საქართველოს ახალი პრეზიდენტი უფრო ღარიბი იქნება. ინაუგურაციასა და ახალ რეზიდენციასთან დაკავშირებული დეტალები
მომავალ წელს საქართველოს პრეზიდენტის ადმინისტრაციას 3,8 მილიონი ლარი (1,4 მილიონ დოლარზე) მეტი აკლდება.
საქართველოს 2019 წლის ბიუჯეტის პროექტის თანახმად, სწორედ ამდენით მცირდება პრეზიდენტის ადმინისტრაციის დაფინანსება.
• ვინ არის სალომე ზურაბიშვილი, საქართველოს ახალი პრეზიდენტი?
• “ქართული ოცნების” კონსტიტუცია
• ქართული პოლიტიკის მთავარი კონფლიქტი: პრეზიდენტი VS არაფორმალური მმართველი
ეს არ არის ერთადერთი ცვლილება, რომელიც პრეზიდენტის ფინანსებს შეეხება. ადმინისტრაციიდან თანამშრომლების ნახევარზე მეტს გაათავისუფლებენ. თუკი ამჟამად იქ 140 ადამიანი მუშაობს, ახალი პრეზიდენტის, სალომე ზურაბიშვილის ადმინისტრაციაში 60 თანამშრომელი იქნება.
კიდევ ერთი სიახლე – მთლიანად უქმდება პრეზიდენტის ფონდი.
ყოველწლიურად პრეზიდენტის ფონდში ბიუჯეტიდან ირიცხებოდა 5 მილიონი ლარი (დაახლოებით 1,9 მილიონი დოლარი). ფონდიდან ფინანსდებოდა, მაგალითად, სტიპენდიები დასავლეთის უნივერსიტეტებში მყოფი ქართველი სტუდენტებისთვის. ამიერიდან, პრეზიდენტს სტუდენტების გახარების საშუალება აღარ ექნება.
როდის გაიმართება ინაუგურაცია
არჩეული პრეზიდენტის, სალომე ზურაბიშვილის ინაუგურაცია 16 დეკემბერს – არჩევნებიდან მესამე კვირადღეს გაიმართება, როგორც ამას კანონმდებლობა ითვალისწინებს.
თუმცა, ჯერჯერობით უცნობია ადგილი, სადაც ცერემონია ჩატარდება.
რუსთავი 2-ის ინფორმაციით, ინაუგურაცია შესაძლოა თელავში, მეფე ერეკლეს სასახლეში გაიმართოს. თუ ასე მოხდა, ეს იქნება პირველი შემთხვევა, როდესაც ინაუგურაცია დედაქალაქში არ ჩატარდება.
სალომე ზურაბიშვილის წინამორბედებმა, გიორგი მარგველაშვილმა და ასევე საქართველოს სხვა პრეზიდენტებმა, ფიცი თბილისში, პარლამენტის შენობასთან დადეს. იქვე ეზოში იმართებოდა ხოლმე ახლადარჩეული პრეზიდენტისთვის უფლებამოსილების გადაცემის ოფიციალური ცერემონიაც.
პირველი ვარიანტი – თბილისში, ავლაბარში მდებარე მოქმედი პრეზიდენტის რეზიდენცია.
მეორე ვარიანტი – თბილისში, საქართველოს პარლამენტის ეზოში ცერემონიის გამართვა, სადაც 2013 წელს საქართველოს მეოთხე პრეზიდენტის, გიორგი მარგველაშვილის ინაუგურაცია ჩატარდა.
1991 წელს საქართველოს პირველი პრეზიდენტი გახდა პროფესიით ფილოლოგი და ანტისაბჭოთა დისიდენტი ზვიად გამსახურია. ერთი წლის შემდეგ, 1992 წელს საქართველოში სამხედრო გადატრიალება მოხდა, რომლის შედეგადაც გამსახურდია დაამხეს და ქვეყნიდან გააძევეს. ფოტო: არქივი
საქართველოს მეორე პრეზიდენტი 1995 წელს სსრკ-ს ყოფილი საგარეო საქმეთა მინისტრი ედუარდ შევარდნაძე გახდა. ის ქვეყანას 11 წელი მართავდა და იძულებული გახდა გადამდგარიყო 2003 წლის "ვარდების რევოლუციის" შემდეგ. ამ ფოტოზე მეორე პრეზიდენტ ედუარდ შევარდნაძის ინაუგურაციაა. ის მეორე ვადით აირჩიეს. 2000 წელი, 30 აპრილი. REUTERS
საქართველოს მეორე პრეზიდენტის ედუარდ შევარდნაძის ინაუგურაცია. შევარდნაძე მეორე ვადით აირჩიეს, მან არჩევნებში ხმების 79.04 % მიიღო. ეს იყო რიგით მეორე საპრეზიდენტო არჩევნები 1995 წელს საქართველოს კონსტიტუციის მიღების შემდგომ. ფოტო: 2000 წელი, 30 აპრილი. REUTERS
საქართველოს მესამე პრეზიდენტი 2003 წელს მიხეილ სააკაშვილი გახდა. სააკაშვილის ინაუგურაცია 2004 წლის 25 იანვარს, "ვარდების რევოლუციიდან" ორი თვის თავზე ჩატარდა. 4 იანვრის საპრეზიდენტო არჩევნებზე სააკაშვილმა ხმების 96.24% მიიღო.
