ჟურნალისტმა ჰადიჯა ისმაილოვამ აზერბაიჯანის ხელისუფლებას ევროსასამართლოში მეორე საქმეც მოუგო

ევროპის ადამიანის უფლებათა სასამართლომ აზერბაიჯანელი ჟურნალისტის, ჰადიჯა ისმაილოვას პირად ცხოვრებაში ჩარევასთან დაკავშირებით მისი სარჩელი დააკმაყოფილა. საქმე ეხება იმას, რომ 2012 წელს ინტერნეტში მოხვდა ისმაილოვას ინტიმური ცხოვრების ამსახველი ვიდეოჩანაწერი, პროკურატურამ კი დამნაშავე ვერ მოძებნა, სამაგიეროდ ჟურნალისტის შესახებ მისი პირადი ინფორმაცია გამოაქვეყნა. სასამართლომ დაადგინა, რომ ისმაილოვას ერგებოდა 15 000 ევროს ოდენობის კომპენსაცია და კიდევ 1750 ევრო სასამართლოს ხარჯების ასანაზღაურებლად. ეს ევროპის ადამიანის უფლებათა სასამართლოში მის მიერ მოგებული უკვე მეორე სარჩელია.

• ევროპის სასამართლომ აზერბაიჯანის 11 მოქალაქის უფლებების დარღვევა აღიარა

• როგორ მდიდრდებოდნენ ქართველი ჩინოვნიკები — ჟურნალისტებმა დეპუტატებისა და მინისტრების ელიტური სახლები აღმოაჩინეს

ვიდეო, გამოძიება, საჩივარი

2012 წელს ჰადიჯა ისმაილოვამ ანონიმური მუქარის წერილი მიიღო, რომ თუკი ის თავის გამოძიებას არ შეწყვეტდა, მისი ინტიმური ცხოვრების ამსახველი ვიდეო გამოქვეყნდებოდა. ჟურნალისტმა გამოძიება არ შეწყვიტა და ვიდეო მართლაც ინტერნეტში მოხვდა. ამას თან ახლდა პროსამთავრობო გაზეთებში გამოქვეყნებული რამდენიმე სტატია, რომლებშიც ისმაილოვას „პროფესიონალიზმის ნაკლებობაში“, „მთავრობისადმი მიკერძოებასა“ და „ამორალურ ქცევაში“ სდებდნენ ბრალს.

ისმაილოვამ საკუთარ ბინაში აღმოაჩინა ფარული კამერები, მეორე სატელეფონო ხაზი და გადაღებული მასალის ტრანსლაციისთვის განკუთვნილი სადენები. დაიწყო გამოძიება, და დამნაშავეებს ვერ მიაგნეს. ისმაილოვა გამოძიების არაეფექტიანობის გამო ჩიოდა, პროკურატურამ კი საპასუხოდ გამოაქვეყნა ანგარიში, რომელშიც მოჰყვა მოწმეების დაკითხვის შესახებ, მათ შორის – ისმაილოვას ახლო გარემოცვის ჩათვლით. ჟურნალისტმა მიიჩნია, რომ ამ ანგარიშში მისი პირადი ცხოვრების შესახებ ინფორმაცია გახმაურდა (მისი მეგობრების, კოლეგებისა და ოჯახის წევრების სრული სახელები და პროფესიები, ასევე მისი სახლის მისამართი და იმ ადამიანის ვინაობა, რომელიც ვიდეოში ფიგურირებდა). ადგილობრივმა სასამართლოებმა ისმაილოვას ამ საჩივრის მიღებაზე უარი განაცხადეს, და მაშინ მან სარჩელით ევროპის ადამიანის უფლებათა სასამართლოს მიმართა.

და აი, ახლა ევროპის სასამართლომ დაადგინა, რომ ისმაილოვას მიმართ დაირღვა ადამიანის უფლებათა ევროპული კონვენციის მე-8 მუხლი ( პირადი და ოჯახური ცხოვრების, საცხოვრებლისა და კორესპონდენციების პატივისცემის უფლება) და მე-10 მუხლი (აზრის გამოხატვის თავისუფლება).

მართალია, მისთვის კუთვნილი კომპენსაციის (ისევე როგორც წინა სარჩელის კომპენსაციის) მიღება მას ჯერ არ შეუძლია, რადგან გადასახადების სამინისტრომ მისი საბანკო ანგარიში დაბლოკა. მიზეზი გადასახადების გადახდის დავალიანებაა. ამავდროულად, სახელმწიფოს „ვალი“ არა უშუალოდ მას აქვს, არამედ რადიო „თავისუფლების“ აზერბაიჯანულ რედაქციას, რომლისთვისაც ის მუშაობდა.

თუმცა, როგორც მისი ადვოკატი ფარიზ ნამაზლი აღნიშნავს, საგადასახადო დავალიანება და ანგარიშის დაბლოკვა ამგვარი კომპენსაციების გადახდასა და მიღებას, ნებისმიერ შემთხვევაში, ხელს ვერ შეუშლის.

ამჟამად ევროპის ადამიანის უფლებათა სასამართლოში ხადიჯა ისმაილოვას კიდევ რამდენიმე სარჩელი განიხილება.