სომეხი და აზერბაიჯანელი ექსპერტები ეჭვქვეშ აყენებენ დანაკარგების შესახებ ოფიციალურ რიცხვებს
ყარაბაღის კონფლიქტის მხარეები, ისევე, როგორც ნებისმიერ სხვა ომში, ამცირებენ საკუთარი დანაკარგებს და აზვიადებენ მტრის გარდაცვლილებისა და დაჭრილების რაოდენობას. ამასთან, ომი ახლა აქტიურ ფაზაშია, აქედან გამომდინარე, საბრძოლო დანაკარგების შესახებ ზუსტი ინფორმაციის გაცემა არასწორია. ამის შესახებ საუბრობენ სომეხი და აზერბაიჯანელი სამხედრო ექსპერტები, რომელთა მოსაზრებებსაც გამოცემა „კავკაზსკი უზელი“ გვთავაზობს.
კონფლიქტის მხარეები შეგნებულად ამახინჯებენ საკუთარი დანაკარგების შესახებ მონაცემებს, ცდილობენ არ დააგდონ საკუთარი არმიის საბრძოლო სული და ხალხის პატრიოტული სულისკვეთება, ამასთან, აზვიადებენ მოწინააღმდეგის დანაკარგებს, ცდილობენ მისი არმიის რიგებში გაურკვევლობის დათესვას და მისადმი ხალხის რწმენისთვის ძირის გამოთხრას, მიაჩნია სამხედრო ანალიტიკოსს, აზერბაიჯანის თავდაცვის სამინისტროს საინფორმაციო-ანალიტიკური სამმართველოს ყოფილ თანამშრომელს, აზად ისაზადეს.
მისი თქმით, აზერბაიჯანი პირველად არ აქვეყნებს მონაცემებს საბრძოლო დანაკარგების შესახებ, მაშინ, როდესაც 1992-1994 წლებისა და 2016 წლის აპრილის საბრძოლო მოქმედებებისას, აზერბაიჯანის არმია ამ ინფორმაციას ასაჯაროებდა.
„ამჯერად, როგორც ჩანს, გადაწყვიტეს, რომ არ გაავრცელონ ინფორმაცია საბრძოლო მოქმედებების დასრულებამდე. საერთაშორისო პრაქტიკაში ასეთი შემთხვევები ყოფილა. რა თქმა უნდა, მსხვერპლი არის. მოდის ცნობები ბაქოსა და სხვა რაიონებში გარდაცვლილთა დაკრძალვის შესახებ. არიან დაჭრილები და ცოტა ხნის წინ, ილჰამ ალიევმა ისინი საავადმყოფოში მოინახულა“ – განუცხადა „კავკაზსკი უზელს“ ისაზადემ.
მას სავარაუდო დანაკარგების შეფასებაც უჭირს, მაგრამ აღნიშნავს, რომ ორივე მხარეს ზუსტი ინფორმაცია აქვს საკუთარი მსხვერპლის შესახებ.
თუმცა, რაც შეეხება მოწინააღმდეგის დანაკარგებს, მათი სავარაუდო შეფასება ხდება, მით უფრო თანამედროვე ომებში, როდესაც ბრძოლები ხშირად დისტანციურად მიმდინარეობს.
მისი აზრით, დამოუკიდებელ დამკვირვებლებსაც ასევე დაახლოებით შეუძლიათ შეაფასონ მხარეთა დანაკარგები მათივე მონაცემებსა და კიდევ, სხვადასხვა ირიბ მტკიცებულებებზე დაყრდნობით, მაგალითად, განადგურებული საბრძოლო ერთეულის ან ჯავშანტექნიკის ეკიპაჟით.
არასამთავრობო ორგანიზაციის, „სამხედრო იურისტის“ ხელმძღვანელი ტელმან აბილოვიც ასევე მიიჩნევს, რომ მხარეები აზვიადებენ მოწინააღმდეგის დანაკარგებს და ამცირებენ საკუთარს. კერძოდ, ის აღნიშნავს, რომ სომხური მხარე ზედმეტად აზვიადებს აზერბაიჯანის დანაკარგებს.
„ისინი აზერბაიჯანის მხარეს ლამის 1300 მოკლულზე საუბრობენ, მაგრამ სანდო მტკიცებულებებს არ წარმოადგენენ. აზერბაიჯანის თავდაცვის სამინისტრო თავის Telegram-არხზე პირიქით, ყოველდღიურად აჩვენებს მოწინააღმდეგის სამეთაურო პუნქტების, ავტომობილების კოლონების, ჯავშანტექნიკის, იარაღის საწყობებისა და სხვა ობიექტების განადგურების ვიდეოჩანაწერებს. მაგრამ კადრებში ხვდება უშუალოდ პირადი შემადგენლობის განადგურების ფაქტებიც“, – განაცხადა აბილოვმა.
ომი ახლა აქტიურ ფაზაშია და საბრძოლო დანაკარგების შესახებ ზუსტი ინფორმაციის გაცემა არასწორია, მიაჩნია სომხური სამხედრო ახალი ამბების სააგენტოს, Razm.info-ს სამხედრო ექსპერტ, რობერ ნაზარიანს.
კონფლიქტის ზონაში უცხოელი ჟურნალისტებისა და დამკვირვებლების ყოფნა, ნაწილობრივ საშუალებას მოგვცემს მივიღოთ იმის ნამდვილი შეფასება, რაც ხდება, მიაჩნია მას.
აზარიანის აზრით, მთიანი ყარაბაღის თავდაცვის სამინისტროს მონაცემები აზერბაიჯანის არმიის დანაკარგების შესახებ რეალისტურია, თუმცა, მცირე უზუსტობა შეიძლება იყოს.
„სასტიკი ბრძოლების მეექვსე დღეს, იმის გათვალისწინებით, რომ სწორედ აზერბაიჯანმა დაიწყო შეტევა, ბუნებრივია, რომ მისი საბრძოლო დანაკარგები, რამდენჯერმე დიდი იქნება, ვიდრე არცახის თავდაცვის არმიის“, – ვარაუდობს სამხედრო ექსპერტი.
მან გამოგონილი უწოდა აზერბაიჯანის ცნობას მთიანი ყარაბაღის თავდაცვის არმიის მთელი ქვედანაყოფის განადგურების შესახებ.