ვიდრე 25 იანვარს პარლამენტის შენობასთან ინაუგურაციის მთავარი ღონისძიება ჩატარდებოდა, წინა დღით სააკაშვილი გელათში ჩავიდა და სასულიერო ფიცი დადო: „ყველა საქმე გვერდზე უნდა გადავდოთ, გავერთიანდეთ და აღვადგინოთ საქართველოს ტერიტორიული მთლიანობა. ეს არის ჩემი ცხოვრების მიზანი. ჩვენი ერი უკეთეს მომავალს იმსახურებს“, - განაცხადა სააკაშვილმა. ფოტო: გაზეთი "24 საათი"
2004 წლის 25 იანვარს მიხეილ სააკაშვილის ინაუგურაციას აშშ-ის სახელმწიფო მდივანი კოლინ პაუელი დაესწრო. თბილისიდან პაუელი მოსკოვში გაემგზავრა. წასვლის წინ მან თქვა, რომ კრიმლში მისი ერთ-ერთი მთავარი გზავნილი იქნება ის, რომ მოსკოვმა გაიყვანოს საქართველოდან თავისი სამხედრო ბაზები.
ფოტო: REUTERS/ სერგეი კარპუხინი
მიხეილ სააკაშვილის ინაუგურაცია 2008 წლის 20 იანვარს. რიგგარეშე საპრეზიდენტო არჩევნებზე 4 იანვარს სააკაშვილმა გაცილებით ნაკლები ხმა - 53.47% მიიღო. ეს ყველაზე დაბალი მაჩვენებელია საპრზიდენტო არჩევნების ისტორიაში. ფოტო: მესამე პრეზიდენტის მიხეილ სააკაშვილის ინაუგურაცია მეორე ვადით პრეზიდენტად არჩევის შემდეგ. REUTERS/დავით მძინარიშვილი
სააკაშვილი პირველი პრეზიდენტია საქართველოს ისტორიაში, რომელიც არჩევნების გზით შეიცვალა. თუმცა, ხელისუფლების ეს გადაცემაც არ ყოფილა კონსტრუქციული და მეგობრული. სააკაშვილმა ქვეყანა 2013 წელს დატოვა, ისე რომ არ დასწრებია მეოთხე პრეზიდნტის, გიორგი მარგველაშვილის ინაუგურაციას. მის წინააღმდეგ საქართველოში რამდენიმე სისხლის სამართლის საქმეა აღძრული. მას ქვეყანაში დაბრუნების შემთხვევაში დაკავება ემუქრება. ფოტო: სააკაშვილი სიტყვით მიმართავს პარლამენტის წინ შეკრებილებს თავის ინაუგურაციაზე. REUTERS/დავით მძინარიშვილი
ფოტო: ასე გამოიყურებოდა პარლამენტის მიმდებარე ტერიტორია სააკაშვილის ინაუგურაციაზე 2008 წელს. ინაუგურაციაზე ყველა მსურველს შეეძლო დასწრება. REUTERS/დავით მძინარიშვილი
ინაუგურაციის პარალელურად, იმავე დღის ოპოზიციამ იპოდრომზე ფართომასშტაბიანი მიტინგი გამართა. ოპოზიცია არ აღიარებდა არჩევნების შედეგებს. მათი თქმით, არჩევნები გაყალბდა და სინამდვილეში ოპოზიციის კანდიდატმა ლევან გაჩეჩილაძემ გაიმარჯვა. აქციაზე სააკაშვილს "დე ფაქტო" და "ყალბ" პრეიდენტად მოიხსენიებდნენ. სხვათაშორის, ამ აქციაში საქართველოს ამჟამინდელი პრეზიდენტი, სალომე ზურაბიშვილიც მონაწილეობდა. REUTERS/ სერგო ბელოუსოვი
საქართველოს მეოთხე პრეზიდენტი 2013 წელს გიორგი მარგველაშვილი გახდა. პროფესიით ფილოსოფოსი მარგველაშვილი, რომელსაც მწირი პოლიტიკური გამოცდილება ჰქონდა, საპრეზიდენტო კანდიდატად თავად ბიძინა ივანიშვილმა წამოაყენა. თუმცა, ივანიშვილის და მარგველაშვილის ურთიერთობა ინაუგურაციისთანავე გაფუჭდა. მარგველაშვილმა ივანიშვილის ნების საწინააღმდეგოდ თავის სამუშაო რეზიდენციად სააკაშვილის მიერ აშენებული ავლაბრის სასახლე აირჩია, რითაც საბოლოოდ გაანაწყენა ქვეყნის ფაქტობრივი მმართველი ოლიგარქი. ამ ხუთი წლის განმავლობაში ივანიშვილმა არაერთხელ აღნიშნა, რომ მარგველაშვილი მისი მთავარი იმედგაცრუებაა. ფოტო: გიორგი მარგველაშვილის ინაუგურაცია. თბილისი, პარლამენტის შენობა. 17 ნოემბერი, 2013 წელი. REUTERS/დავით მძინარიშვილი
