Հայաստանի ԱԳ նախարարն Իսրայելին կոչ է արել Ադրբեջանին զենք չվաճառել
Հայաստանի արտգործնախարարն Իսրայելին կոչ է արել Ադրբեջանին զենք չվաճառել, քանի որ այն օգտագործվում է խաղաղ բնակիչների և Հայաստանի քաղաքացիական ենթակառուցվածքների դեմ։ Այս մասին Զոհրաբ Մնացականյանը հայտարարել է իսրայելական Jerusalem Post պարբերականին տված հարցազրույցում։
Հայաստանի ԱԳ նախարարն անդրադարձել է նաև Իսրայելի կողմից Հայոց ցեղասպանության ճանաչման հարցին։
● Հայաստանը չի հավակնում Ռուսաստանի ռազմական միջամտությանն Ադրբեջանի հետ կոնֆլիկտին
● Կարծիք․ ո՞վ է սրացում հրահրել Հայաստանի և Ադրբեջանի սահմանին։ Արդյո՞քդակարողէրՌուսաստանըլինել
Հայաստանի և Իսրայելի դիրքորոշումները
Զոհրաբ Մնացականյանը կարծում է, որ հայ–իսրայելական հարաբերություններում բարելավում է նկատվում, սակայն Ադրբեջանին զենք վաճառելը խնդիր է Հայաստանի համար․
«Ադրբեջանը երբեք չի վարանում կիրառել այդ զենքը քաղաքացիական ենթակառուցվածքների, քաղաքացիական բնակչության դեմ։ Մենք հետևողական կլինենք այս հարցում, այն մշտապես կլինի մեր օրակարգի անքակտելի մասը թե՛ երկկողմ և թե՛ բազմակողմ հարթակներում: Իսրայելը պետք է վերջ դնի Ադրբեջանի հետ իր մահացու գործունեությանը»։
Հայաստանի արտգործնախարարը նաև մեկնաբանել է տեղեկությունն այն մասին, որ հայ–ադրբեջանական սահմանին վերջերս տեղի ունեցած սրացման ժամանակ Հայաստանը հաջողությամբ խոցել է իսրայելական անօդաչու թռչող սարքերը, որոնք կիրառել է Ադրբեջանը։ Ըստ նախարարի՝ Հայաստանը հակազդում է Ադրբեջանին՝ անկախ նրանից, թե ինչ զենք է կիրառվում հակառակորդի կողմից և որտեղից է այն ստացվել․
«Ադրբեջանի ձեռք բերած և Հայաստանի ու Արցախի քաղաքացիական ենթակառուցվածքների և բնակչության դեմ կիրառված սպառազինության մասին փաստերը բազմաթիվ են, և հուլիսյան դեպքերը [հայ–ադրբեջանական սահմանին 2020 թ–ի հուլիսին տեղի ունեցած սրացումը — JAMnews] հավելյալ ապացույցներ դարձան»։
Զոհրաբ Մնացականյանի խոսքով՝ հուլիսյան մարտական գործողություններն ադրբեջանական կողմի համար հակամարտությունն իր թելադրած պայմաններով լուծելու փորձ էին, «սակայն Ադրբեջանի կողմից ուժի ցուցադրումը ձախողվեց»։
Jerusalem Post պարբերականը պարզաբանել է նաև իր երկրի դիրքորոշումը․ Ադրբեջանն Իսրայելի գործընկերն է և մատակարարում է երկրում սպառվող նավթի մինչև 40%–ը։ Նաև Բաքուն՝ իսրայելական սպառազինության վաղեմի և ավանդական գնորդն է, մասնավորապես, անօդաչու թռչող սարքերի և հրթիռային համալիրների։
Ցեղասպանության ճանաչման մասին
Հարցազրույցի ընթացքում Զոհրաբ Մնացականյանը մեկնաբանել է նաև այն փաստը, որ Իսրայելը չի ճանաչում Հայոց ցեղասպանությունը․
«Հայոց ցեղասպանության ճանաչումը մի ժողովրդի կողմից, որը վերապրել է Հոլոքոստի արհավիրքը, բարոյական հարթակում է: Դա ձեր խղճի հարցն է: Ես գիտեմ, որ շատ հրեաներ․․․ կիսում են այս տեսակետը: Այնուամենայնիվ, Իսրայելի իշխանությունները պետք է որոշեն՝ ճանաչել Հայոց ցեղասպանությունը, թե ձեռնպահ մնալ»։
