"პაპუაშვილის პოსტიდან ერთ საათში ზუკას თავს დაესხნენ" - სამოქალაქო აქტივისტზე თავდასხმის დეტალები

ზუკა ბერძენიშვილის ცემა პაპუაშვილის განცხადება

დღეს დილით საკუთარ სახლთან დახვდნენ და სასტიკას სცემეს სამოქალაქო აქტივისტს ზუკა ბერძენიშვილს.

როგორც მისი მეგობარი სალომე ნიკოლეიშვილი ფეისბუკზე წერს, შემთხვევა დილის 11 საათისთვის მოხდა, ზუსტად ერთ საათში, მას შემდეგ, რაც პარლამენტის თავმჯდომარემ, შალვა პაპუაშვილმა გამოაქვეყნა ფეისბუკზე პოსტი, რომელიც ზუკა ბერძენიშვილს ეხებოდა.

“შალვა პაპუასის პოსტიდან ერთ საათში რომ ზუკას ჩვენს სახლთან დახვდნენ “აღშფოთებული მოქალაქეები” და ფიზიკურად გაუსწორდნენ, ეს ალბათ უბრალოდ დამთხვევაა,” – ირონიულას წერს ნიკოლეიშვილი.

პარლამენტის თავმჯდომარემ, შალვა პაპუაშვილმა აღნიშნულ ინცინდენტამდე ერთი საათით ადხრე, 09.15 წუთზე მართლაც გამოაქვეყნა პოსტი, სადაც იგი კონკრეტულ ჟურნალისტებსა და აქტივისტებს ” ორგანიზებულ და პოლიტიკურად მოტივირებულ ტერორის კამპანიაში” ადანაშაულებს.

პაპუაშვილი თავის პოსტში “ჯემნიუსს” და “ჯემნიუსის” თანამშრომელსაც ახსენებს. “ჯემნიუსმა” არაერთხელ განმარტა, რომ პოსტი, რომელსაც პაპუაშვილი “კეფაში ტყვიის მუქარას” უწოდებს, იყო სტენსილი ვახუშტის ხიდზე და არა “ჯემნიუსის” მიერ გაკეთებული წარწერა. გარდა ამისა, აღნიშნული წარწერა იყო სხვა შინაარსის მატარებელი, თუმცა “ქართული ოცნების” პროპაგანდისტული მანქანა კვლავ აგრძელებს დამოუკიდებელ მედიაზე თავდასხმას. პარლამენტის თავმჯდომარის მიერ დაწერილი ფეისბუკ-პოსტის შემდეგ აქტივისტ ზუკა ბერძენიშვილზე თავდასხმა გვაფიქრებინებს, რომ შესაძლოა, საფრთხე ემუქრებოდეს ასევე ჩვენს თანაშრომლებსაც. “ჯემნიუსი” სრულ პასუხისმგებლობას ამასთან დაკავშირებით აკისრებს ხელისუფლებას.

ნაცემი ზუკა ბერძენიშვილის ფოტოს მისი მეგობარი, სალომე ნიკოლეიშვილი აქვეყნებს, რომელიც ასევე მოხსენიებულია პაპუაშვილის პოსტში.

“სამნი იყვნენ, მანქანით ელოდებოდნენ, ზურგიდან მიეპარნენ და მერე გაიქცნენ,” – წერს ნიკოლეიშვილი.

ზუკა ბერძენიშვილი რამდენიმე დღის წინ წერდა, ჩასაფრების შესახებ, რომელიც მას სოფელში მოუწყეს, თუმცა მაშინ თავის დაღწევა მოახერხა.

მოგვიანებით ბერძენიშვილმა თავის ფეისბუკის გვერდზე დაწერა, რომ თავდამსხმელთაგან ერთ-ერთ თავში სროლითაც დაემუქრა.

“შენ თუ თავში არ გესროლოო მეძახდა სამიდან ერთი როცა დაგდებულს მირტყამდა. არ ყოფნიდა რასაც შვებოდა და ზევიდან ფანტაზირებდა. ვაი თქვენს პატრონს ბიჯებო. ყველა შენახული მყავხართ”,– წერს ზუკა ბერძენიშვილი.

პარლამენტის თავმჯდომარის პოსტი ასეთი შინაარსისაა:

“ცხადია, რომ მედიისთვის დადგმული ეს ვითომ „აღშფოთებული მოქალაქის“ სცენები, სინამდვილეში, ორგანიზებული და პოლიტიკურად მოტივირებული ტერორის კამპანიაა, რომელიც ევროპის სახელით მიმდინარეობს, – წერს პაპუაშვილი სოციალურ ქსელში.

როგორც ის აღნიშნავს, დონორები, მათ მიერ დაფინანსებული ორგანიზაციების პოლიტიკური ექსტრემიზმის წაყრუებით, ტერორის ნორმალიზებას ახდენენ.

