Ե՞րբ և ի՞նչ պատվաստանյութով են Վրաստանում սկսվելու պատվաստումները։ Այն ամենն, ինչ հայտնի է այս պահին

Ըստ ամենայնի՝ Վրաստանում բնակչությունը կպատվաստվի բրիտանական AstraZeneca և ամերիկյան Pfizer պատվաստանյութերով։ Ենթադրաբար, պատվաստումները կսկսվեն գարնան սկզբին, զանգվածային պատվաստումներ կիրականացվեն ամռանը կամ աշնանը։

Վրաստանում պատվաստման մասին առաջին լուրերը հայտնվեցին 2020 թ-ի վերջին, սակայն մինչ օրս հստակ պատասխան չկա, թե ինչ պատվաստանյութ է օգտագործվելու և երբ։

Ավելին՝ կառավարությունն ու ինֆեկցիոն հիվանդությունների առաջատար մասնագետները հակասական տեղեկություններ են տարածում, որը ոչ միայն շփոթմունք է առաջացնում, այլև մեծացնում է պատվաստման նկատմամբ բնակչության անվստահությունը։

Համավարակի մեկնարկից ի վեր, հունվարի 14-ի դրությամբ, Վրաստանում հաստատվել է կորոնավիրուսով վարակման 244 612 դեպք։ Վարակվածներից 2 867-ը մահացել է, 228 359-ն ապաքինվել։ Ներկա պահին վարակված է 13 360 մարդ։

Ո՞ր պատվաստանյութը Վրաստան կբերվի

Ելնելով կառավարության մեկնաբանություններից, ըստ ամենայնի, Վրաստանի բնակչությունը կպատվաստվի օքսֆորդյան AstraZeneca պատվաստանյութով։ Սակայն հստակ որոշում այս հարցում դեռ չկա։

Առողջապահության նախարարությունն ասում է, որ երկիր կբերվի նաև Pfizer պատվաստանյութի որոշակի խմբաքանակ։ Առողջապահության նախարար Եկատերինա Թիկարաձեն հաղորդել է, որ արդեն հաստատվել է այդ պատվաստանյութի ներկրումը Վրաստան՝ բուժանձնակազմի իմունացման համար։

● Ի՞նչ է հայտնի կորոնավիրուսի պատվաստանյութերի մասին, արդյո՞ք դրանք կհաղթեն համավարակն ու ե՞րբ

● Ադրբեջանը կողմնորոշվել է կորոնավիրուսի դեմ պատվաստանյութի հարցում

Ըստ նախնական տեղեկությունների՝ առաջին փուլում Վրաստանը Pfizer-ի մոտ 100 հազար չափաբաժին կստանա։

«Այս փուլում մենք խոսում ենք Pfizer պատվաստանյութի մասին, ինչը չի բացառում, որ մոտ ժամանակներս այլ պատվաստանյութեր կավելացվեն։ Մասնավորապես, ակնկալում ենք, որ մեր քաղաքացիների համար հասանելի կլինի AstraZeneca-ն», — ասել է նախարարը։

Առողջապահության նախարարը հերքել է լուրերն այն մասին, որ Վրաստանը դիտարկում է չինական պատվաստանյութի գնման հնարավորությունը․

«Չինական պատվաստանյութի մասին բավականաչափ տեղեկություններ չկան, և դժվար է խոսել երաշխիքների մասին։ Այդ պատճառով էլ առողջապահության նախարարությունը հաստատ չի դիտարկում այդ պատվաստանյութը»։

Չինական պատվաստանյութի մասին խոսք է գնացել այն բանից հետո, երբ Ինֆեկցիոն հիվանդությունների, ՁԻԱՀ և կլինիկական իմունաբանության կենտրոնի տնօրեն Թենգիզ Ծերծվաձեն «Ֆորմուլա» հեռուստաալիքին ասել է, որ Վրաստանը մտածում է երկու պատվաստանյութերի գնման մասին՝ բրիտանական AstraZeneca-ի և չինական պատվաստանյութերից մեկի։

«Չինաստանում հինգ պատվաստանյութ կա, և մենք խոսում ենք դրանցից մեկի մասին։ Եվ ուզում եմ ասել, որ չինական պատվաստանյութի վարկանիշն աշխարհում բավականին բարձր է», — ասել է Ծերծվաձեն։

AstraZeneca պատվաստանյութը նախընտրելու մասին է խոսել նաև առողջապահության ոլորտի փորձագետ Ակակի Զոյիձեն, որը պատվաստման աշխատանքային խմբի անդամ է։ Նրա խոսքով՝ Վրաստանը  պատրաստվում է գարնան սկզբին ներկրել AstraZeneca-ի 500 հազար չափաբաժին։

Ինչպե՞ս են մատակարարվելու պատվաստանյութերը

Pfizer կամ Moderna պատվաստանյութերը զգալի լոգիստիկ դժվարություններ են առաջացնում։ Դրանց տեղափոխման և պահպանման համար հատուկ թանկ սառնարաններ են պահանջվում, որոնք ապահովում են մինչև -80⁰ ջերմաստիճան։

Վրաստանում այդպիսի շատ քիչ սառնարան կա։ Այնուամենայնիվ, ինչպես նշում է Հիվանդությունների վերահսկման կենտրոնի փոխտնօրեն Պաատա Իմնաձեն, Pfizer-ի 200 հազար չափաբաժին ստանալու հնարավորություն կա։

Բացի այդ, «Թեգեթա Մոթորս» ընկերությունը հայտարարել է, որ պատրաստ է Վրաստանին օգնել Pfizer-ի տեղափոխման հարցում և սառնարաններով որակյալ տրանսպորտ տրամադրել։

Ո՞ւմ են պատվաստելու առաջին հերթին

Առողջապահության նախարարն ասում է, որ Վրաստանը նույն կերպ է վարվում, ինչ աշխարհի շատ երկրներ․ հետևում է առաջնահերթություններին, որոնք առաջարկում է Առողջապահության համաշխարհային կազմակերպությունը։

Նախևառաջ, կպատվաստվեն բժիշկներն ու մնացած բուժանձնակազմը, այնուհետև՝ խոցելի խմբերը, առաջին հերթին՝ քրոնիկ հիվանություններով մարդիկ և թոշակառուները։

Ե՞րբ է սկսվելու պատվաստումը

Առողջապահության նախարարությունը հստակ ամսաթիվ չի նշում, թե երբ է Վրաստանում կատարվելու առաջին պատվաստումը։

Հիվանդությունների վերահսկման կենտրոնի փոխտնօրեն Պաատա Իմնաձեն հաղորդել է, որ զանգվածային պատվաստումն իրականացվելու է ամռանը կամ աշնան սկզբին։