ქართველი ჟურნალისტი გვიამბობს, თუ როგორ გაიტაცეს და გამოაძევეს უკრაინიდან

გუშინ, გვიან ღამით, ბორანმა სახელწოდებით “ვილნიუსი” უკრაინიდან დეპორტირებული 8 ქართველი ფოთის პორტში ჩამოიყვანა. მათ შორისაა თამაზ შავშიშვილი – ტელეკომპანია რუსთავი-2-ის ოპერატორი, რომელიც კიევში საქართველოს ექს-პრეზიდენტის, ამჟამად უკრაინელი ოპოზიციონერი პოლიტიკოსის სააკაშვილის მოღვაწეობას აშუქებდა.

თამაზ შავშიშვილს ორი დღე ეძებდნენ მისი ოჯახის წევრები და ტელეკომპანია რუსთავი2. იგი ამბობს, რომ კიევში ბინიდან გაიტაცეს, მთელი დღე თვალახვეული ატარებდნენ და ბოლოს გემზე აღმოჩნდა.

შავშიშვილის თქმით, მას უთხრეს, რომ სამი წლით დეპორტირებულია უკრაინიდან – “მაშინ, როცა ზუსტად ერთი კვირით ადრე უკრაინის ინფორმაციის სამინისტროსგან მივიღე ჟურნალისტის აკრედიტაცია, სადაც წერია, რომ უფლება მაქვს, უკრაინაში ვიმუშაო”, – განუცხადა შავშიშვილმა ჟურნალისტებს ფოთის პორტში, ბორანის დატოვების შემდეგ.

„დღის 11:00 საათი იყო, ავტომატებით შეიარაღებული 15-მდე სპეცრაზმელი შემოვიდა. სახეში ჩამარტყეს პისტოლეტი, ძირს დამაწვინეს და ფეხებს მირტყამდნენ. ვერ მივხვდი რა ხდებოდა – თვალები „სკოჩით“ ამიკრეს და გამომიყვანეს. ვერ ვხვდებოდი სად მივყავდი. შემდეგ შემაგდეს მიკროავტობუსის საბარგულში და გაურკვეველი მიმართულებით წამიყვანეს – ვერაფერს ვხედავდი, მაგრამ როგორც მივხვდი, მანქანა გამოცვალეს, სხვა მანქანაში გადამიყვანეს. ამის შემდეგ კიდევ ორჯერ გამოცვალეს მანქანა.

მერე ვერტმფრენების ხმა გავიგე, აეროპორტში. ვერტმფრენში ამიყვანეს. რაღაცეები წამიკითხეს, რომ სამი წელი ვეღარ შემოხვალ…

ვერტმფრენში ძირს დამაწვინეს და გაურკვეველი მიმართულებით გავფრინდით. დახლოებით ორი საათი ვიფრინეთ, სადღაც ჩავფრინდით, ისევ სპეცრაზმის მანქანა დამხვდა და აღმოვჩნდი გემზე. ეს მთელი დღე გრძელდებოდა, ვეღარ ვგრძნობდი ვერაფერს, უკვე სისხლი გამდიოდა სახიდან. ჩვეულებრივად მომიპარეს სახლიდან“, – განაცხადა ჟურნალისტებთან საუბრისას თამაზ შავშიშვილმა.

https://www.youtube.com/watch?v=PitQzL6tw20

ის ამბობს, რომ მთელი დღის განმავლობაში თვალებახვეული დაჰყავდათ და ხმაზე ატყობდა, რომ ხალხი მის გარშემო იცვლებოდა.

“ერთმანეთში ლაპარაკობდნენ მხოლოდ. რომ ვეკითხებოდი ვინ ხართ, რატომ, რისთვის, არავინ არაფერს მპასუხობდა”, – ამბობს შავშიშვილი.

მისივე თქმით, ბორანზე მასთან ერთად იმყოფებოდა უკრაინის სხვადასხვა ქალაქებიდან დეპორტირებული საქართველოს კიდევ ათამდე მოქალაქე.

საქართველოს საელჩო უკრაინაში ადასტურებს, რომ უკრაინის უსაფრთხოების სამსახურის ცნობით, საქართველოს რვა მოქალაქე იძულებით დააბრუნეს სამშობლოში, “საქმიანობისათვის, რომელიც ეწინააღმდეგება უკრაინის ეროვნული უსაფრთხოების უზრუნველყოფის ინტერესებს”.

როგორც საელჩო აცხადებს, სწორედ აღნიშნულით ხსნის უკრაინული მხარე დაბრუნებასთან დაკავშირებული ინფორმაციის ნაკლებ დეტალიზაციას.

გამოხმაურება

უკრაინიდან გამოძევებული საქართველოს რამდენიმე მოქალაქის თემაზე უკრაინაში საქართველოს საელჩომ წერილობითი განცხადება გაავრცელა. დიპლომატიური წარმომადგენლობის წერილში ნათქვამია, რომ 17 ნოემბერს, უკრაინიდან საქართველოს 8 მოქალაქის იძულების წესით დაბრუნების თაობაზე ინფორმაციის მიღებისთანავე, უკრაინის საგარეო საქმეთა სამინისტროს მიმართეს და გრძელდება კომუნიკაცია ასევე სხვა პასუხისმგებელ უწყებებთან.

საელჩო განმარტავს, რომ უკრაინული მხარე დეტალურ ინფორმაციას არ ავრცელებს, მიზეზად კი ქართველების უკრაინის ეროვნული უსაფრთხოების ინტერესების საწინააღმდეგო საქმიანობას ასახელებენ. განცხადებაში ნათქვამია, რომ უსაფრთხოების სამსახურის ინფორმაციით, მოქალაქეები იძულების წესით საქართველოში უსაფრთხოების სამსახურის, ეროვნული პოლიციის, სახელმწიფო საემიგრაციო და სასაზღვრო სამსახურის მიერ, ერთობლივად ჩატარებული ღონისძიებების შემდეგ დააბრუნეს.

სოციალურ ქსელში განცხადება გაავრცელა  საქართველოს მესამე პრეზიდენტმა მიხეილ სააკაშვილმა, რომელიც ახლა უკრაინაში ერთ-ერთ ოპოზიციურ პარტიას უდგას სათავეში.

სააკაშვილის განმარტებით, საქართველოს მოქალაქეების დაკავების ოპერაციას პირადად უკრაინის პრეზიდენტის დაცვის უფროსი ხელმძღვანელობდა.

„ახალ ძალთა მოძრაობის” ლიდერი წერს, რომ ქართველები კიევიდან ოდესაში სამი ვერტმფრენით ჩაიყვანეს, ბორანზე კი, სპეცრაზმის 50 მებრძოლი ახლდათ თან. მიხეილ სააკაშვილის განცხადებით, ოპერაციაში პეტრო პოროშენკოს დაცვის უფროსის მონაწილეობა უკანონო იყო.

“პოროშენკოს ეშინია პირადად ჩემი, იმიტომ, რომ ვერ გამომაცხადებს პუტინის აგენტად და მაქვს წარმატების ისტორია”, – წერს სააკაშვილი.