გიორგი მარგველაშვილი საქართველოს ისტორიაში პირველი პრეზიდენტია, რომელმაც საკუთარი ნებით თქვა უარი მეორე ვადით კენჭისყრაზე. ფოტო: პარლამენტის ეზო გიორგი მარგველაშვილის ინაუგურაციის დროს. თბილისი, 17 ნოემბერი, 2013 წელი. REUTERS/დავით მძინარიშვილი
ფოტო: გიორგი მარგველაშვილის ინაუგურაცია. თბილისი, 17 ნოემბერი, 2013 წელი. REUTERS/დავით მძინარიშვილი
სად იმუშავებს პრეზიდენტი
საქართველოს ახალი პრეზიდენტის რეზიდენციაც სხვა ადგილას იქნება.
ზურაბიშვილმა უარი თქვა, იმუშაოს პრეზიდენტის ავლაბრის რეზიდენციაში, რომელიც მესამე პრეზიდენტის, მიხეილ სააკაშვილის დროს აშენდა.
სალომე ზურაბიშვილი თბილისში, ათონელის ქუჩაზე მდებარე რეზიდენციაში იმუშავებს. შენობაში, რომელშიც მეხუთე პრეზიდენტის ადმინისტრაცია უნდა განთავსდეს, ამჟამად რემონტი მიმდინარეობს, ქუჩაზე კი – საგზაო სამუშაოები.
საერთოდ, „ქართული ოცნების“ ხელმძღვანელი უკვე დიდი ხანია „ებრძვის“ ავლაბრის რეზიდენციას.
ავლაბარში მდებარე პრეზიდენტის რეზიდენცია ერთ-ერთი კონკრეტული მიზეზია დაძაბულობის, რომელიც ყოფილ პრემიერ-მინისტრს, ქვეყნის პრაქტიკულ მმართველ ბიძინა ივანიშვილსა და პრეზიდენტ მარგველაშვილს შორის წარმოიქმნა.
თავდაპირველი უარის მიუხედავად, პრეზიდენტად არჩევის შემდეგ, გიორგი მარგველაშვილმა ავლაბრის რეზიდენციაში გადასვლა გადაწყვიტა და ამით საბოლოოდ განაწყო თავის წინააღმდეგ ივანიშვილი.
ბიძინა ივანიშვილისთვის, რომლისთვისაც მიუღებელია არა მხოლოდ პირადად სააკაშვილი, ასევე, მის მიერ აგებული შენობებიც, მარგველაშვილის გადაწყვეტილება ღალატის ტოლფასი იყო.
ზურაბიშვილი ნამდვილად არ არის კონფლიქტურად განწყობილი ყოფილი პრემიერისადმი, რომელიც ახლაც კულისებიდან მართავს ქვეყანას.
ზურაბიშვილი სტუმრად მარგველაშვილთან
თუმცა, სალომე ზურაბიშვილს ავლაბრის რეზიდენციის მონახულება ერთხელ მაინც მოუწია.
საქართველოს მოქმედი პრეზიდენტი გიორგი მარგველაშვილი არჩეულ პრეზიდენტ სალომე ზურაბიშვილს 3 დეკემბერს შეხვდა, როდესაც ის ავლაბრის რეზიდენციაში მივიდა.
როგორც სალომე ზურაბიშვილმა განაცხადა, შეხვედრაზე ინაუგურაციასთან დაკავშირებული კითხვები და საქმეთა გადაბარების საკითხები განიხილეს.
უნდა აღინიშნოს, რომ ეს 18-წუთიანი შეხვედრა ნამდვილად ისტორიული იყო – საქართველოს დამოუკიდებლობის 27 წლის განმავლობაში არ მომხდარა, რომ ახლად არჩეული პრეზიდენტი და მისი წინამორბედი ერთმანეთს კონსტრუქციულ და სამუშაო გარემოში შეხვედროდნენ.
შეხვედრის გამართვის ინიციატივით მარგველაშვილი არჩევნების მეორე ტურის შედეგების გამოცხადებისთანავე გამოვიდა.
