რუსეთის ხელისუფლება "ინგუშეთის კრიზისის" ძალისმიერი გზით მოგვარებას ცდილობს

„ნოვაია გაზეტას“ მასალის მიხედვით

ჩრდილოეთ კავკასიაში მდებარე რუსეთის რესპუბლიკა ინგუშეთში მეზობელ ჩეჩნეთთან ადმინისტრაციული საზღვრის გადაწევასთან დაკავშირებული საპროტესტო მოძრაობის ლიდერების ჩხრეკა და დაკავება მიმდინარეობს. დაახლოებით 40 ადამიანია დაკავებული, ოთხს სისხლის სამართლის მუხლების მიხედვით ბრალდებები აქვს წარდგენილი.

15 აპრილს ინგუშეთის ქალაქ ქარაბულაკში რუსმა სამართალდამცავებმა უფლებადამცავი მოძრაობა „მარშის“ თავმჯდომარის მაგომედ მუცოლგოვის სახლს ალყა შემოარტყეს. ორგანიზაციის ოფისში ჩხრეკა ჩატარდა. მამედ მუცოლგოვი თავის ძმასთან და თანამოაზრესთან რუსლან მუცოლგოვთან ერთად მონაწილეობდა ჩეჩნეთთან საზღვრის შეცვლის გამო გამართულ ყველა საპროტესტო მიტინგში, რომლებმაც 2018 წლის შემოდგომიდან რესპუბლიკა მოიცვა.

•ჩეჩნეთმა და ინგუშეთმა საზღვარი გაივლეს. ჩეჩნეთი უკმაყოფილოა

ჩხრეკა დაახლოებით ხუთ საათს გრძელდებოდა. „ამოიღეს საბუთები, წაიღეს ორგანიზაციის ბეჭედი, ტელეფონები. ასევე წაიღეს ვიდეოკამერები, რომლებიც სახლისა და ოფისის გარშემო იდგა“, – პოლიციის ოპერაციის თაობაზე კომენტარი თავად მუცოლგოვმა გააკეთა. უფლებადამცველისთვის არავითარი ბრალდება არ წარუდგენიათ.

ინგუშეთში სახლების ჩხრეკა და საპროტესტო მოძრაობის ლიდერების, ასევე მიტინგების აქტიური მონაწილეების დაპატიმრება 2 აპრილიდან მიმდინარეობს. დაკავებულია დაახლოებით ორმოცი ადამიანი. უმეტესობას ათი დღე-ღამით ადმინისტრაციული პატიმრობა გაუფორმეს, სხვებს 50-დან 250 ათას რუბლამდე [დაახლოებით $800-4000] ოდენობის ჯარიმა.

იყო პატიმრობის ან ჯარიმის გასაჩივრების რამდენიმე ათეული მცდელობა, თუმცა სასამართლოს არც ერთი მათგანი არ დაუკმაყოფილებია. პროტესტის ოთხი ლიდერი – აჰმედ ბარახოევი, მუსა მალსაგოვი, ბარაჰ ჩამურზიევი და ბაგაუდინ ხაუტიეევი – სამ აპრილს ადმინისტრაციული სასჯელის მოსახდელად მეზობელ ყაბარდო-ბალყარეთის რესპუბლიკაში გააგზავნეს. მათ  ხელისუფლების წარმომადგენლების წინააღმდეგ ძალადობასა და მასობრივი არეულობისკენ მოწოდებასა და მონაწილეობაში დასდეს ბრალი.

ინგუშეთში დემონსტრაციები გრძელდება გასული წლის შემოდგომიდან, როდესაც ინგუშეთისა და ჩეჩნეთის ხელმძღვანელობის მიერ რესპუბლიკებს შორის ადმინისტრაციული საზღვრის გამყარებასთან დაკავშირებით შეთანხმების ხელმოწერის შესახებ გახდა ცნობილი. ეს ყოველგვარი გახმაურების გარეშე, იმ ეჭვების ფონზე მოხდა, რომ ჩეჩნეთს მეტი ტერიტორია დარჩებოდა, ვიდრე ინგუშეთს.

ინგუშეთი ამას ორი კვირა აპროტესტებდა, თუმცა შეთანხმების კანონიერება რუსეთის საკონსტიტუციო სასასამართლომაც დაადასტურა. მაშინ დემონსტრანტები სახლებში დაიშალნენ, თუმცა მარტის შუა რიცხვებში პროტესტი მას შემდეგ განახლდა, რაც  ერთ-ერთი ადგილობრივი კანონიდან უმნიშვნელოვანესი აბზაცი – ადმინისტრაციული საზღვრების რესპუბლიკური რეფერენდუმის გზით დადგენის თაობაზე – გაქრა; როგორც მოგვიანებით ხელისუფლებამ განმარტა – „შემთხვევით“.

პროტესტების დროს სამართალდამცავებთან შეხლა-შემოხლა მოხდა. ისინი ათი დაზარალებული თანამშრომლის შესახებ აცხადებენ.

დღესდღეობით ინგუშეთის ყველა მსხვილი დასახლებული პუნქტი რუსეთის შინაგან საქმეთა სამინისტროს შინაგანი ჯარის გაძლიერებული პატრულების მიერ კონტროლდება.