Իսկ եղե՞լ է արդյոք «Իսկանդեր». կարծիք Բաքվից
Այն բանից հետո, երբ Հայաստանի վարչապետ Նիկոլ Փաշինյանը հայտարարեց Ղարաբաղյան երկրորդ պատերազմում «Իսկանդեր» օպերատիվ-մարտավարական հրթիռային համակարգի օգտագործման մասին, արձագանք եղավ ոչ միայն Հայաստանից և Ռուսաստանից, այլ նաև Ադրբեջանից: Բաքվի մեկնաբանությունները հանգեցնում են մի հարցի. իսկ եղե՞լ է արդյոք «Իսկանդեր»:
Ի՞նչ է տեղի ունեցել
1in.am հայկական հեռուստաընկերությանը տված հարցազրույցում վարչապետ Նիկոլ Փաշինյանը սենսացիոն հայտարարություն է արել՝ փաստորեն ընդունելով Ղարաբաղյան երկրորդ պատերազմի ժամանակ «Իսկանդեր» օպերատիվ-մարտավարական հրթիռային համակարգի օգտագործման փաստը:
Այդպիսով նա պատասխանել է Հայաստանի նախկին նախագահ Սերժ Սարգսյանին, որը մեղադրել է երկրի ներկայիս իշխանություններին, թե նրանք չեն օգտագործել այդ զենքը:
«Իսկ գուցե պատասխանե՞ն՝ ինչո՞ւ կրակած «Իսկանդերը» չի պայթել կամ պայթել է, օրինակ, 10 տոկոսով»,- հարցրել է Փաշինյանը երկրի նախկին ղեկավարին լրագրողների միջոցով:
Հաջորդ օրը Մոսկվայի կողմից հետևել է կոշտ արձագանք ՀՀ կառավարության ղեկավարի խոսքերին:
Արձագանք Իլհամ Ալիևի կողմից
Փետրվարի 26-ին Ադրբեջանի նախագահի՝ տեղի և օտարերկրյա լրագրողների համար հրավիրված մամուլի ասուլիսում ռուսական «Զվեզդա» հեռուստաընկերության թղթակիցը Իլհամ Ալիևին դիմել է հարցով՝ Ղարաբաղյան երկրորդ պատերազմի ընթացքում «Իսկանդեր» հրթիռի օգտագործման վերաբերյալ Փաշինյանի հայտարարության մասին:
«Ինչ վերաբերում է« Իսկանդեր» հրթիռային համակարգի հետ կապված Հայաստանի վարչապետի հայտարարությանը, ապա դա մեզ համար նույնպես հարցեր է առաջացրել: Ես չէի ցանկանա հեգնական վերաբերվել այս թեմային, Ռուսաստանի պաշտոնյաների, Ռուսաստանի խորհրդարանի անդամների և փորձագետների շրջանում արդեն բավականաչափ մեկնաբանություններ են եղել այն մասին, որ, որպեսզի հրթիռը պայթի 10 տոկոսով, իհարկե, պետք է շատ ջանքեր գործադրել, որ դա տեղի ունենա:
Մենք չտեսանք «Իսկանդեր» հրթիռների արձակումը, չտեսանք: Հետևաբար, երբ այդ հայտարարությունը հնչեց, երեկ մենք նորից հետաքրքրվեցինք: Բայց ոչ, մենք դա չտեսանք: Սա պարզապես հերթական, ես կասեի, հանրային կոպիտ վրիպումն է: Այդպիսիք շատ են եղել:
Եվ սկզբունքորեն, այն, ինչ այժմ կատարվում է Հայաստանում, տրագիկոմեդիայի տեսարան է հիշեցնում: Ահա այսպես ես կբնութագրեմ այն, ինչ տեղի է ունենում այնտեղ»,- պատասխանել է Ալիևը:
Իսկ արդյո՞ք եղել է «Իսկանդեր». Ադրբեջանի նախկին արտգործնախարարի մեկնաբանությունը
Այս հարցի վերաբերյալ իր մեկնաբանության մեջ Ադրբեջանի արտաքին գործերի նախկին նախարար Թոֆիկ Զուլֆուգարովը կասկած է հայտնել Հայաստանի զինված ուժերում «Իսկանդեր» օպերատիվ-մարտավարական հրթիռային համակարգի առկայության վերաբերյալ:
«Համացանցում բուռն քննարկում է ընթանում «Իսկանդեր» հրթիռային համակարգի լավ կամ վատ լինելու մասին… Ես որոշեցի վերահրապարակել երեք տարի առաջվա այս հրապարակումը, որպեսզի քննարկումը տեղափոխեմ մեզ համար ավելի կարևոր հուն. ունե՞ն հայերն այդ համակարգը, թե՞ ոչ:
Հայերը այն երբեք չեն ունեցել, հետևաբար՝ չեն օգտագործել: Եվ թեման սկսել է Փաշինյանը՝ Սարգսյանին ճշմարտությունն ասելու համար. Հայաստանում «Իսկանդերը» Ռուսաստանի հայամետ շրջանակների կողմից ձեռնարկված քարոզչական կեղծիք է՝ Ադրբեջանում վախ տարածելու համար Հայաստանի «ռազմական հզորության» հանդեպ: Երբ գեներալը զինվոր չունի, նա լեզվով է կռվում:
Հիմա սպասում ենք՝ ով առաջինը կխոսի և կասի ճշմարտությունը. Փաշինյա՞նը, Սարգսյա՞նը, թե՞ Լավրովը»,- գրել է Զուլֆուգարովը ֆեյսբուքյան իր էջում:
