Ադրբեջանի բնակիչների համար արտասահմանից հեռախոս բերելն այլևս շահեկան չէ
Այժմ, եթե Ադրբեջանի քաղաքացին իր հետ արտասահմանից բջջային հեռախոս է բերում կամ պատվիրում, Կապի, տրանսպորտի և բարձր տեխնոլոգիաների նախարարության համակարգում այն գրանցելու համար անհրաժեշտ կլինի վճարել 30-150 մանաթ (մոտ 17-88 դոլար)՝ կախված ապրանքի շուկայական արժեքից: Այս որոշումը կայացրել է նախարարների կաբինետը: Նախկինում այդ տուրքը կազմում էր 5 մանաթ (մոտ 3 դոլար):
Նոր հեռախոսի գրանցումը պարտադիր ընթացակարգ է, այլապես այն կանջատվի ցանցից: Եթե հեռախոսը գնվել է տեղի խանութից, ապա գրանցման համար արդեն վճարել է վաճառողը: Իսկ եթե այն բերվել է կամ պատվիրվել է արտասահմանից, այն արդեն պետք է ինքնուրույն գրանցել:
Այն բանից հետո, երբ մանաթի փոխարժեքը կրկնակի նվազեց (2015 և 2016թթ-ին), ամեն ինչի գներն, այդ թվում՝ տեխնիկայինը, զգալի աճեց: Ադրբեջանի բնակիչներից շատերի համար ավելի շահեկան դարձավ բջջային հեռախոսներն այլ երկրներից բերելը կամ պատվիրելը: Իսկ այժմ նման կերպ տնտեսելը շատ ավելի բարդ կլինի: Ճիշտ է, դեռ հայտնի չէ, թե երբ ուժի մեջ կմտնեն նոր կանոնները:
Նորարարությունը վերաբերում է միայն մասնավոր անձանց, բայց ոչ ընկերություններին, որոնք վաճառքի հեռախոսներ են ներկրում:
Տնտեսագետ Նաթիգ Ջաֆարլին կարծում է, որ տուրքի բարձրացման նպատակը «խոշոր ներկրողների շահերի լոբբինգն է»:
Իսկ «Մուլտիմեդիա» հկ ղեկավար Օսման Գյունդուզը մտավախություն ունի, որ «դա արգելակելու է էլեկտրոնային կառավարության և թվային հասարակության զարգացումը, քանի որ բարձր արագությամբ թրաֆիկով աշխատող ապարատներ ձեռք բերելը շահեկան չի լինելու»:
Տուրքի չափն աճել է հասարակական տրանսպորտում երթևեկելու սակագների բարձրացման հետ գրեթե միաժամանակ: Այնպես որ, սոցցանցերում դա սուր հեգնանքի ալիք է բարձրացրել.
«Ամեն ինչ ճիշտ են անում: Չէ՞ որ մեր ժողովուրդը համբերատար է, ամեն ինչ կուլ կտա և ձայն չի հանի: Նույնիսկ եթե գրանցման գինը հեռախոսի գնի չափ դարձնեն, մարդիկ դա լուռ կուլ կտան»:
«Ինչո՞ւ են մանրանում: Թող միանգամից կյանքի հարկ մտցնեն»:
«Բյուջեի համար ավելի շատ փող հավաքելու և սոցիալական արդարությունը պահպանելու համար ճոխության հարկ պետք է մտցնել, այլ ոչ թե անիմաստ տուրքեր այն ծառայությունների համար, որոնք, ըստ էության, ընդհանրապես պետք է անվճար լինեն»:
Սակայն ոմանք փորձում են այս իրավիճակին էլ լավատեսությամբ մոտենալ.
«Սարսափելի ոչինչ չկա, չէ՞ որ ամեն օր չենք հեռախոս գնում: Գլխավորը, որ մթերքն ու կոմունալ ծառայությունները չթանկանան»: