სომეხი კოლეგის მკვლელობისთვის მსჯავრდებული აზერბაიჯანელი ოფიცერი სამშობლოში წაახალისეს

აზერბაიჯანული ჯარის ოფიცერი, სკანდალურად ცნობილი 40 წლის რამილ საფაროვი პოდპოლკოვნიკის წოდებამდე დააწინაურეს. ინფორმაციის წყაროდ ახალ ფორმაში გამოწყობილი საფაროვის სოციალურ ქსელში გამოქვეყნებული ფოტო იქცა.

სიახლემ იმ ოფიცრის წოდებრივი დაწინაურების შესახებ, რომელსაც თავისი სომეხი კოლეგის ნაჯახით მკვლელობისთვის უნგრეთში სამუდამო პატიმრობა ჰქონდა მისჯილი, სოლიდური აზერბაიჯანული ვებგვერდებისა და მასობრივი საინფარმაციო საშუალებებისთვის, ძირითადად, შეუმჩნევლად ჩაიარა. საფაროვის ახალსამხრეებიანი ფოტოები უფრო მეტად დაბალრეიტინგულმა ვებგვერდებმა გააზიარეს; თანაც, მის პროფილზე გაკეთებული კომენტარების თანახმად, გაირკვა, რომ წოდება მას ოთხი თვის წინ მიანიჭეს, თუმცა რაღაც მიზეზების გამო, ამ სიახლის გახმაურება მხოლოდ ახლა გადაწყვიტეს.

საფაროვის წოდებრივი დაწინაურების შესახებ ინფორმაციას ფეისბუკის აზერბაიჯანულ სეგმენტში ურთერთსაპირისპირო კომენტარები მოჰყვა. გთავაზობთ რამდენიმე სახასიათო კომენტარს – როგორც წესი, ავტორების დასახელების გარეშე.

„რამილ, გილოცავ მორიგ სამხედრო წოდებას! დაე, ნუ შედრკება შენი ხელი!“

„რამილ საფაროვი აზერბაიჯანის სიამაყეა. თქვენ ეს წოდება დაიმსახურეთ. ალაჰი გფარავდეთ თქვენც და ჩვენს სამშობლოსაც“.

„გვინდა, რომ თავდაცვის მომავალ მინისტრად გიხილოთ“.

„საფაროვს გენერლობა! და ვისზე ნაკლებია. სიმაღლეც აქვს და წონაც. პირადიც და საზოგადოებრივიც“.

„ფრონტის წინა ხაზზე უნდა გაუშვან. ვნახოთ, იქ როგორ სიმამაცეს გამოიჩენს. ეს რა გმირობაა. ღამით, მალულად ვინმეს მოკვლა“.

„მოკლედ ვიტყვი. ეს სამარცხვინოა“.

„საფაროვს ვერ განვიკითხავ, მის ტყავში არ ვყოფილვარ, ჩემი ნათესავები არ დაუხოცავთ. მაგრამ მისი გმირად შერაცხვა ნამდვილად არ ღირს. არასწორ მაგალითს ვიძლევით“.