სომხეთში, ვააგნ ჩახალიანი დააკავეს, რომელიც „ეროვნული ფასეულობებისთვის“ იბრძვის

სომხეთში, საზოგადოებრივი ორგანიზაცია „კამკის“ (ნება) ხელმძღვანელი, ვააგნ ჩახალიანი დააკავეს. ამის შესახებ ინფორმაცია, Facebook-ის საკუთარ გვერდზე, უფლებადამცველმა რუბენ მელიქიანმა გაავრცელა:

„რამდენიმე წუთის წინ, ცენტრალური სასამართლოს შენობასთან, პოლიციის საუკეთესო ტრადიციებში, ძალის გამოყენებით დააკავეს ვააგნ ჩახალიანი (სავარაუდოდ, კვლავ ადმინისტრაციული პატიმრობა). 24 საათის განმავლობაში, უკვე მესამედ“.

ზუსტი ინფორმაცია, თუ რასთან არის დაკავშირებული ვააგნ ჩახალიანის დაპატიმრება, ჯერჯერობით არ არსებობს. მისი მხარდამჭერი აქტივისტები ინციდენტს, მათ მიერ, რამდენიმე დღის წინ, პრეზიდენტის რეზიდენციასთან გამართულ საპროტესტო აქციას უკავშირებენ. ისინი ევროპის საბჭოს „ბავშვთა სექსუალური ექსპლუატაციისა და სექსუალური ხასიათის ძალადობისგან დაცვის“ კონვენციაზე ხელმოწერის საგანგებო მდგომარეობის დასრულებამდე გადადებას ითხოვდნენ.

სომხეთში, საგანგებო მდგომარეობა კორონავირუსი პანდემიის გამო, 16 მარტს გამოცხადდა. ახლა ის 13 ივნისამდე გახანგრძლივდა, რადგან ინფიცირებულთა რიცხვი იზრდება 

 რას ითხოვს ჩახალიანის ორგანიზაცია 

საზოგადოებრივი ორგანიზაცია „კამკის“ აქცია 12 მაისს გაიმართა. მისი აქტივისტები ითხოვდნენ, რომ ამ დოკუმენტის საჯარო განხილვა საგანგებო მდგომარეობის დასრულებამდე გადაედოთ.

„ვითხოვთ, რომ პრეზიდენტმა არმენ სარგსიანმა ხელი არ მოაწეროს ამ სადავო კონვენციის რატიფიცირებას და დრო მოგვცეს, რათა ეს საკითხი ქვეყანამ საგანგებო მდგომარეობიდან გამოსვლის შემდეგ განიხილოს საკუთარი მოქალაქეების მონაწილეობით. შემდეგ, თუკი გადაწყვეტენ მის რატიფიცირებას, დაე, გააკეთონ ეს“, – განაცხადა ვააგნ ჩახალიანმა.

 აქტივისტებს ეს კონვენცია სომხეთის მოსახლეობის წინააღმდეგ შეთქმულებად მიაჩნიათ.

„იმედი გვაქვს, რომ არმენ სარგსიანი არ მიიღებს მონაწილეობას ჩვენი ხალხის წინააღმდეგ შეთქმულებაში. ხელმოწერამდე, დაე, პრეზიდენტმა მოისმინოს ჩვენი ხმა, ხალხის ხმა და მხოლოდ ამის შემდეგ გადაწყვიტოს“, – განაცხადა საპროტესტო აქციის ერთ-ერთმა მონაწილემ.

სხვათა შორის, ვააგნ ჩახალიანის ორგანიზაციამ თავი იმით დაგვამახსოვრა, რომ 2019 წლის ნოემბერში, სტამბოლის კონვენციის მიღების წინააღმდეგ გამოვიდა.

• სომხეთში, საზოგადოებრივი ორგანიზაციის ხელმძღვანელი დააკავეს, რომელიც „ეროვნული ფასეულობებისთვის“ იბრძვის

მაშინ, აქტივისტები ასევე აცხადებდნენ, რომ კონვენცია საფრთხის ქვეშ აყენებს სომხეთის ტრადიციულ ღირებულებებს. 

„მოქალაქეები მზად არიან, ორგანიზება გაუწიონ დაუმორჩილებლობის აქციას სომხეთის სხვადასხვა ქალაქში. ჩვენ ვამბობთ, რომ ამის აუცილებლობა არ არსებობს, რადგან დოკუმენტი ჯერჯერობით რატიფიცირების ეტაპზე არ არის. და თუკი სომხეთის ეროვნული ასამბლეა არ მოუსმენს მოქალაქეთა ხმას და მათი აზრის წინააღმდეგ წავა, საპროტესტო აქცია ყველა ქალაქში გაიმართება“, – აცხადებდა მაშინ ჩახალიანი. 

კონვენციის შესახებ, რომლის წინააღმდეგაც ჩახალიანი გამოდის 

სომხეთის პარლამენტმა, 11 მაისს, მიიღო ევროპის საბჭოს კონვენცია „ბავშვთა სექსუალური ექსპლუატაციისა და სექსუალური ხასიათის ძალადობისგან დაცვის“ შესახებ. 79-მა დეპუტატმა გადაწყვეტილებას მხარი დაუჭირა, 12 – წინააღმდეგ წავიდა. კენჭისყრაში მონაწილეობა არ მიიღო ოპოზიციურმა ფრაქციამ, „გაბრწყინებულმა სომხეთმა“.

კონვენციის მოწინააღმდეგეთა აზრით, ის მიმართულია არა ბავშვთა დაცვისკენ, არამედ ბავშვთა გახრწნისკენ.

თავად დოკუმენტი ითვალისწინებს, რომ ბავშვების დაცვა უზრუნველყოფილი უნდა იყოს მათი სექსუალური ორიენტაციის მიუხედავად.

„კონვენციის ერთ-ერთი მუხლი განათლებას ეხება. ისინი მოუწოდებენ სახელმწიფოებს, თავიანთ ეროვნულ საგანმანათლებლო პროგრამებში ჩართონ საშუალებები, რათა ბავშვებმა შეიძინონ პირველადი უნარები სექსუალური ხელშეუხებლობის საფრთხის ამოსაცნობად და, ასევე, თავდაცვის უნარები“, – განმარტა სომხეთის პარლამენტის მმართველი ფრაქციის დეპუტატმა, ანნა კარაპეტიანმა.

მისი თქმით, ეს არ ნიშნავს, რომ დაწყებით და საშუალო სკოლებში ბავშვებს ასწავლიან, თუ რა არის სექსუალური ხელშეუხებლობა.

„ამოცანაა, მისცეს მოზარდებს ცოდნა იმის შესახებ, თუ როგორ უნდა ამოიცნონ მოზრდილთა ქმედებებში ნიშნები, რომ შესაძლოა მათგან საფრთხე მოდიოდეს და როგორ უნდა მოითხოვონ დახმარება მოურიდებლად, რათა ბავშვების სექსუალური ხელშეუხებლობა იყოს დაცული“.