Հայտնի ռոք երաժիշտ Սերժ Թանկյանը ժամանել է Երևան՝ որպես թավշյա հեղափոխության աջակից

Երևան է ժամանել հայտնի ռոք երաժիշտ, System of a down խմբի անդամ Սերժ Թանկյանը: Այս օրերին, երբ Հայաստանում բողոքի շարժում էր սկսվել գործող իշխանությունների դեմ, Թանկյանն աջակցում և ոգևորում էր դրա կազմակերպիչներին և մասնակիցներին, մանավորապես, գրառումներով Facebook սոցիալական կայքում:

Ենթադրելով, որ Սերժ Թանկյանին օդանավակայանում դիմավորողների թիվը մեծ կլինի, շարժման կազմակերպիչ Նիկոլ Փաշինյանը դիմել էր ոստիկանությանն ու ժողովրդին.

«Հայաստանի ոստիկանության աշխատակիցներն այսօր լիարժեք ծառայություն կիրականացնեն և՛ Հանրապետության հրապարակում, և՛ «Զվարթնոց» օդանավակայանի տարածքում: Հուսով եմ, որ քաղաքացիները, որոնք կդիմավորեն Թանկյանին, ոստիկանների հետ միասին կապահովեն բարեկամական մթնոլորտ»։

«Զվարթնոց» օդանավակայանում երգչին դիմավորեց Նիկոլ Փաշինյանը: Այստեղ էին նաև Թանկյանի հազարավոր երկրպագուներ, թավշյա հեղափոխության աջակիցներ:

«Ժամանակը եկել էր, դրա համար ոտքի կանգնեցին մարդիկ»,- այսպես բացատրեց հեղափոխությունը Սերժ Թանկյանը: Նա նշեց, որ իրենք սփյուռքում շուրջ երկու շաբաթ չէին քնում, հետևում էին հայաստանյան իրադարձություններին. «Սփյուռքահայությունը ձեզ հետ էր»:

Ժամանելուց հետո Թանկյանն ուղևորվեց Հանրապետության հրապարակ, որտեղ տեղի են ունենում շարժման հանրահավաքները: Նախքան ժամանելը Սերժ Թանկյանն Facebook-ի իր էջում գրել էր, որ այցի ընթացքում համերգ նախատեսված չէ։