Մոսկովյան Russia Today ալիքի աշխատակիցը փորձել է խափանել Մեծ Բրիտանիայում Վրաստանի դեսպանատանն անցկացվող միջոցառումը
Մարդը, որը ներխուժել է Մեծ Բրիտանիայում Վրաստանի դեսպանատուն, Russia Today ռուսական պրոպագանդիստական ալիքի աշխատակից, բրիտանացի բլոգեր և լրագրող Գրեմ Ֆիլիպսն է:
Նա տեսախցիկով ներխուժել է դեսպանատուն, որտեղ օգոստոսյան պատերազմի 10-րդ տարելիցին նվիրված միջոցառում էր անցկացվում:
Վրաստանի արտգործնախարարության տեղեկատվության համաձայն՝ նա իրեն ագրեսիվ էր պահում և ՆԱՏՕ-ի դեմ կարգախոսներ հնչեցնում:
«Դեսպանատան աշխատակիցները դիվանագիտական ոստիկանություն են կանչել, որն արագ դեպքի վայր է ժամանել և ձերբակալել լրագրողին: Այժմ կատարվածի առնչությամբ հետաքննություն է ընթանում», — հայտարարել է ԱԳՆ-ն:
Ֆիլիպսին շատ լավ գիտեն Ուկրաինայում: Նա այդ երկրում աշխատել է որպես Russia Today-ի աշխատակից:
Նա լուսաբանել է Եվրամայդանն, ինչպես նաև Ղրիմի և Դոնբասի իրադարձությունները: Իր ռեպորտաժներում քննադատորեն էր մոտենում Եվրամայդանին և ասում, որ «Ուկրաինան որպես պետություն արդեն գոյություն չունի»:
Ուկրաինացիներին իր ռեպորտաժներում Ֆիլիպսն անվանել է «ֆաշիստներ» և «կիևյան խունտա»: Դոնբասում նրան անվանում էին «մեր Գրիշա»:
Ուկրաինայի անվտանգության ծառայությունը երկու անգամ ձերբակալել է Ֆիլիպսին և արտաքսել երկրից: 2016թ-ին Ֆիլիպսին ձերբակալել է Լատվիայի ոստիկանությունը: Նա մի քանի անգամ փորձել է խաթարել տարբեր միջոցառումներ՝ ռուսամետ կարգախոսներ վանկարկելով:
