Հայտնի է Հայաստանի նոր խորհրդարանի նախագահության կազմը
Ապրիլի 2-ին տեղի ունեցած խորհրդարանական ընտրություներից հետո ձևավորվում է նոր պառլամենտի նախագահության կազմը. Հայաստանի Հանրապետական կուսակցությունն արդեն որոշել է Ազգային ժողովի նախագահի պաշտոնում առաջադրել Արա Բաբլոյանի թեկնածությունը: Այս մասին հայկական լրատվամիջոցներին հայտնել է կուսակցության խոսնակ Էդուարդ Շարմազանովը:
Ա. Բաբլոյանի թեկնածությունը՝ որպես ԱԺ նախագահ, կհաստատվի այսօր 6-րդ գումարման նորընտիր խորհրդարանի առաջին նիստում: Քանի որ ԱԺ-ում մեծամասնությունը «Հանրապետական» կուսակցությունն է, կասկած չկա, որ վերջինիս կընտրվի ԱԺ նախագահի պաշտոնում:
Խորհրդարանի 3 փոխնախագահներից 2-ն էլ «Հանրապետական» են: Նրանցից մեկը՝ արդարադատության նախկին նախարար Արփինե Հովհաննիսյանն է, մյուսը՝ կուսակցության խոսնակ Էդուարդ Շարմազանովը: 3-րդ փոխնախագահը, նոր Սահմանադրության համաձայն, ընդդիմությունից է:
Փոխնախագահ առաջադրելու հնարավորությունը գործարար Գագիկ Ծառուկյանի ղեկավարած «Ծառուկյան» կուսակցությունների դաշինքինն է, որը խորհրդարանում մեծամասնությամբ երկրորդ ուժն է: Դաշինքը փոխնախագահի պաշտոնում առաջադրել է տնտեսագետ Միքայել Մելքումյանին:
Օրենքով սահմանված կարգով նորընտիր Ազգային ժողովի առաջին նիստից հետո հրաժարական տվեց նաև կառավարությունը:
Ինչպես հայտարարել է նախագահ Սերժ Սարգսյանը, ՀՀԿ-ն վարչապետի պաշտոնում կրկին կառաջադրի գործող վարչապետ Կարեն Կարապետյանին: Այս մասին խոսել է նաև Կարեն Կարապետյանը՝ վերահաստատելով, որ ինքը կղեկավարի գործադիր մարմինը:
Նոր Սահմանադրության համաձայն, երբ ՀՀ գործող նախագահի լիազորությունները 2018 թ.-ին ավարտվեն, կառավարությունը նորից հրաժարական կտա և նոր կառավարությունը կձևավորվի նոր սահմանադրական կարգավորումներով։ Իսկ հիմա, դեռ հին Սահմանադրության համաձայն, նախագահը Ազգային ժողովի մեծամասնության համաձայնությամբ վարչապետ է նշանակելու, վարչապետն էլ՝ նախարարներին։ Հրաժարականից հետո 20 օրում կառավարությունը ներկայացնելու է իր ծրագիրը:
