Հայաստանում նշում են Հայրենական մեծ պատերազմի հաղթանակի 72-ամյակը
Հայաստանում այսօր՝ մայիսի 9-ին, նշում են Հաղթանակի և խաղաղության տոնը:
Հայրենական մեծ պատերազմում տարած հաղթանակի և Շուշիի ազատագրման տարեդարձերի կապակցությամբ վաղ առավոտից սկսվել են տոնական միջոցառումները:
Երևանի «Հաղթանակի» զբոսայգում Անհայտ զինվորի գերեզմանի անմար կրակին ծաղիկներ խոնարհելու և հարգանքի տուրք մատուցելու են եկել ուսանողներ, դպրոցականներ, վետերաններ, պաշտոնյաներ:
Վետերանները՝ մեդալները կրծքներին պատմում են հավաքվածներին պատերազմական ժամանակի իրենց հիշողությունները, շնորհակալություն հայտնում՝ ֆաշիստական Գերմանիային հաղթելու գործում ունեցած իրենց ներդրումը գնահատելու համար:
«Հայերը հիանալի մարտիկներ էին, ու մեր ազգն անվանի մարշալներ տվեց, որոնք մեծ դեր կատարեցին Հայրենական մեծ պատերազմում հաղթելու գործում», — լրագրողների հետ զրույցում ասաց Մեծ հայրենականի վետերան, Հայաստանի վաստակավոր ուսուցիչ Ռոզալյա Աբգարյանը։
Նա առաջին անգամ վիրավորվել է Ստալինգրադի մոտ, երբ աշխատում էր ռադիոկապի վրա, օգնում օդաչուներին համակարգել նրանց աշխատանքը։ «Սարսափելի պատերազմ էր… Բաներ կան, չեմ էլ ուզում հիշել: Պարտություններ են եղել, նահանջներ են եղել, բայց մեր կռվողներին փրկեց հավատը, հայրենիքի հանդեպ սերը»,- պատմեց Ռոզալյա Աբգարյանը:
Հաղթանակի 72-ամյակի առթիվ տեղի ունեցավ շքերթ, բացվեց նաև դաշտային խոհանոցը: Վրաններում տեղակայված ճաշարաններում բոլորին հյուրասիրում էին պատերազմական ժամանակի զինվորական ուտելիքներ:
