Հայաստանում կան կորոնավիրուսով վարակված երեխաներ և հղիներ
Վարակվածների օրական հարյուրավոր դեպքերով աճը առիթ է հանդիասցել, որ Հայաստանի առողջապահության նախարար Արսեն Թորոսյանը հանդիպի լրագրողների հետ։ Նա մոտ մեկ ժամ պարզաբանումներ է տվել իրավիճակի առնչությամբ։
Մայիսի 21–ի դրությամբ՝ Հայաստանում գրանցվել է կորոնավիրուսով վարակման 335 նոր դեպք։ Ընդհանուր առմամբ 5 606 հիվանդ կա։ 70 պացիենտի կյանք չի հաջողվել փրկել։ Ապաքինվել է 2 581 մարդ։ Բուժվում է 2928–ը։
Նախարարը խոսել է այն մասին, որ վարակվածների թվում կան երեխաներ և հղիներ, առողջապահական համակարգում ռեանիմատոլոգների պակաս է զգացվում, իսկ կորոնավիրուսով հիվանդներին բուժող կլինիկաների վերակենդանացման բաժանմունքներում ազատ տեղերն արդեն քիչ են։
Արսեն Թորոսյանը ծայրահեղ փոքր է համարում բուժսարքավորումների, աշխատավարձերի և առողջապահական այլ ծախսերի համար նախատեսված գումարը։ Նախարարը վստահեցնում է նաև, որ Հայաստանում չեն օգտագործվում թոքերի արհեստական օդափոխության ռուսական սարքերը, որոնց պատճառով հրդեհներ են առաջացել Ռուսաստանում և մարդիկ են մահացել։
Մամուլի ասուլիսին չի հնչել հարց այն մասին, թե ինչի հետ է կապված վարակման հերթական ալիքը։ Հետևաբար, չկա նաև առողջապահության նախարարի պատասխանը։
Սակայն լրագրողների հետ նրա հանդիպումից առաջ վարչապետն անդրադարձել է այդ թեմային կառավարության նիստի ժամանակ և կրկին կոչ է արել մարդկանց հեռավորություն պահպանել և դիմակներ կրել։
Նա հայտարարել է, որ կորոնավիրուսի դեմ պայքարի «գերարդյունավետ միջոցը» յուրաքանչյուրի անձնական պատասխանատվությունն է։
Այն մասին, որ երկրում դեռևս ոչ բոլորն են գիտակցում իրավիճակի լրջությունն ու ոչ բոլորն են հետևում նոր վարքականոններին, խոսում են ոչ միայն կառավարության անդամներն, այլև բուժաշխատողներն ու լրագրողները։
- Հայաստանի վարչապետ․ «Եթե չփոխենք կորոնավիրուսի տարածման տեմպն, ապա հունիսի 12–ին 20 հազար վարակված կունենանք»
- Երևանը վերադառնում է սովորական կյանքին՝ չնայած կորոնավիրուսով վարակվածների թվի աճին։ Տեսանյութ
Վարակված երեխաների և հղիների մասին
Հայաստանում ընդհանուր առմամբ հաստատվել է երեխաների կորոնավիրուսով վարակման 270 դեպք։
«Մեր փորձը ցույց է տալիս, որ երեխաներն ավելի թեթև են տանում հիվանդությունը։ Միայն երկու անչափահասի մոտ է թոքաբորբ ախտորոշվել, բայց այն թեթև է ընթանում», — հայտարարել է նախարարը։
Ինչ վերաբերում է հղիներին, ապա բոլոր 23 վարակվածները նույնպես թեթև են տանում հիվանդությունը, նրանց կյանքին ոչինչ չի սպառնում։
Վերակենդանացման բաժանմունքներում կադրերի և տեղերի պակասի մասին
Ըստ Արսեն Թորոսյանի՝ վերակենդանացման բաժանմունքներում աշխատակիցների և ռեանիմատոլոգների պակաս կա․
