Հայաստան. 52 թեկնածու հրաժարվել է մասնակցել խորհրդարանական ընտրություններին

Կենտրոնական ընտրական հանձնաժողովը հայտարարել է, որ ավարտվել է թեկնածուների, կուսակցությունների, դաշինքների կամ դաշինքի անդամ կուսակցությունների կողմից ինքնաբացարկի մասին դիմումներ ներկայացնելու վերջնաժամկետը:

Սահմանված ժամկետում ինքնաբացարկի դիմում են ներկայացրել ընտրական ցուցակներում ընդգրկված թեկնածուներից 52-ը:

ԿԸՀ-ն հայտարարել է նաև, որ սահմանվել են ԱԺ ընտրությունների քվեաթերթիկների նմուշները և «Տիգրան Մեծ» հրատարակչությունում մեկնարկել է քվեաթերթիկների տպագրման գործընթացը: Տպագրության ողջ ընթացքում դիտորդները, վստահված անձինք, զանգվածային լրատվության միջոցների ներկայացուցիչները կարող են հետևել քվեաթերթիկների տպագրման գործընթացին:

Այս ընտրությունների ժամանակ տեղի է ունենալու քվեարկություն նաև էլեկտրոնային տարբերակով: Դրան կմասնակցեն 877 հոգի: Ըստ նոր Ընտրական օրենսգրքի, երկրի դիվանագիտական կորպուսը, որը ընտրության օրը չի կարող գտնվել Հայաստանում, իչպես նաև նրանց հետ արտերկրում բնակվող ընտանիքի անդամները «կարող են մասնակցել Ազգային ժողովի ընտրություններին` քվեարկելով էլեկտրոնային եղանակով… քվեարկության օրվանից ոչ ուշ, քան 5 օր առաջ»:

Էլեկտրոնային եղանակով քվեարկությունը սկսվել է այսօր, 2017 թվականի մարտի 24-ից` Երևանի ժամանակով ժամը 08:00-ից և կավարտվի 2017 թվականի մարտի 26-ին ժամը 20:00-ին: