საქართველოს პრემიერმა აფგან მუხტარლის ოჯახს საქართველოს მოქალაქეობა შესთავაზა და უარი მიიღო

საქართველოს პრემიერ-მინისტრმა გიორგი კვირიკაშვილმა ქვეყნის პრეზიდენტს თბილისიდან გატაცებული აზერბაიჯანელი ჟურნალისტის აფგან მუხტარლის ოჯახისთვის საქართველოს მოქალაქეობის უმოკლეს ვადაში მინიჭების თხოვნით მიმართა. თუმცა მუხტარლის ცოლმა ლეილა მუსტაფაევამ ამ შეთავაზებაზე უარი განაცხადა.

მუსტაფაევას თქმით, ის საქართველოში ცხოვრების უფლების მიღებას ითხოვდა და ამაზე უარი უთხრეს. მოქალაქეობის მიღება კი მისთვის კატეგორიულად მიუღებელია.

“ეს ნიშნავს, რომ ჩემი ქვეყნის მოქალაქეობაზე უარი უნდა ვთქვა, რაც არ მინდა. ერთი წლის წინ ცხოვრების უფლება მოვითხოვე და მაშინ მიპასუხეს, რომ თქვენ სახიფათო საქმეებით ხარ დაკავებულიო და უარი მითხრეს. ახლა შეიცვალა რამე? აღარ ვარ საშიში? დიდი თხოვნა მაქვს, რომ ჟურნალისტის გატაცების ამბიდან შოუს ნუ დადგამენ, უმჯობესია სამართალდამცავებმა საქმე სათანადოდ გამოიძიონ,”- თქვა მუსტაფაევამ.

JAMnews-თან ინტერვიუში ლეილა მუსტაფაევამ განაცხადა, რომ ის ესაუბრა საქართველოს შინაგან საქმეთა მინისტრს და პირადად განუცხადა უარი მოქალაქეობაზე. მათ მიმდინარე გამოძიების შესახებ და მუხტარლის ოჯახის უსაფრთხოებაზეც ისაუბრეს.

“მან [შს მინისტრმა] თქვა, რომ ყველაფერს გააკეთებენ ჩვენი უსაფრთხოებისთვის. თუკი საჭიროა, მიიღებენ დამატებით ზომებს – გამოგვიყოფენ დაცვას, კამერებს და ა.შ.

რაც შეეხება გამოძიებას, გუშინდელ დღემდე ჩვენ არ გვქონდა არანაირი ინფორმაცია, თუ რა სტადიაშია გამოძიება. მაგრამ შინაგან საქმეთა მინისტრმა თქვა, რომ მათ უკვე დაასრულეს სათვალთვალო კამერების ჩანაწერების ამოღების პროცედურა”, – აღნიშნა მუსტაფაევამ.

ის ამჟამად თბილისში იმყოფებa და გარკვეული დროის განმავლობაში აქ დარჩენას გეგმავs. ლეილა მუსტაფაევა ამბობს, რომ სანამ მისი ქმრის საქმეზე გამოძიება მიმდინარეობს, თბილისში ცხოვრება უსაფრთხოა.

პრემიერ-მინისტრმა კვირიკაშვილმა საგანგებო განცხადება 3 ივნისს გაავრცელა. მან აღნიშნა, რომ მუხტარლის საქმესთან დაკავშირებით შექმნილი ვითარება აზიანებს ქვეყნის იმიჯს. მისი თქმით, სახელმწიფოს ინტერესშია, გამოძიება გამჭვირვალედ წარიმართოს.

«ჩვენ საკმაოდ რთული გზა გავიარეთ და დღეს ვართ სამართლებრივი, დემოკრატიული ქვეყანა, რომელიც მიისწრაფის ევროპული და ევროატლანტიკური სტრუქტურებისკენ. ჩვენ არაფრის ფასად დავთმობთ ამ მონაპოვარს და კვლავ გავაკეთებთ ყველაფერს, რათა ჩვენს ქვეყანაში თითოეული ადამიანის უფლებები სრულად იყოს დაცული მიუხედავად იმისა, რომელი ქვეყნის მოქალაქეა იგი ან როგორი პოლიტიკური შეხედულებები აქვს,” – განაცხადა პრემიერმა.

მისი თქმით,  სურვილის შემთხვევაში, იუსტიციის სამინისტრო  მაქსიმალურად შემჭიდროებულ ვადებში ყველანაირ სამართლებრივი პროცედურებს მოაგვარებს, რათა მუხტარლის ოჯახმა საქართველოს მოქალაქეობა მიიღოს.

ჟურნალისტი აფგან მუხტარლი აზერბაიჯანიდან 2014 წელს გაემგზავრა. ის აზერბაიჯანის ხელისუფლების მხრიდან ხშირად განიცდიდა სხვადასხვა სახის ზეწოლას. მისი რამდენიმე სარჩელი ევროპის ადამიანის უფლებათა სასამართლოში კომუნიკაციის პროცესშია. ბოლო დროს ის თანამშრომლობდა საერთაშორისო მედიასა და ორგანიზაციებთან – IWPR და Meydan.tv

აზერბაიჯანელი ჟურნალისტი აფგან მუხტარლი თბილისიდან 2017 წლის 29 მაისს გაუჩნარდა. მოგვიანებით გაირკვა, რომ ის აზერბაიჯანელი სამართალდამცავების ხელში იყო. თავად მუხტარლის თქმით, ის საქართველოდან ადგილობრივი სპეცსამსახურების თანამშრომლებმა გაიტაცეს, ტომარა ჩამოაცვეს და აზერბაიჯანელ სამართალდამცავებს გადასცეს. მუხტარლის აზერბაიჯანის სასამართლომ 3-თვიანი წინასწარი პატიმრობა შეუფარდა საზღვრის უკანონო კვეთისა და კონტრაბანდის ბრალდებით. მუხტარლის თქმით, მას საზღვარზე 10 ათასი ევრო ჩაუდეს.