ვლადიმირ პუტინმა "გამალებული შეიარაღების" ახალი ეტაპი წამოიწყო

რუსეთის პრეზიდენტი ვლადიმირ პუტინი ფედერალური კრების მიმართ ყოველწლიური მიმართვით გამოვიდა. პუტინმა თავისი გამოსვლის თითქმის ნახევარი ახალ რუსულ შეიარაღებაზე ლაპარაკს დაუთმო. შედარებისთვის, ეკონომიკისა და მრეწველობის შესახებ პრეზიდენტმა სამჯერ ნაკლები ილაპარაკა.

პუტინი 43 წუთს ლაპარაკობდა იარაღის ახლი სახეობების შესახებ, რომლებსაც რუსეთი ახლა ფლობს: „არაფერი მსგავსი მსოფლიოში ჯერ არავის არ აქვს. ოდესმე ექნებათ, მაგრამ მანამდე ჩვენი ბიჭები რამეს მოიფიქრებენ“, – განაცხადა მან.

რუსეთის პრეზიდენტი და ამავდროულად პრეზიდენტობის კანდიდატი ექვსი ახალი სისტემური იარაღის შესახებ მოჰყვა, მათ შორის – ბირთვულის. კერძოდ, მან ახალი ბალისტიკური რაკეტის შექმნის შესახებ განაცხადა.

პუტინი თავის გამოსვლისას დაბეჯითებით ამტკიცებდა, რომ ახალი რუსული შეიარაღების ასეთი დაწვრილებითი პრეზენტაცია – დასავლეთისადმი მუქარა კი არა, პირიქით – მოლაპარაკებებისკენ მოწოდებაა: „ჩვენ არავინ გვისმენდა. ჩვენთან არსებითად საუბარი არავის სურდა. ახლა მოგვისმინეთ“.

მიუხედავად ამისა, მისი სიტყვები არცთუ მშვიდობიანად ჟღერდა: „რუსეთის შეკავება ვერ შეძლეს!“, „იმედია, რაც დღეს ითქვა, ნებისმიერ პოტენციურ აგრესორს გამოაფხიზლებს“.

პუტინის სიტყვაზე აშშ-ს თავდაცვის სამინისტრომ მოხდინა რეაგირება. მისმა წარმომადგენელმა დანა უაითმა ჟურნალისტებს უთხრა, რომ უწყებაში პუტინის სიტყვები არ უკვირთ. ამერიკელ ხალხს შეუძლია დარწმუნებული იყოს: “ჩვენ ყველაფრისთვის მზად ვართ!“, – განაცხადა მან.

რუსეთის პრეზიდენტის განცხადებაზე ამერიკულმა გაზეთებმაც გააკეთეს კომენტარი. The Washington Post-მა დაწერა, რომ „პუტინის სიტყვა შეიძლება ვაშინგტონისადმი გზავნილად განვიხილოთ“, ხოლო The New York Times-ის ჟურნალისტებს მიაჩნიათ, რომ „პუტინი ცივი ომის დროის ენით“ ლაპარაკობდა.

რუსეთის სოციალური ქსელების მომხმარებლები გაცილებით სკეპტიკურები არიან. პრეზიდენტს თავისი გამოსვლა დასრულებული არ ჰქონდა, რომ მათ უკვე გამოაქვეყნეს იმის დამადასტურებელი საბუთები, რომ პრეზიდენტის სიტყვის თანმხლები ინფოგრაფიკა ერთ შემთხვევაში 2011 წელს იყო დამზადებული, მეორე კი – სსრკ-ში, 80-იან წლებში.

ავტორიტეტული რუსი სამხედრო ექსპერტი ალექსანდრ ჰოლცი მიიჩნევს, რომ რუსეთის პრეზიდენტის მიერ ახალი შეიარაღების შემუშავების თაობაზე გაკეთებული განცხადება შემოწმებას საჭიროებს. მაგალითად, მისი მონაცემების მიხედვით, ახალი ბალისტიკური რაკეტა, რომლის შესახებაც პუტინი საუბრობდა, არქტიკაში ორჯერ გამოიცადა. გამოცდა ორჯერვე კრახით დასრულდა.