Մայր Աթոռը դատապարտում է Շուշիի Կանաչ ժամի հանդեպ Ադրբեջանի կողմից իրականացված վանդալիզմը

Մայր Աթոռ Սուրբ Էջմիածնի Տեղեկատվական Համակարգի տնօրեն Վահրամ քահանա Մելիքյանը Facebook-ի իր էջում հրապարակել է Արցախի հոգևոր-մշակութային ժառանգության բաժնի հայտարարությունը։ Դրանում խստորեն դատապարտվում է Շուշիի Կանաչ ժամ՝ Սուրբ Հովհաննես Մկրտիչ եկեղեցու հանդեպ իրականացված վանդալիզմը Ադրբեջանի կողմից․

«Հոգևոր-մշակութային արժեքների հանդեպ նմանօրինակ կեցվածքը շարունակությունն է Ադրբեջանի կողմից տասնամյակներ շարունակ հայկական մշակույթի հանդեպ իրականացված գործունեության։

Փորձելով ջնջել հայ մշակույթի վկայությունները Արցախի հողից՝ փորձ է կատարվում նաև վերացնելու մեր հայրենիքի պատմական պատկանելության փաստերը։ Մենք կոչ ենք ուղղում միջազգային հանրությանը և համապատասխան կառույցներին՝ դատապարտելու Ադրբեջանի կողմից Շուշիի եկեղեցու հանդեպ իրականացված նման վայրագությունը»։

Գրառմանը կցված են Շուշիի Կանաչ ժամի նկարները՝ մինչև վանդալիզմի իրականացումն ու դրանից հետո։