მოსაზრება: ვინ ებრძვის ერთმანეთს სამხრეთ კავკასიაში - აზერბაიჯანი და სომხეთი თუ პუტინი და ერდოღანი?
რუსეთისა და თურქეთის მძიმე ეკონომიკური მდგომარეობა და რეგიონში ლიდერობისთვის დიდი ხნის მეტოქეობა, ამ ქვეყნებს მკვეთრი საგარეოპოლიტიკური ქმედებებისკენ უბიძგებს.
რუსული ნავთობი და გაზი არავის სჭირდება: რა საფრთხეს უქმნის ეს მეზობლებს?
2020 წლის 8 თვის განმავლობაში, რუსული გაზისა და ნავთობის ექსპორტი 2019 წლის ანალოგიურ პერიოდთან შედარებით, შესაბამისად, 40 და 23 პროცენტით შემცირდა.
ნახშირწყალბადის ნედლეულის საზღვარგარეთ გაყიდვა – რუსეთის ბიუჯეტის საფუძველთა საფუძველია. მისი შემოსავლების, დაახლოებით, 60 პროცენტი ნავთობისა და გაზის გაყიდვიდან შედგება.
•. ერდოღანი დასავლეთის წინააღმდეგ: “ისინი პრობლემას ვერ წყვეტენ”
• თურქეთი და რუსეთი ომის პირას? სირიაში რუსეთის ავიაიერიშის შედეგად 33 თურქი სამხედრო დაიღუპა
2020 წელს, რუსულმა ნავთობმა და გაზმა დაკარგა, როგორც ევროპული ბაზარი, სადაც მას საუდის არაბეთი და აშშ ავიწროებენ, ასევე, ძალიან მნიშვნელოვანი თურქული ბაზარი. იქ მას კონკურენციას არაბეთის გაერთიანებული საემიროები და აზერბაიჯანი უწევენ.
შედეგად, რუსეთიდან თურქეთში მიმავალი გაზსადენი, დაგეგმილის მესამედი სიმძლავრით მუშაობს.
უკანასკნელი ინფორმაცია – თურქეთის უმსხვილესმა ნავთობგადამამუშავებელმა საწარმომ უარი თქვა რუსული ნავთობის შესყიდვაზე. ამ საწარმოს მფლობელი აზერბაიჯანის ნავთობისა და გაზის სახელმწიფო კომპანია SOCAR-ია.
სხვა ფაქტორებთან ერთად – პირველ რიგში, ყირიმის ანექსიის გამო უკვე დაწესებული და მომავალში, მალაიზიური „ბოინგის“ ჩამოგდებისა და ნავალნის მოწამვლისთვის დასაკისრებელი სანქციების გამო – ნავთობისა და გაზის შემოსავლების ვარდნა, რუსულ ეკონომიკას კატასტროფულ მდგომარეობაში აყენებს.
პუტინი და ერდოღანი: დიდი ხნის მეტოქეობა
რუსეთისა და თურქეთის პრეზიდენტები უკვე რამდენიმე წელია რეგიონში გავლენისთვის იბრძვიან, რომელიც თავის თავში მოიცავს ახლო აღმოსავლეთსა და სამხრეთ კავკასიას.
რამდენჯერმე საქმე პირდაპირ შეტაკებებამდე მივიდა. სირია-თურქეთის საზღვრის მიმდებარე ტერიტორიაზე, თურქეთის სამხედრო საჰაერო ძალებმა რუსული ბომბდამშენი ჩამოაგდეს. დაქირავებული რუსი მებრძოლები და თურქი ჯარისკაცები მონაწილეობენ ლიბანში მიმდინარე ბრძოლებში, სადაც ისინი დაპირისპირებული ბანაკების მხარეს იბრძვიან.
აპოთეოზი იყო სტამბოლში, თურქეთში რუსეთის ელჩის მკვლელობა.
რუსეთის ეკონომიკური მაჩვენებლების გაუარესებამ და სირთულეებმა, რომელსაც კორონავირუსის პანდემიის გამო ასევე განიცდის თურქეთის ეკონომიკა, მხოლოდ გაამწვავა დიდი ხნის პაექრობა.
გაზის მილსადენის უთანხმოება
ნაკლებად სავარაუდოა, რომ 2020 წლის სექტემბერში, აზერბაიჯანსა და სომხეთს შორის მიმდინარე საბრძოლო მოქმედებები უნდა განვიხილოთ ცალკე, ნაკლებად მასშტაბური, მაგრამ არსით იგივე, ამა წლის ივლისის მოვლენებისგან.
მაშინ ბევრმა გაამახვილა ყურადღება იმაზე, რომ სომეხმა სამხედროებმა მკვეთრი ქმედებები განახორციელეს რაიონში, რომელიც დაშორებულია ტრადიციულ „ცხელ წერტილებს“. თუმცა, ეს რაიონი მაქსიმალურად ახლოს არის გაზსადენთან, რომელიც აზერბაიჯანსა და თურქეთს აერთიანებს.
როგორც ჩანს, ორი თვის შემდეგ, რეჯეფ თაიფ ერდოღანი ვლადიმირ პუტინს ატყობინებს, რომ მისი გზავნილი გაგებულია და ეს არის პასუხი.
საფასური, რომელსაც ამ ორი ავტორიტარული ლიდერის პაექრობისთვის იხდის სომეხი და აზერბაიჯანელი ხალხი, მხედველობაში არ მიიღება.
