Աբխազիայի խորհրդարանը հրաժարվել է անձեռնմխելիությունից զրկել ընդդիմադիր պատգամավորին
Աբխազիայիում Կան Կվարչիայի գործի հանգուցալածումը
Աբխազիայի խորհրդարանի վերջին նստաշրջանն ավարտվել է նշանակալի իրադարձությամբ. պատգամավորները հրաժարվել են իրենց գործընկերոջը՝ ընդդիմադիր գործիչ Կան Կվարչիային, զրկել անձեռնմխելիությունից, ինչպես պահանջում էր Գլխավոր դատախազությունը։
Այս որոշումը, որը կայացվել է համապատասխան հանձնաժողովում բուռն քննարկումներից հետո, ոչ միայն համերաշխության դրսևորում է, այլև քննչական մարմինների աշխատանքի որակի և ազգային շահերի պաշտպանության հարցում նրանց դիրքորոշման կոշտ գնահատական։
Սկանդալը կապված է ռուս քաղաքական տեխնոլոգների հետ, որոնք 2025 թվականի նոյեմբերին Աբխազիայում կայացած ՏԻՄ ընտրությունների ժամանակ անօրինական կերպով աշխատել են իշխանամետ թեկնածուների օգտին։
Կան Կվարչիան, մի քանի այլ ընդդիմադիր ակտիվիստների հետ միասին, բացահայտել է քաղտեխնոլոգների գործունեությունը։ Նրանք, իրենց հերթին, բողոք են ներկայացրել Ռուսաստանի Քննչական կոմիտե, որը քրեական գործ է հարուցել աբխազ ընդդիմադիրների դեմ՝ զինված կողոպուտի մեղադրանքով։
Դրանից հետո աբխազական իրավապահ մարմինները ստիպված են եղել նմանատիպ գործ հարուցել։ Ներկայումս չորս ընդդիմադիրներ տնային կալանքի տակ են, ևս երկուսին արգելվել է լքել հանրապետության տարածքը։
Այնուամենայնիվ, Կան Կվարչիայի դեմ որևէ միջոց ձեռնարկել հնարավոր չի եղել, քանի որ նա ունի պատգամավորական անձեռնմխելիություն, որից էլ Դատախազությունը փորձում էր նրան զրկել։
Գլխավոր դատախազությունը դիմել է խորհրդարան՝ հիմնվելով Քրեական օրենսգրքի 113-րդ հոդվածի («Սպանության սպառնալիք») մեղադրանքի վրա, որը մտադիր էր առաջադրել Կան Կվարչիային։
Գլխավոր դատախազ Ադգուր Ագրբան, ելույթ ունենալով Պետաիրավական քաղաքականության հանձնաժողովի ընդլայնված կազմի առջև, հիմնվել է ռուս քաղտեխնոլոգների ցուցմունքների վրա։ Սակայն հանձնաժողովի ղեկավար Դաութ Խութաբայի նախագահությամբ անցկացված նիստի ժամանակ պարզ է դարձել, որ ապացույցները բազմաթիվ հարցեր են առաջ բերել պատգամավորների շրջանում։
Խորհրդարանականները մատնանշել են փաստական անհամապատասխանություններ։ Օրինակ՝ գործում ներառված են «ծանր և երկարատև ծեծի» մասին պնդումներ, չնայած դատաբժշկական փորձաքննությունն արձանագրել է միայն քերծվածքներ, որոնք կյանքի համար սպառնալիք չեն ներկայացրել։ Ատրճանակի օգտագործման վարկածը նույնպես չի հաստատվել։ Տուժածների վիճակի մասին հարցին պատասխանելիս գլխավոր դատախազը խոստովանել է, որ անձամբ չի տեսել նրանց, և որ որևէ առերեսում չի անցկացվել․ հարցաքննությունները կատարվել են հեռակա կարգով՝ ռուսական իշխանությունների միջոցով։
«Մենք պատճառ չունենք նրանց չհավատալու»,- Ադգուր Ագրբան այսպես է արձագանքել քաղտեխնոլոգների խոսքերի ճշմարտացիության վերաբերյալ պատգամավորների կասկածներին։
Պատգամավորներ Բեյան և Դմիտրի Մարշանը բարձրացրել են այն հարցը, թե ինչ հիմքով են օտարերկրյա քաղաքացիները հավաքագրել աբխազ ընտրողների անձնական տվյալները և ով է ֆինանսավորել նրանց գործունեությունը: Պարզվել է, որ դատախազությունը չի կարողացել բացահայտել այս աշխատանքի կազմակերպիչներին՝ հղում անելով «անբավարար տվյալների» վրա:
Պատգամավոր Բեյան տարակուսանք է հայտնել քննչական գործողությունների պասիվության վերաբերյալ:
«Ո՞վքեր են այս մարդիկ: Նրանք օտարերկրյա գործակալնե՞ր են: Հնարավո՞ր է, որ նրանք կապեր ունեն Վրաստանի հետ: Որտեղի՞ց են նրանք այդպիսի միջոցներ ստացել: Ի՞նչ նպատակ են հետապնդել»,- այս հարցերն է հնչեցրել պատգամավորը, սակայն դատախազը պատասխաններ չի ունեցել։
«Օրվա հերոսը»՝ Կան Կվարչիան, իր պաշտպանությունը կառուցել է՝ վերահսկող մարմիններին մեղադրելով անփութության մեջ: Նա հայտարարել է, որ միջադեպից շատ ժամանակ առաջ Պետական անվտանգության ծառայությանը, դատախազությանն ու նախագահին պաշտոնապես զգուշացրել է շրջանային ընտրական հանձնաժողովներում օտարերկրյա քաղաքացիների անօրինական գործունեության մասին, սակայն պատասխան չի ստացել:
«Այդ մարդիկ ժամանեցին, իրենց պահեցին այնպես, ինչպես ցանկացան, և նրանց տրամադրվեցին բոլոր փաստաթղթերը: Ինչո՞ւ դատախազը հավատաց այս խաբեբաներին, իսկ ինձ՝ ոչ: Ինչո՞ւ դատախազը չհավատաց հայրենասերի, պատերազմի վետերանի ցուցմունքներին»,— շփոթված հարցրել է Կվարչիան։
Նա նաև ընդգծել է, որ անձամբ զանգահարել է իրավապահ մարմիններին, երբ քաղտեխնոլոգների գրասենյակում հայտնաբերել է Աբխազիայի քաղաքացիների անձնական տվյալները: Նրա խոսքով՝ այս դեպքում տուժող կողմը աբխազ հանրությունն է, որի շահերը կառավարությունը չի պաշտպանել։
Խորհրդարանի ամփոփիչ նիստում միայն 3 պատգամավոր է կողմ քվեարկել Կան Կվարչիային անձեռնմխելիությունից զրկելուն, 4-ը՝ ձեռնպահ։ Դեմ են քվեարկել 23 պատգամավորներ։ Այսպիսով, խորհրդարանը, ըստ էության, ցույց է տվել, որ քաղաքացիների շահերի պաշտպանությունն ու երկրում օտարերկրյա ապօրինի ազդեցության զսպումն ավելի կարևոր են, քան կասկածելի ցուցմունքների վրա հիմնված քրեական հետապնդումը։
Հետևեք մեզ — Facebook | Youtube
Աբխազիայիում Կան Կվարչիայի գործի հանգուցալածումը
