Հայաստանում աճել է պաշտոնապես գրանցված թմրամոլների թիվը

Հայաստանում աճել է թմրամոլների թիվը: Հայաստանի առողջապահության նախարարության գլխավոր նարկոլոգ, Նարկոլոգիական դիսպանսերի գլխավոր տնօրեն Պետրոս Սեմերջյանի հրապարակած տվյալներով՝

• 2016 թ.-ին Հայաստանում պաշտոնապես գրանցվել է 6010 թմրամոլ,
• 2017 թ.-ին՝ 6544:

«Հարկ է նշել, որ սրանք միայն պաշտոնական թվերն են, իսկ ոչ պաշտոնական տվյալներով, Հայաստանում առնվազն մեկ անգամ թմրամիջոցներ օգտագործած մարդկանց թիվը 30 հազարի է հասնում: Այս անձինք ևս թմրամիջոցներից կախվածություն ունեցող են համարվում», — ասել է Պետրոս Սեմերջյանը:

Նրա խոսքով՝ երկրում թմրանյութային կախվածության հետ կապված իրավիճակը վատթարանում է, և սա միայն Հայաստանի խնդիրր չէ՝ միտումն առկա է ամբողջ աշխարհում:

Հայաստանում թմրամոլությամբ տառապող մարդկանց մեծամասնությունը մարիխուանա (կանեփ) է օգտագործում:

2017 թ.-ին գրանցվել է

• 4064 մարիխուանա օգտագործող,
• 2476 ափիոն օգտագործող,
• 3 կոկաին օգտագործող:

Թմրամոլների  մոտ մեկ երրորդը 19-ից 27 տարեկան է, 16-17 տարեկանները՝ մի քանիսն են:

Ընդ որում, Հայաստանում թմրամոլությունը մեծամասամբ տարածված է տղամարդկանց շրջանում: Կանանց թիվը 2016 թ.-ին կազմել է 95, 2017 թ.-ին՝ 105: