Կորոնավիրուսի տարածման հակառեկորդ Հայաստանում․ մեկ օրում դեպքերի թիվն աճել է 180-ով
Հայաստանում կորոնավիրուսով վարակվածների թիվն օր օրի ավելանում է։ Մայիսի 13-ին երկրում հաստատվել է 180 նոր դեպք։ Սա մեկ օրում վարակվածների թվի աճի առավելագույն ցուցանիշն է Հայաստանում։
Հաղորդվում է նաև, որ անցած մեկ օրում գրանցվել է կորոնավիրուսից մահվան 48-րդ դեպքը։ Մահացածը 65 տարեկան տղամարդ է։ Նա չի ունեցել է ուղեկցող խրոնիկական հիվանդություններ։
«Նախորդ օրը արձանագրվել է մահվան 2 դեպք, երբ պացիենտների մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով», — ասվում է առողջապահության նախարարության հաղորդագրությունում:
Այդպիսի դեպքերի ընդհանուր թիվը հասել է 21 — ի:
Մայիսի 13-ի դրությամբ կորոնավիրուսով վարակվածների թիվը հասել է 3 718-ի։ Բուժվածների թիվն ավելացել է 70-ով, նրանց ընդհանուր թիվը կազմում է 1 500: Շարունակում են բուժում ստանալ 2 149 մարդ:
- Տեսանյութ․ Հայաստանի տնտեսությունը կկարողանա՞ արագ հաղթահարել կորոնավիրուսի համավարակի հետևանքները
- Առանց ընտրության հնարավորության. պատմություն, որը սկսվեց մեկ նամակից
Վարչապետ Նիկոլ Փաշինյանը մայիսի 13-ին ֆեյսբուքյան իր էջում մեկնաբանել է իրավիճակը․
«Կորոնավիրուսի տարածման այս տեմպերով կարող ենք շատ լուրջ ճգնաժամի առաջ կանգնել․․․ Մի քանի օր է՝ 100-ից շատ են կորոնավիրուսի դեպքերը, ինչը նշանակում է, որ հակահամաճարակային պայմանները չեն պահպանվում։ Մեզնից յուրաքանչյուրը հնարավորություն ունի չվարակվելու և ուրիշներին չվարակելու` պահպանելով հակահամաճարակային կանոնները»:
Փաշինյանը զգուշացրել է, որ վարակի տարածման այս տեմպի պահպանվելու դեպքում կառավարությունը ստիպված կլինի նորից սահմանափակումներ մտցնել․
«Խնդրում եմ, կոչ եմ անում և պահանջում պահպանել հակահամաճարակային կանոնները»։
