ერევანში იუსტიციის სამინისტროს შენობის ნაწილი ჩამოინგრა

ერევანში დღეს იუსტიციის სამინისტროს ერთ-ერთი შენობის სახურავი ნაწილობრივ ჩამოინგრა. შენობის ჩამონგრევის მომენტში იქ მუშები იმყოფებოდნენ. ერთი ადამიანი დაიღუპა, არიან დაჭრილები. ამის შესახებ შემთხვევის ადგილიდან სომხეთის იუსტიციის მინისტრი არტაკ ზეინალიანი იუწყებოდა:

„ერთ-ერთი ხელოსანი რეანიმაციაში იმყოფება. წინასწარი მონაცემებით, მას ქალა-ტვინის ტრავმა აქვს. მეორეს უბრალო ნაკაწრები ჰქონდა და ის უკვე გაწერეს“.

მინისტრმა ასევე განაცხადა, რომ ახლა სისხლის სამართლის საქმის აღსაძვრელად მასალები მზადდება.

 „შენობაში სამშენებლო სამუშაოები მიმდინარეობდა. გარემოებებს შეისწავლიან, და თუ დამნაშავეები არსებობენ, ისინი პასუხს აგებენ“.