Եվրախորհրդարանը կոչ է արել սկսել Հայաստանի հետ վիզաների ազատականացման շուրջ երկխոսությունը
Լուսանկարը՝ Գևորգ Ղազարյանի, JAMnews
Հաջորդ շաբաթ Բրյուսելում կայանալիք Արևելյան գործընկերության գագաթնաժողովից առաջ Եվրախորհրդարանը կոչ է արել Եվրամիության երկրների կառավարություններին ու արտաքին գործերի նախարարություններին Հայաստանի հետ վիզաների ազատականացման շուրջ երկխոսություն սկսել:
Հայաստանում ևս կարծում են, որ վիզաների դյուրացման փուլը հաջողությամբ ավարտել են և ժամանակն է անցում կատարել վիզաների ազատականացման բանակցություններին:
«Վիզաների ազատականացման շուրջ երկխոսությունը մեկնարկելու համար կան որոշակի պայմաններ, որոնք պետք է բավարարվեն նաև Հայաստանի կողմից: Հայաստանի արտաքին քաղաքական օրակարգում վիզաների ազատականացման հարցը երրորդն է իր կարևորությամբ Հայաստան-Եվրամիություն շրջանակային համաձայնագրի ստորագրումից ու Լեռնային Ղարաբաղի հակամարտության կարգավորումից հետո»,- ասել է Հայաստանի Ազգային ժողովի արտաքին հարաբերությունների հանձնաժողովի նախագահ, իշխող «Հանրապետական» մեծամասնության պատգամավոր Արմեն Աշոտյանը:
Վիզաների ազատականացման երկխոսությունը սկսելու համար անհրաժեշտ է Եվրամիության անդամ բոլոր պետությունների համաձայնությունը, որոնք, ըստ Աշոտյանի, քաղաքական կամք պետք է դրսևորեն և Հայաստանին տան այդ հնարավորությունը:
ԱԺ նախկին պատգամավոր Թևան Պողոսյանի խոսքով՝ նոյեմբերի 24-ին նախատեսված Հայաստան-Եվրամիություն համագործակցության համաձայնագրի ստորագրումը կարող է դրական ֆոն ստեղծել նրա համար, որ ԵՄ բոլոր անդամները քաղաքական մանդատ տրամադրեն՝ Հայաստանի հետ երկխոսություն սկսելու համար:
«Երկու տարի առաջ, Հայաստանն ու Եվրամիությունը Արևելյան գործընկերության Ռիգայի գագաթաժողովում համատեղ հայտարարությամբ էին հանդես եկել, և ԵՄ-ն պարտավորվել էր շարունակել վիզաների երկխոսության վերաբերյալ Հայաստանի հետ համագործակցությունը: Եվրամիության մոնիթորինգի խումբը պետք է գա Հայաստան ու գնահատի, թե որքանով է Հայաստանը կատարել նախորդ փուլի՝ վիզաների դյուրացման շրջանակներում ստանձնած պարտավորությունները:
Հայաստանը բարձր կարգով է կատարել վիզաների դյուրացման ծրագրերը, որևէ խնդիր մեր առջև դնել չեն կարող: Բայց քաղաքական լավ միջավայր ստեղծելու համար մենք պետք է ստորագրենք նախատեսված համագործակցության համաձայնագիրը»,- նշել է Թևան Պողոսյանը:
