სახელმწიფო ინსულტისა და ტრავმების შემდგომ რეაბილიტაციას დააფინანსებს. წამლის ფასებზე ზედა ზღვარი წესდება

წამლებზე ზედა ზღვარი წესდება

საქართველოს მთავრობის გადაწყვეტილებით, ინსულტის შემდგომი რეაბილიტაცია, ასევე თავისა და ზურგის ტვინის ტრავმული დაზიანების შედეგად განვითარებული მდგომარეობის რეაბილიტაცია, ბიუჯეტიდან დაფინანსდება. ამის შესახებ ჯანდაცვის მინისტრმა, ზურაბ აზარაშვილმა განაცხადა. შესაბამისი ცვლილება ჯანდაცვის საყოველთაო პროგრამაში შევა და ბიუჯეტიდან წლიურად 11 მლნ ლარი დაიხარჯება

ასევე, მინისტრის თქმით, წამლებზე რეფერენტული ფასების, ანუ სახელმწიფოს მიერ განსაზღვრული მაქსიმალური ფასის დარღვევის შემთხვევაში, სანქციები მკაცრი იქნება – პირველ ეტაპზე დამრღვევს გაფრთხილებენ, ხოლო მეორე ეტაპზე ჯარიმა დაეკისრება. 

ინსულტისა და ტრავმების შემდგომი რეაბილიტაცია

ჯანდაცვის მინისტრის, ზურაბ აზარაშვილის განცხადებით, ქვეყანაში წლის განმავლობაში ასეთი დაახლოებით 6 000 შემთხვევა და იმ კლინიკებში, სადაც მოქალაქეები რეაბილიტაციას ჩაიტარებენ, მკურნალობას კი მთლიანად სახელმწიფო დააფინანსებს.

“ასევე მნიშვნელოვანია აღინიშნოს, რომ ვმუშაობთ, ინსულტის შემდგომი რეაბილიტაციის პრევენციაზე, როცა ინსულტის შემთხვევაზე სასწრაფო დახმარების ბრიგადები რეაგირებას მაქსიმალურად სწრაფად მოახდენენ და პაციენტებს ჩვენების მიხედვით იმ კონკრეტულ კლინიკებში მიიყვანენ, სადაც მათ ოპერატიულად დაეხმარებიან“, – განაცხადა ზურაბ აზარაშვილმა.

მთავრობის ინფორმაციით, პროგრამა რეაბილიტაციის სრულ კურსს მოიცავს.

წამლის ფასები

საქართველოს მთავრობის გადაწყვეტილებით, იანვრიდან რეფერენტული ფასები ქრონიკული და ონკოლოგიური დაავადებების სამკურნალო მედიკამენტებს შეეხება, მეორე კვარტლიდან ნებისმიერ სხვა სარეცეპტო მედიკამენტს, ხოლო წლის ბოლომდე ყველაზე გავრცელდება.

ჯანდაცვის მინისტრის განმარტებით, პირველ ეტაპზე სახელმწიფოს დადგენილი ფასების დამრღვევს გაფრთხილებენ, ხოლო მეორე ეტაპზე ჯარიმა დაეკისრება. 

“რაც შეეხება აღსრულებას, კანონში შეგვაქვს გამკაცრებაც, რომლებიც დამრღვევების სანქციებს შეეხება. სანქციები პირველ შემთხვევაზე გაფრთხილებას გულისხმობს, ხოლო განმეორების შემთხვევაში 5 000 ლარიდან 45 000 ლარამდე დაჯარიმებას, როგორც საცალო ქსელში აფთიაქების, ასევე დისტრიბუტორების და საბითუმოდ მოვაჭრეების. ისეთი რეგულაციაა, რომელიც ყველამ ზედმიწევნით უნდა დაიცვას, ამიტომ მნიშვნელოვანია მონიტორინგიც, რაც დაგეგმილი გვაქვს“,- აღნიშნა მინისტრმა.

როგორც აზარაშვილი ამბობს, ქვეყნების იდენტიფიცირება, რომელთა საფუძველზეც რეფერენტული ფასის განსაზღვრა მოხდება, ახლა მიმდინარეობს. შეირჩევა 4-5 ქვეყანა, რის შემდეგაც განისაზღვრება მაქსიმალური ზღვარი მედიკამენტების გასაყიდ ფასთან დაკავშირებით.

წამლებზე რეფერენტული ფასები 2023 წლიდან დაწესდება და სახელმწიფო ღირებულების იმ მაქსიმალურ ზღვარს დაადგენს, რომელზე ძვირადაც დაუშვებელი იქნება მედიკამენტის რეალიზაცია. მთავრობის წინასწარი გათვლებით, რეფერენტული ფასების დაწესება წამლებს საშუალოდ, 40%-ით გააიაფებს.

● “დედა თითქოს პატარა გოგო იყო, ასე გრძნობდა თავს”. როგორ ცხოვრობენ საქართველოში ადამიანები დემენციით
● თბილისში 5 აფთიაქის ხელმძღვანელი “სააფთიაქო ნარკომანიის” საქმეზე დააკავეს
● “ერთი გოგო მთელი დღე იდგა და ტიროდა” – კოვიდ-კლინიკაში მომუშავე ექიმების და ექთნების მონოლოგები

წამლის ფასების შესახებ საქართველოში უკვე დიდი ხანია საუბრობენ. წამლები საქართველოში რეგიონში ალბათ ერთ-ერთი ყველაზე ძვირია. ჯანდაცვის ყოფილი მინისტრი, ეკატერინე ტიკარაძე 2021 წლის ნოემბერში ამბობდა, რომ წამლის ფასი მოსახლეობისთვის დიდი ტვირთია და “ჯანდაცვის სამინისტრო პრობლემის აღმოსაფხვრელად აქტიურ რეჟიმში იწყებს მუშაობას.”

იმავე 2021 წელს კონკურენციის სააგენტომ გამოაქვეყნა ანგარიში, რომლის მიხედვით, მედიკამენტებზე მაღალი დანახარჯები მომხმარებლების ნაკლები ინფორმირებულობითაა განპირობებული, რადგან შედარებით იაფი გენერიკული ჩამნაცვლებელი მედიკამენტების არსებობის შესახებ მომხმარებლებს ინფორმაცია არ აქვთ. 

“გენერიკული მედიკამენტები” საერთაშორისო სახელწოდებით გამოშვებული წამლებია, რომელიც მოქმედების მექანიზმით არ განსხვავდება ფარმაცევტული ფირმების მიერ დაპატენტებული სხვადასხვა სახელწოდებით წარმოებული მედიკამენტებისგან. განსხვავება მხოლოდ ფასშია: “გენერიკული მედიკამენტები” უფრო იაფია და ამდენად, უფრო ხელმისაწვდომი ფართო საზოგადოებისთვის.

სააგენტომ 6 ჯგუფის მედიკამენტების ანალიზის შედეგად დაადგინა, რომ ბრენდირებული მედიკამენტების გენერიკებით ჩანაცვლების შემთხვევაში, პაციენტი 2016-2020 წლებში საშუალოდ 16 მილიონ ლარს დაზოგავდა.