Բրիտանիայում ընդունված նոր օրենքը հնարավոր է դարձնում ռուսական էլիտայի դեմ աննախադեպ տնտեսական պատժամիջոցներ կիրառել

Բրիտանական խորհրդարանը նոր օրենք է ընդունել, որի համաձայն՝ պատժամիջոցներ կկիրառվեն մարդու իրավունքները խախտողների և կոռուպցիայի համար կասկածվողների դեմ, հաղորդում է Բի-Բի-Սիի ռուսական ծառայությունը: Եվ թեև նկատի են առնվում օրինախախտներն աշխարհի ցանկացած երկրից, կարելի է ենթադրել, որ առաջին հերթին խոսքը գնում է Ռուսաստանի մասին: Այդ միտքն առաջանում է արդեն իսկ անվանումից՝ «Մագնիտսկու փոփոխություն»:

Այժմ բրիտանական իշխանությունները կարող են վիզա չտրամադրել կամ սառեցնել այն անձանց ակտիվները, որոնք, նրանց կարծիքով, խախտում են մարդու իրավունքները: «Մագնիտսկու ցուցակում» կարող են հայտնվել պաշտոնատար անձինք, գործարարներ և քաղաքական գործիչներ: Եվ այն լրջորեն կազդի ռուս գործարարների վրա, որոնք իրենց կապիտալը Մեծ Բրիտանիայում են պահում:

Բրիտանիայի և Ռուսաստանի հարաբերությունները կտրուկ վատթարացան, երբ մարտի 4-ին անգլիական Սոլսբերի քաղաքում թունավորվեց ռուս նախկին հետախույզ Սերգեյ Սկրիպալը: Բրիտանական իշխանությունները կարծում են, որ այդ թունավորման ետևում Ռուսաստանն է կանգնած:

Նոր օրենքի առանձին կետը նվիրված է բրիտանական «անդրծովյան տարածքներին», որտեղ գործում է պարզեցված (կամ զրոյական) հարկային ռեժիմ, և օֆշորային գոտիներին, որոնք գտնվում են Մեծ Բրիտանիայի ենթակայության տակ:

Արտգործնախարարությունն, ըստ նոր օրենքի, պետք է նպաստի, որպեսզի Բրիտանիայի այդ տարածքներն ավելի բարեհաճորեն բացեն այնտեղ գրանցված ընկերությունների ռեգիստրերը: ԱԳՆ-ն պետք է պարբերաբար հաշվետվություն ներկայացնի բրիտանական խորհրդարանին այդ ուղղությամբ կատարվող աշխատանքի վերաբերյալ:

Բրիտանական խորհրդարանի ընդդիմությունը փորձում էր ավելիին հասնել. «անդրծովյան տարածքներում» գրանցված ընկերություններին պարտավորեցնել գաղտնազերծել նրանց շահառուների անունները մինչև 2020թ-ը: Սակայն խորհրդարանի մեծամասնությունը չկամեցավ կոռուպցիային դիմակայելու նման խիստ մեթոդների օգտին քվեարկել:

Global Witness ոչ կառավարական կազմակերպության վերջերս կատարած հետազոտության համաձայն՝ այդ տարածքներում Ռուսաստանից դուրս բերված մոտ 47 մլրդ դոլար է պահվում:

Պատժամիջոցների կիրառման մասին օրենք ընդունելու անհրաժեշտությունն առաջացել էր մոտ ապագայում Եվրամիությունից երկրի դուրս գալու կապակցությամբ: Մինչ այդ պահը բրիտանական պատժամիջոցները կիրառվում էին՝ ըստ ԵՄ ընդհանուր օրենքների և համաձայնագրերի: Այժմ արդեն Մեծ Բրիտանիայի իշխանությունները կկարողանան դրանք ինքնուրույն կարգավորել:

Սպասվում է, որ Եվրամիությունը լքելուց հետո ռուսական ագրեսիվ գրոհներին դիմադրելու նպատակով Մեծ Բրիտանիայի կողմից կիրառվելիք միջոցներն ավելի խիստ կդառնան:

Առաջին նմանատիպ «Մագնիտսկու օրենքները» հայտնվեցին ԱՄՆ, Կանադայի և մի քանի եվրոպական պետությունների օրենսդրություններում 2012թ-ին: