ყველა სიახლე: როგორ მიმდინარეობს ვადამდელი საპარლამენტო არჩევნები სომხეთში

სომხეთის პრემიერ-მინისტრობის მოვალეობის შემსრულებლის, ნიკოლ ფაშინიანის პარტია „სამოქალაქო ხელშეკრულებამ“ რიგგარეშე საპარლამენტო არჩევნებში გაიმარჯვა, – ასეთია სომხეთის ცენტრალური საარჩევნო კომისიის მონაცემები, რომელმაც განაცხადა, რომ ხმების 100% დათვალა.

ფაშინიანის პარტიამ, „სამოქალაქო ხელშეკრულებამ“ ხმების 53.92% დააგროვა, ყოფილი პრეზიდენტის, რობერტ კოჩარიანის საარჩევნო ბლოკმა „სომხეთმა“ – 21.04%, ექსპრეზიდენტ სერჟ სარგსიანის ბლოკმა, „მაქვს პატივი“ – 5.23%.

ცენტრალურმა საარჩევნო კომისიამ 80 საარჩევნო უბნიდან კენჭისყრის წინასწარი მონაცემები წარმოადგინა. პარტია „სამოქალაქო ხელშეკრულებას“, რომელსაც ნიკოლ ფაშინიანი უდგას სათავეში, ჯერჯერობით 6 107 ხმა აქვს ანუ 58.04%.

ბლოკს „მაქვს პატივი“, რომელშიც ექსპრეზიდენტ სერჟ სარგსიანის „რესპუბლიკური პარტია“ და სომხეთის ეროვნული უსაფრთხოების სამსახურის ყოფილი ხელმძღვანელის, არტურ ვანეციანის პარტია „სამშობლო“ გაერთიანდნენ, 596 ხმა აქვს – 5.66%.

პარტია „აყვავებულ სომხეთს“, რომელსაც სათავეში უდგას სომხეთის ერთ-ერთი ყველაზე მდიდარი ადამიანი, გაგიკ ცარუკიანი, 538 ხმა აქვს მიღებული ანუ 5.11%. ბლოკ „სომხეთს“, ექსპრეზიდენტ რობერტ კოჩარიანის ხელმძღვანელობით, 2 316 ხმა აქვს, რაც 22.01%-ს შეადგენს. ხმების დათვლის პროცესი გრძელდება.

17:00 საათისთვის, არჩევნებზე ხმის მისაცემად ამომრჩეველთა მხოლოდ 38.17% მივიდა შედარებისთვის, წინა საპარლამენტო არჩევნებზე, 2018 წელს, 17:00 საათისთვის, ხმა ცოტათი უფრო მეტმა ამომრჩეველმა მისცა – 39.54%.

ერევანში, აქტივობამ საერთო ამომრჩეველთა რიცხვის 40.15% შეადგინა. დედაქალაქის ფარგლებს გარეთ, ყველაზე მაღალი აქტივობა სიუნიქში დაფიქსირდა – 46.83%. ეს აზერბაიჯანის მოსაზღვრე რაიონია, სადაც ბოლო თვეებში ვითარება გართულდა საზღვრის დელიმიტაცია/დემარკაციის გამო.

ყველაზე დაბალი აქტივობა შირაქშია – 32.27%.

პოლიტიკურ პარტიებს ეროვნულ კრებაში შესასვლელად, 5%-იანი ბარიერის გადალახვა ესაჭიროებათ. ბლოკებისთვის 7%-იანი ზღვარია დაწესებული.

ოპოზიციურმა ალიანსმა „მაქვს პატივი“ განაცხადა, რომ უკანასკნელი 48 საათის განმავლობაში, „დროებითი ხელისუფლება დაკავებული იყო წამყვანი პოლიტიკური ძალების სამარცხვინო დევნით“, კონკრეტულად კი კანდიდატებისა და ამ ბლოკის მხარდამჭერების.

