ვინ ვის სცემს პატივს აფხაზეთში

პარტიამ „ერთიანი აფხაზეთი“, რომელიც მმართველი კოლიციის საყრდენად ითვლება, საკუთარი გზით სვლა გადაწყვიტა და საზოგადოებრივი მოძრაობებისა და პოლიტიკური პარტიების საკოორდინაციო საბჭოდან გასვლის შესახებ განაცხადა.

‘საკოორდინაციო საბჭოს მიერ ქვეყნის მოსახლეობისათვის გაცხადებული პრიორიტეტები დავიწყებას მიეცა. აღმასრულებელი ხელისუფლება აქტიური მოღვაწეობისა და ქმედების იმიტირებას ეწევა. საკონსტიტუციო რეფორმა (ისევე, როგორც ხელისუფლების სახელმწიფო ორგანოებთან დაკავშირებული ცვლილებების გეგმის შესრულება) ჭიანურდება. აღმასრულებელი ხელისუფლების საქმიანობა სულ უფრო მეტად სცილდება საზოგადოების მოთხოვნებს’, _ ეს იმ გარემოებათა ჩამონათვალია, რაც მედიისათვის გაკეთებულ განცხადებაში „ერთიანი აფხაზეთის“ პოლიტიკურმა საბჭომ აღნიშნული გადაწყვეტილების მიღების მიზეზად დაასახელა.

ამ გადაწყვეტილებას შეიძლება პრეზიდენტ რაულ ხაჯიმბასთვის მიყენებული  დარტყმა ვუწოდოთ და კოალიციის დაშლის დასაწყისად აღვიქვათ; თითქოს „ერთიანი აფხაზეთი“ ხაჯიმბას პატივს აღარ სცემს და სამომავლოდ სხვა ფიგურას დაეყრდნობა. თუმცა, მე ასეთი ნაჩქარევი დასკვნებისგან თავს შევიკავებდი.

დღემდე, აფხაზების წარმოდგენა პოლიტიკაზე ერთგვარი „პორტრეტული დემოკრატიით“ ამოიწურებოდა. ეს ის მოდელია, როდესაც უმნიშვნელოა,თუ რას ამბობს პოლიტიკოსი, მთავარია, ვინ არის ის და რას წარმოადგენს.აქამდე ეს წესი პოლიტიკის განმსაზღვრელი იყო და ახლად შექმნილი კოალიციები არც კი ცდილობდნენ რაიმე განსაკუთრებული იდეოლოგიის ან კონკრეტული პროგრამის წარდგენას. პოლიტიკურ კოალიციას წარმატების მისაღწევად  მხოლოდ სერიოზული ამბიციების მქონე პოლიტიკური ფიგურის გარშემო შეკრება სჭირდებოდა. „მომხრეობის“, ან „მოწინააღმდეგეობის“ ნიშნით დამეგობრება ჩვეულებრივი ამბავი იყო.

ასე იყო ბაღაფშის პრეზიდენტობის დროს, როდესაც მას სრულიად განსხვავებული ორგანიზაციები უჭერდნენ მხარს _ პარტია „ამცახარა“, საზოგადოებრივ-პოლიტიკური მოძრაობა „აითაირა“ (რომლის ბირთვსაც ინტელიგენცია წარმოადგენდა), და ნომენკლატურული „ერთიანი აფხაზეთი“, რომელსაც დამოუკიდებელი პროფკავშირების ფედერაციაც შეუერთდა.

ასევე იყო ალექსანდრ ანქვაბის პრეზიდენტობის დროსაც, როდესაც ყველა მისი მოწინააღმდეგე „პოლიტიკური პარტიებისა და საზოგადოებრივი ორგანიზაციების საკოორდინაციო საბჭოში“ გაერთიანდა.

ასე ხდებოდა აფხაზეთის ახლანდელი მეთაურის მმართველობის პირობებშიც. ხაჯიმბას დღეს უპირისპირდება ერთმანეთისგან სრულიად განსხვავებული ოპოზიციური ძალებისგან შემდგარი ბლოკი, რომელსაც,როგორც ჩანს, ერთადერთი რამ აერთიანებს _  ხაჯიმბას მიმართ ანტიპათია.

თუმცა, როგორც ჩანს, ბოლო თხუთმეტი წლის განმავლობაში ჩამოყალიბებული ეს ტრადიცია სერიოზულ გამოწვევებს ვეღარ უძლებს და თანდათან ირღვევა.

ეს ყველაფერი, პირველ რიგში, ნავთობის მოპოვებას და რუსების მიერ უძრავი ქონების შეძენაზე დაწესებული ემბარგოს მოხსნას უკავშირდება. ორივე ეს პუნქტი (რომელთა შესრულებასაც კატეგორიულად ითხოვს რუსეთი) სერიოზული უთანხმოების საგანია როგორც მმართველ კოალიციაში, ისე ოპოზიციურ ბლოკში. დაპირისპიების ესკალაცია კი მას შემდეგ დაიწყება, როდესაც ხელისუფლება აღნიშნული პრობლემების გადაწყვეტის აუცილებლობის წინაშე დადგება (ეს კი ძალიან მალე მოხდება). მომავალ წელს აფხაზეთი არჩევნების შერეულ სისტემაზე გადავა, რაც პარტიების მნიშვნელობას ერთიორად გაზრდის, და მხოლოდ ‘პორტრეტული’ სიმპათია–ანტიპათიის ნიშნით დაჯგუფების შექმნა თამაშში დასარჩენად საკმარისი აღარ იქნება.

იდეებისა და პრინციპების შეჯიბრი გარდაუვალია. ამას უკვე გრძნობს „ერთიანი აფხაზეთი“, რომელიც შექმნის დღიდან ძალიან ზუსტად რეაგირებს პოლიტიკური ბაზრის კონიუნქტურაზე.

მოქმედი ხელისუფლების მიმართ გამოთქმული ბრალდება, რითაც პარტიამ კოალიციის დატოვების მიზეზები განმარტა, ერთგვარი შტამპია, რომელსაც გასულ წელს ოპოზიციური ძალების ბლოკიც აქტიურად იყენებდა.თუმცა აქ ერთი განმასხვავებელი ნიუანსია,რომელიც პირველად იქცა მოტივად _ იმავე ოპოზიციისგან განსხვავებით, „ერთიან აფხაზეთს“ პირადად რაულ ხაჯიმბას საწინააღმდეგო არაფერი აქვს. მათ ხაჯიმბას პოლიტიკა არ მოსწონთ.

• პარტია „ერთიანი აფხაზეთი“ , როგორც საზოგადოებრივ-პოლიტიკური მოძრაობა, 2004 წლის მარტში შეიქმნა და მისი ერთადერთი მიზანი იყო იმავე 2004 წელს დანიშნული საპრეზიდენტო არჩევნებზე ოპოზიციის ერთიანი კანდიდატის დასახელება. მაშინ განმეორებითი არჩევნების ჩატარება გახდა საჭირო და საბოლოოდ ხმათა უმრავლესობა ბაღაფშისა და ხაჯიმბას ტანდემმა მოიპოვა. შედეგად, ბაღაფში პრეზიდენტი გახდა, ხაჯიმბა კი ვიცეპრეზიდენტი. პოლიტიკურ პარტიად „ერთიანი აფხაზეთი“ 2009 წელს ჩამოყალიბდა.