Կարանտինն Ադրբեջանում․ ինքնասպանություն, ոստիկանների կողմից սեռական ոտնձգություններ և այլ հետևանքներ
Ադրբեջանում կորոնավիրուսի համավարակի պատճառով կրկնակի խիստ կարանտինային ռեժիմը գործում է արդեն մեկ ամսից ավելի, և դրա երկարաձգումը մինչև օգոստոսի 5–ը մեծ սթրես է առաջացնում հասարակությունում։ Միայն վերջին օրերին մի քանի սկանդալ է տեղի ունեցել, այդ թվում՝ ինքնասպանության փորձ և սեռական ոտնձգություններ ոստիկանների կողմից։
![](https://jam-news.net/app/uploads/2020/07/104493119_3484323158262596_7787886481072563310_o-1024x801.jpg)
Ադրբեջանում հունիսի 21–ից կարանտինի կտրուկ խստացումից հետո կրկին մեղմացում է․ հուլիսի 20–ից կարելի է փողոց դուրս գալ օրական ոչ թե երկու, այլ երեք ժամով։ Բացի այդ, վարսավիրանոցներն են սկսել աշխատել։
Սակայն խանութներն ու բիզնեսները փակ են, ինչպես նաև սահմանները։ Երկրի շրջանների միջև տեղաշարժ հնարավոր է միայն հատուկ թույլտվությամբ։
Հուլիսի 20–ին Ադրբեջանում գրանցվել է կորոնավիրուսով վարակման 369 նոր դեպք, ընդհանուր առմամբ համավարակի ընթացքում՝ 27 890 դեպք։ 363 մարդ է մահացել, 19 490 մարդ ապաքինվել է։
Բաքվում և երկրի մյուս շրջանների մի քանի քաղաքներում կարանտինը երկարաձգվել է մինչև օգոստոսի 5–ը։ Սահմանները պլանավորվում էր բացել հուլիսի 31–ին, այդ ժամանակ էլ երկրի շրջանների միջև հաղորդակցությունը պետք է վերականգնվեր։ Սակայն այժմ որոշվել է, որ դա տեղի կունենա օգոստոսի 31–ին։
Երկրում շատ շոգ ամառ է, սակայն փակ են լողափերը, լողավազանները, բաղնիքները, մարզասրահները։ Չեն աշխատում նաև առևտրի կենտրոնները՝ բացառությամբ դրանցում գտնվող մթերային խանութների և դեղատների։
Հասարակությունում այդ ընթացքում աճում է նյարդայնությունն ու միջադեպեր են տեղի ունենում։
• Վրաստանը չի շտապում բացվել։ Ինչո՞վ է դա սպառնում էկոնոմիկային
Կարանտինի պատճառով ինքնասպանության անհաջող փորձ
Հուլիսի լույս 17–ի գիշերը, երբ իշխանությունները դեռ ակնարկում էին խիստ կարանտինային ռեժիմը երկարաձգելու հավանականության մասին, ակտիվիստ Էլմադին Շամիլզադեն ֆեյսբուքյան իր էջում գրել էր, որ եթե նման բան տեղի ունենա, նա ինքնասպան կլինի․
«Սա իմ հրաժեշտի նամակն է։ Ամեն ինչ անցյալում է։ Եկեք այս գրառման տակ հաշտվենք և հրաժեշտ տանք»։
Հաջորդ օրը հայտարարեցին խիստ կարանտինային ռեժիմը մինչև օգոստոսի 5–ը երկարաձգելու մասին, և ոստիկանությունը միանգամից մեկնեց ակտիվիստի բնակարան և նրան բաժանմունք տարավ։
Զրույցից հետո՝ երկու ժամ անց, Շամիլզադեին ազատ արձակեցին։ Իր նոր գրառման մեջ նա իր ձերբակալությունը կապեց այն բանի հետ, որ ինքը համագործակցում է Toplum անկախ ինտերնետային հեռուստատեսության հետ։ Ինքնսպանության մասին նա այլևս չի խոսել։
Անձնական տվյալների գողություն և սեռական ոտնձգություն ոստիկանության կողմից
Բաքվում տնից կարելի է դուրս գալ՝ միայն ստանալով իշխանությունների sms-թույլտվությունը։ Այնուհետև ցանկացած վայրում մարդուն կարող է ոստիկանը կանգնեցնել և ստուգել, թե արդյոք նա իրոք թույլտվություն ունի։ Կարանտինային ռեժիմի խախտման համար տուգանքը կազմում է 200–400 մանաթ [մոտ $117-235]։
Ինչպես գրում են լրատվամիջոցներում և սոցցանցերում, այդ համընդհանուր ստուգումները ոստիկանները հաճախ օգտագործում են աղջիկներին անձնական ծանոթություն պարտադրելու համար։
Աղմկահարույց սկանդալ էր առաջացել, երբ ոստիկանության աշխատակիցը կանգնեցրել էր ակտիվիստ Սևդա Մահմուդովային, ստուգել անձը հաստատող փաստաթուղթն, այնուհետև նրա անունով և ազգանունով գտել էջը Ֆեյսբուքում և սկսել անձնական հաղորդագրություններ գրել։
Սևդա Մահմուդովան բողոքել էր ներքին գործերի նախարարություն։
Ֆեյսբուքյան նրա վրդովված գրառմանն ի պատասխան մյուսները տասնյակ նմանատիպ պատմություններ էին պատմել։
Մեկ այլ ակտիվիստ Մեհրիբան Աբդուլան գրել էր․
«Նման բան շատ կանանց հետ է տեղի ունենում։ Քանի՜ անգամ են ոստիկանները «խոսեցրել» նրանց կողքով մեքենայով անցնող կանանց։ Մատենում են և ասում․ «Դուք ինձ դուր եք գալիս, Ձեր հեռախոսահամարը չե՞ք տա»։
Շատ կանայք վախենում են բողոքել, քանի որ նրանք ոստիկաններ են, և բողոքը վերջին հաշվով իրենց դեմ է դուրս գալու։ Սակայն պետք է բոլորի դեմ էլ բողոքել»։