Ուկրաինան կորոնավիրուսի պատճառով փակում է սահմանը բոլոր արտասահմանցիների համար
Ուկրաինան երկու շաբաթով փակում է սահմանն արտասահմանյան քաղաքացիների համար՝ կորոնավիրուսի տարածումը սահմանափակելու համար։ Ինչպես հաղորդում է Հրոմադսկոյե հեռուստաալիքը, որոշումն ուժի մեջ կմտնի 48 ժամ անց՝ մարտի 16–ին։
Որոշման մասին հատուկ ճեպազրույցի ժամանակ հաղորդել է Ուկրաինայի Ազգային անվտանգության խորհրդի քարտուղար Ալեքսեյ Դանիլովը։
Արտգործնախարարությունը կզգուշացնի բոլոր կառույցներին և երկրներին, որ Ուկրաինան փակում է սահմանն արտասահմանյան քաղաքացիների համար։
«Երկու շաբաթից՝ կախված իրավիճակի զարգացումից, մենք խորհրդի նիստին կընդունենք հաջորդ որոշումները», — հավելել է Դանիլովը։
• Կորոնավիրուս․ պանդեմիա է հայտարարվել։ Ի՞նչ է դա նշանակում և ի՞նչ սպասել
Միաժամանակ Ուկրաինայի քաղաքացիներին խորհուրդ է տրվում սահմանափակել արտասահմանյան ճամփորդությունները, եթե այդպիսի հնարավորություն կա։
«Ուկրաինայի բոլոր քաղաքացիները, որոնք այժմ արտասահմանում են, հնարավորություն կունենան հայրենիք վերադառնալ։ Սակայն այն երկրներից (վերադարձողները), որտեղ այսօր մոլեգնում է կորոնավիրուսը, զննման որոշակի ընթացակարգեր կանցնեն», — ասել է Դանիլովը։
Այսօր Ուկրաինայում գրանցվել է կորոնավիրուսի հետևանքով մահվան առաջին դեպքը. մահացել է Ժիտոմիրի շրջանից 71–ամյա կին, որի մոտ վարակը հայտնաբերվել է մարտի 12–ին։ Ըստ լրատվամիջոցների հրապարակած տեղեկությունների՝ կինը վերջերս է Լեհաստանից վերադարձել։
Բացի այդ, Ուկրաինայում հայտնաբերվել է կորոնավիրուսով վարակման ևս երկու դեպք՝ 64-ամյա տղամարդու մոտ, որի կինն Իտալիայում է եղել վերջին 14 օրվա ընթացքում, և մի տղամարդու մոտ, որը կնոջ հետ միասին Իտալիայից է վերադարձել։