ძალადობის და რეპრესიების ორი თვე. რა ხდებოდა"აგენტების კანონის" ინიციირებიდან მის მიღებამდე პერიოდში – საიას ანგარიში

სამსახურიდან გაგდებით ემუქრებოდნენ საჯარო მოხელეებს. აიძულებდნენ, მოეწონებინათ კახა კალაძის პოსტები

„მხოლოდ ბოლო რამდენიმე დღეში ევროკავშირის ბიუჯეტიდან დაფინანსებული სამი არასამთავრობო ორგანიზაციის თანამშრომლები:

– დაემუქრნენ პარლამენტის წევრებს “კეფაში ტყვიით” (ლევან დათუნაშვილი, “ჯემნიუსი”)

– ურეკავდნენ პარლამენტის წევრებს მუქარით და შეურაცხყოფით (სალომე ნიკოლაიშვილი, ზუკა ბერძენიშვილი, “სირცხვილია”)

– საჯარო სივრცეში თავს დაესხნენ და შეურაცხოფა მიაყენეს ოჯახთან ერთად მყოფ პარლამენტის წევრს (მარიამ წიწიკაშვილი, “გრასი” / “ფაქტჩეკი”).

ამ პოსტით პაპუაშვილი თბილისის აეროპორტში 10 ივნისს მომხდარ შემთხვევას გამოეხმაურა – თბილისის საერთაშორისო აეროპორტში მოქალაქე მარიამ წიწიკაშვილმა “ოცნების” დეპუტატს ვიქტორ ჯაფარიძეს საჯაროდ შენიშვნა მისცა იმის გამო, რომ დეპუტატმა რუსულ კანონს დაუჭირა მხარი. წიწიკაშვილმა დეპუტატი ქვეყნის ღალატში დაადანაშაულა. შედეგად წიწიკაშვილი და მისი თანმხლები პირი რეისიდან მოხსნეს და წვრილმანი ხულიგნობის გამო დააკავეს. დაკავებულები მოგვიანებით გამოუშვეს. ეს პირველი შემთხვევა არ იყო, როდესაც “აგენტების კანონის” მიღების შემდეგ მოქალაქეები საჯარო სივრცეში “მოღალატეებს” და “მონებს” უწოდებენ იმ დეპუტატებს, რომლებმაც მხარი დაუჭირეს კანონს.

უკვე ორ თვეზე მეტია „აგენტების კანონის“ მოწინააღმდეგე ადამიანების მიმართ სატელეფონო გინების, მუქარის, ქუჩაში დახვედრისა და ცემის, სახლთან თუ ოფისებთან შეურაცხმყოფელი შინაარსის წარწერების დატოვების პირველი ტალღა გრძელდება.

ერთ-ერთი ბოლო შემთხვევა 7 ივნისს მოხდა, როდესაც თბილისის სახელმწიფო უნივერსიტეტის პირველ კორპუსთან რამდენიმე პირი თავს დაესხა და სცემა აქტივისტს და სტუდენტური მოძრაობის ერთ-ერთ ლიდერს, ნიკო მანაგაძეს.

მანამდე დღისით, ავტრობუსის გაჩერებასთან თავს დაესხნენ “გირჩის” წევრს ცოტნე კობერიძეს.

გამოძიებას ამ დრომდე არ ჰყავს იდენტიფიცირებული აქტივისტებზე თავდამსხმელი არც ერთი პირი მაშინ, როდესაც მთელ რიგ ვიდეობში კარგად ჩანს თავდამსხმელთა სახეები.

ძალადობის თემაზე სპეციალური ანგარიში გამოაქვეყნა საია-მ. ის რომ მოქალაქეებზე თავდასხმები სახელმწიფოს მაღალი რანგის წარმომადგენლების მიერ იყო მხარდაჭერილი, ამას საპარლამენტო უმრავლესობის წევრის, დიმიტრი სამხარაძის საჯარო ფეისბუკ-პოსტიც მოწმობს, რომელიც დეპუტატმა 2024 წლის 31 მაისს დაწერა, აღნიშნულია საიას ანგარიშში. [“ქართული ოცნების” დეპუტატმა სამხარაძემ 31 მაისს ფეისბუქზე დადო ვიდეო, სადაც ჩანს, როგორ ესვრიან კვერცხებს იმ შენობებს, სადაც ბრიტანეთის საკონსულოს სავიზო ცენტრი, ტვ BMG, პარტია ახალი და სხვა საერთაშორისო კომპანიების ოფისებია. სამხარაძემ ვიდეოს დააწერა, რომ ასეთი პასუხი გაეცა ხელისუფლების წევრების ბულინგს _JAMnews].