Միխայիլ Սահակաշվիլիին զրկեցին Վրաստանի քաղաքացիությունից

Վրաստանի նախագահ Գեորգի Մարգվելաշվիլին դեկտեմբերի 4-ին հրաման է ստորագրել, որի համաձայն երկրի երրորդ նախագահ Միխայիլ Սահակաշվիլին, ով այս պահին Ուկրաինայի Օդեսա շրջանի մարզպետն է, զրկվում է Վրաստանի քաղաքացիությունից:

Վրաստանի նախագահի վարչակազմը հայտնում է, որ Սահակաշվիլիի քաղաքացիությունը դադարեցվում է այն պատճառով, որ նա այլ երկրի քաղաքացի է:

Ըստ Վրաստանի օրենսդրության, Վրաստանի քաղաքացին կորցնում է քաղաքացիությունը, եթե այլ երկրի քաղաքացիություն է ստանում: 

Սահակաշվիլին Ուկրաինայի քաղաքացի է դարձել այս տարվա մայիսին, երբ Ուկրաինայի նախագահ Պյոտր Պորոշենկոն նրան Օդեսայի մարզպետ է դարձրել:

Վրաստանի արդարադատության նախարարությունը նախկին նախագահին քաղաքացիությունից զրկելու գործը վարույթ էր ընդունել դեռևս հոկտեմբերի վերջին այն բանից հետո, երբ Ուկրաինան պաշտոնապես հաստատել է, որ Սահակաշվիլին իրոք քաղաքացիություն է ստացել: 

Ինչպես հայտարարել է արդարադատության նախարար Թեա Ցուլուկիանին, նոյեմբերի 3-ին Միխայիլ Սահակաշվիլին գրավոր կերպով ծանուցվել է, որ կարող է զրկվել Վրաստանի քաղաքացիությունից: Սակայն նա չի պատասխանել: 

Չնայած, որ այժմ Սահակաշվիլին Վրաստանի քաղաքացի չէ, նա նախկինի պես շարունակում է մնալ “Ազգային շարժում ընդդիմադիր կուսակցության նախագահը: Սակայն, ըստ կուսակցությունների մասին Վրաստանի օրենքի, կուսակցության գործունեությանը կարող է մասնակցել միայն Վրաստանի քաղաքացին, որն ընտրելու իրավունք ունի: