետո նրան կալանքի տակ են առել: Սավչենկոն քննիչներին առաջարկել է իրեն ոտքով ուղեկցել Անվտանգության ծառայության շենք: Նա լքել է ռադայի շենքը Ուկրաինայի Անվտանգության խորհրդի աշխատակիցների ուղեկցությամբ, փողոցում նրան դիմավորել էին կողմնակիցները՝ վանկարկելով «Նադեժդա դու մեր հույսն ես» կարգախոսը:
Մինչ այդ, մարտի 22-ին Ուկրաինայի Գերագույն Ռադան չեղարկել էր Սավչենկոյի պատգամավորական անձեռնմխելիությունը և նրան կալանավորելու թույլտվություն տվել:
Մինչ այդ Ուկրաինայի գլխավոր դատախազ Յուրի Լուցենկոն նիստերի դահլիճում մի ֆիլմ է ցուցադրել, որն իբր ապացույցներ էր պարունակում, թե ինչպես էր Սավչենկոն զենք դուրս բերում Արևելյան Ուկրաինայի օկուպացված տարածքներից Կիևում ահաբեկչություն իրականացնելու համար:
Տեսանյութում Սավչենկոն խոսում է կառավարական թաղամասի և Գերագույն Ռադայի վրա հարձակման պլանավորման մասին և որ դավադրության գլխավոր թիրախներն Ազգային անվտանգության և պաշտպանության խորհրդի քարտուղար Ալեքսանդր Տուրչինովը, նախագահ Պյոտր Պորոշենկոն և ներքին գործերի նախարար Արսեն Ավակովն են:
Կանոնակարգային կոմիտեին գլխավոր դատախազի մեղադրանքներից հետո Սավչենկոն հայտարարեց, որ միտումնավոր է թույլ տվել իրեն մերկացնել, հեղաշրջում չէր պլանավորում և ընդամենը «ցանկանում էր վախեցնել իշխանություններին»:
Ուկրաինայի զինված ուժերի սպա Նադեժդա Սավչենկոն գերի էր ընկել ռուսամետ զինված կազմավորումներին Ուկրաինայի Արևելքում 2014թ-ի ամռանը տեղի ունեցած մարտական գործողությունների ժամանակ: Որոշ ժամանակ անց նա հայտնվել էր Ռուսաստանի տարածքում, որտեղ կալանավորվել էր. նրան մեղադրում էին երկու ռուս լրագրողների սպանության հանցակից լինելու համար, որոնք զոհվել էին Լուգանսկի մերձակայքում ականանետային հրաձգության արդյունքում: Ինչպես պատմել էր Սավչենկոն, իրենց բռնի կերպով էին Ռուսաստան տեղափոխել: Սպանություններին մասնակցությունը նա հերքում էր: Ուկրաինան, միջազգային կազմակերպություններն ու արևմտյան երկրների կառավարությունները Ռուսաստանում Սավչենկոյի կալանքն ապօրինի էին համարում և Մոսկվայից պահանջում էին անհապաղ ազատ արձակել նրան: Սավչենկոն մի քանի անգամ հացադուլ էր հայտարարել: Սակայն 2016թ-ի մարտի 22-ին Դոնի Ռոստովի դատարանը նրան դատապարտել էր 22 տարվա ազատազրկման: Սակայն մայիսի 26-ին Նադեժդա Սավչենկոյին ներում էր շնորհվել ՌԴ նախագահ Վլադիմիր Պուտինի կողմից: Փոխարենն Ուկրաինան ազատ էր արձակել երկու ռուս զինծառայողների, որոնք դատապարտվել էին Ուկրաինայի դեմ պատերազմին մասնակցելու համար: 2014թ-ի սեպտեմբերին, գտնվելով ռուսական բանտում, Սավչենկոն Ուկրաինայի ժողովրդական պատգամավոր էր ընտրվել «Բատկիվշչինա» կուսակցությունից: Պորոշենկոյի 2015թ-ի մարտի հրամանով՝ Նադեժդա Սավչենկոյին Ուկրաինայի հերոսի կոչում էր շնորհվել:
[/notification]