«Նրանց պակասը կար նաև կորոնավիրուսից առաջ։ Մենք փորձում ենք մոբիլիզացնել եղած ռեսուրսները»։
Նախարարը հաղորդել է, որ կորոնավիրուսով վարակվածներին բուժող հիվանդանոցների վերակենդանացման բաժանմունքներում ընդամենը 203 տեղ կա։ Ազատ է դրանցից 72–ը։
Այդ պահին կորոնավիրուսով վարակվածներից 135–ի առողջական վիճակը գնահատվում է որպես ծանր, 63 հիվանդ ծայրահեղ ծանր վիճակում է, 15–ը միացված է թոքերի արհեստական օդափոխության սարքերին։
«Երկրում վերակենդանացման բաժանմունքներում տեղերն ավելի շատ են, սակայն կորոնավիրուսով հիվանդների բուժման համար հատկացվածներն այնքան էլ շատ չեն», — հաղորդել է Արսեն Թորոսյանը։
Ծախսերի մասին
Ընդհանուր առմամբ, ըստ նախարարի, կորոնավիրուսի դեմ պայքարի հատուկ հաշվին 4 մլրդ 540 մլն դրամ կա (9,2 մլն դոլար):
Նա կարծում եմ, որ դա չափազանց փոքր գումար է, որովհետև, ըստ տարբեր գնահատականների, մինչև տարեվերջ երկրում բոլոր ծախսերն իրականացնելու համար 300 մլն դոլար է պետք կլինի։
Արհեստական շնչառության ռուսական սարքերի մասին
Լրագրողները հետաքրքրվել են, թե արդյոք Ռուսաստանից որպես մարդասիրական օգնություն ստացվել և օգտագործվում են թոքերի արհեստական օդափոխության «Ավենտա–Մ» ռուսական սարքերը։
Մայիսի սկզբին Մոսկվայի և Սանկտ Պետերբուրգի հիվանդանոցներում, որտեղ դրանք կիրառվել էին, հրդեհներ էին բռնկվել, յոթ հիվանդ էր մահացել։ Դեռևս հստակ պատասխան չկա, թե արդյոք հրդեհի պատճառ էին հանդիսացել հենց այդ սարքերը, սակայն Ռուսաստանում արդեն կասեցվել է դրանց օգտագործումը՝ մինչև հետաքննության ավարտը։
«Հայաստանի առողջապահության նախարարությունը Ռուսաստանից այդպիսի սարքեր չի ստացել։ Թոքերի արհեստական օդափոխության ռուսական սարքեր Հայաստանում չեն օգտագործվում», — ասել է նախարարը։
Դիմակների մասին
Ֆեյսբուքի հայկական տիրույթում վերջին օրերի ամենաքննարկվող թեման այն է, որ կառավարության անդամներն ու խորհրդարանի պատգամավորները նիստերին առանց դիմակների են՝ չպահպանելով սոցիալական հեռավորությունն, ինչպես պահանջում են քաղաքացիներից։
Մարդկանց դժգոհությունը կապված է այն բանի հետ, որ մայիսի 25–ից դիմակների առկայությունը պարտադիր է դարձել բոլորի համար և ամենուր։ Խախտողները կտուգանվեն 10 հազար դրամով։
«Ազգային ժողովի նիստերի դահլիճը փակ տարածք է, չէ՞։ Այնտեղ դիմակով ու ձեռնոցով մարդ չկա։ Ո՞վ է նրանց տուգանելու։ Ինչո՞ւ նրանք չեն տուգանվում՝ իրենց իսկ ընդունած օրենքի համաձայն», — գրել է օգտատերերից մեկը։
«Այդ հարցին մենք պատասխանել ենք նրանով, որ այժմ նստած ենք դիմակներով, և կառավարության նիստին նույնպես բոլորը դիմակներով էին», — պատասխանել է Արսեն Թորոսյանը։
![Մայիսի 21–ին կառավարության նիստին առաջին անգամ է, որ բոլոր նախարարներն ու վարչապետը դիմակներով և ձեռնոցներով էին](https://jam-news.net/app/uploads/2020/05/1-1024x488.jpg)