მასში შედიან რესპუბლიკური პარტია, რომელიც მესამე პრეზიდენტ სერჟ სარგსიანთან არის ასოცირებული და პარტია „სამშობლო“, რომელსაც ეროვნული უსაფრთხოების საბჭოს ყოფილი ხელმძღვანელი, არტურ ვანეციანი უდგას სათავეში. ისინი მოუწოდებენ დამკვირვებლებს, ყურადღება მიაქციონ ჩხრეკებსა და დაკავებებს, ასევე, „ადგილობრივი ოფიციალური პირების მხრიდან მითითებებისა და ზეწოლის ფაქტებს“.

არჩევნების დღეს, სამი საათის მონაცემებით, ქვეყნის სხვადასხვა ნაწილში, ინციდენტების მთელი სერია დაფიქსირდა:

არარატის პროვინციის სოფელ აზათაშენის საარჩევნო უბანზე, სროლის ხმა გაისმა. დაპირისპირება პარტიების „აყვავებული სომხეთისა“ და „ვერელკის“ წარმომადგენლებს შორის მოხდა (ორივე ოპოზიციური პარტიაა), ინციდენტის ერთ-ერთმა მონაწილემ გაზის იარაღიდან, რამდენჯერმე გაისროლა. მიმდინარეობს გამოძიება.

სომხეთის ექსპრეზიდენტმა, ოპოზიციური ბლოკის „აიასტანის“ ლიდერმა რობერტ კოჩარიანმა განაცხადა, რომ ერევნის ქუჩებში მიმოფანტეს მისი საწინააღმდეგო ბუკლეტები, წარწერით, „სომხების მკვლელი“. მან ამას კანონის უხეში დარღვევა უწოდა და განაცხადა, რომ ეს „ხელისუფლებამ გააკეთა ან მათი მითითებით განხორციელდა. თუკი სამართალდამცავი ორგანოები უახლოესი საათების განმავლობაში არ გამოავლენენ დამნაშავეებს, გამოვალთ განცხადებით, რომ ეს ხელისუფლებამ გააკეთა“.

არჩევნების დროს დარღვევების შესახებ 339 საჩივარი დაფიქსირდა, მათ დიდ ნაწილში საუბარია ქრთამის მიცემაზე. სისხლის სამართლის საქმე 26 შემთხვევაზე აღიძრა, 14 პირს წარუდგინეს ბრალი. 7 მოქალაქეს ეჭვმიტანილის სტატუსი აქვს. 6 პიროვნება კი დააპატიმრეს.

ადგილობრივ მედიაში დარღვევების შესახებ 123 შეტყობინება გამოქვეყნდა. 124 შეტყობინება წამოვიდა ქვეყნის მცხოვრებლებისგან, მათ შორის, პროკურატურის „ცხელი ხაზის“ საშუალებით ორი დარღვევის შესახებ განაცხადა სომხეთის ადამიანის უფლებათა დამცველმა. 65 დარღვევის შესახებ გაავრცელეს ინფორმაცია სოციალური ქსელების მომხმარებლებმა. 57 – ოპერატიული მონაცემი მიღებულია პოლიციისგან.

სომხეთში გრძელდება ცხარე დისკუსია იმის შესახებ, თუ ვინ და რატომ ესროლა პრემიერ-მინისტრობის ოპოზიციონერი კანდიდატის, ბლოკ „დემოკრატთა ალიანსი – შირინიანი-ბაბაჯანიანის“ ერთ-ერთი ლიდერის, არმან ბაბაჯანიანის ავტომობილს. ბაბაჯანიანმა მსროლელს „მკვლელი და ქურდი“ უწოდა, მაგრამ ჯერჯერობით კონკრეტულად არავინ დაუსახელებია.

მისი ვერსია ასე ჟღერს: „გუშინ, უცხოეთიდან იყო ზარი, გაგვაფრთხილეს, რომ სომხეთში შეიქმნა შეიარაღებული ჯგუფი, რომლის სამიზნეც ბლოკი „შირინიანი-ბაბაჯანიანის“ პირველი სამეულია. გამორიცხული არ არის, რომ გამაფრთხილებელი გასროლა ყოფილიყო. ჩვენ ძლიერები ვართ, ჩვენი ნების გატეხვა შეუძლებელია, გავაგრძელებთ მუშაობას, მოქალაქეებს არჩევნებში მონაწილეობისკენ მოვუწოდებთ“.