როდესაც მხოლოდ ღარიბები დაიღუპებიან - ბრძოლა კორონვირუსის ვაქცინისთვის

დედამიწის მოსახლეობის დაახლოებით 14 პროცენტს აქვს ამ დროისთვის გარანტირებული უახლოეს მომავალში კორონავირუსზე ვაქცინაცია. ეს 14 პროცენტი მდიდარ ქვეყნებში ცხოვრობს. დანარჩენებმა, შეიძლება, ვაქცინა 2024 წლამდე ვერ მიიღონ. 

ასეთი განცხადებით გამოვიდა ბილ და მელინდა გეითსების საქველმოქმედო ფონდის ხელმძღვანელი, მარკ სუზმანი. ამავდროულად, მან აღნიშნა, რომ ამიერიდან ფონდი კიდევ უფრო აქტიურად ჩაერთვება სიცოცხლისა და ჯანმრთელობის თანაბარი უფლებებისთვის ბრძოლაში.

მდიდარმა ქვეყნებმა უკვე დაირეზერვეს იმ ვაქცინის დოზის 53 პროცენტი, რომელიც უახლოეს პერიოდში გამოვა.

მაგალითად, მხოლოდ კანადამ ისეთი რაოდენობის ვაქცინის მიწოდებაზე გააფორმა კონტრაქტი, რომელიც საკმარისი იქნება მისი მთელი მოსახლეობის რამდენჯერმე ვაქცინაციისთვის.

კორონავირუსზე ვაქცინაცია უკვე დაიწყო დიდ ბრიტანეთში. ერთ-ერთი პრეპარატი – Pfizer/BioNTech – უკვე დაამტკიცა აშშ-მ. მოსალოდნელია, რომ ვაქცინაცია იქ 14 დეკემბერს დაიწყება. 16 დეკემბრისთვის, დაახლოებით ვაქცინის 3 მილიონი დოზა უკვე მიწოდებული ექნება მთელი ქვეყნის მასშტაბით გამანაწილებელ 150 ცენტრს.

მაგრამ ჯანდაცვის მსოფლიო ორგანიზაცია შიშობს, რომ შედეგად, ღარიბი ქვეყნები ვერ მიიღებენ ვაქცინას 2021 წელს და ზოგიერთების განკარგულებაში ის 2024 წელზე ადრე ვერ აღმოჩნდება.

ეს ნიშნავს, რომ ვაქცინაციის გარეშე დარჩება მათი 90 პროცენტი, ვისაც ეს ესაჭიროება

ჯანდაცვის მსოფლიო ორგანიზაციის გამოთვლით, ვაქცინის თანაბრად ხელმისაწვდომობის პრობლემის გადასაწყვეტად, ხუთ მილიარდ დოლარზე მეტია საჭირო, ამის შესახებ The Guardian-ი წერს.

ბილ და მელინდა გეითსების საქველმოქმედო ფონდმა დეკემბრის დასაწყისში ამისათვის 2 მილიარდი დოლარი გამოყო. ამ თანხამ ორი ამოცანა უნდა გადაჭრას:

● მოაგვაროს ღარიბ ქვეყნებში უკვე არსებული ვაქცინის წარმოება.

● დააჩქაროს შემდეგი თაობის ვაქცინის შემუშავება, რომელსაც არ დასჭირდება ღარიბი ქვეყნებისთვის მიუწვდომელი ტრანსპორტირებისა და შენახვისათვის საჭირო ძვირადღირებული გაყინვის საშუალება.

ეპიდემიოლოგიური ვითარება მსოფლიოში

მთელ მსოფლიოში, ყველგან მკვეთრად უარესდება ეპიდემიოლოგიური ვითარება.

გერმანია 16 დეკემბრიდან მკაცრ ლოკდაუნს აწესებს – დაიხურება ყველაფერი, სასურსათო მაღაზიებისა და აფთიაქების გარდა.

15 დეკემბრიდან, საფრანგეთში კომენდანტის საათი ცხადდება – 20:00-დან 06:00 საათამდე.

შვეიცარიაში საგანგებო მდგომარეობა გამოაცხადეს – რეანიმაციები გადავსებულია, საავადმყოფოები ვერ უმკლავდებიან კორონავირუსიანი პაციენტების ნაკადს.

სახიფათო სიტუაცია იქმნება შვედეთში, რომელიც ამ დრომდე მისდევდა კორონავირუსთან ბრძოლის საკუთარ მოდელს და ფაქტობრივად არ იყენებდა შეზღუდვებს. საავადმყოფოებში COVID-19-ის მქონე პაციენტების რიცხვმა ისეთ რაოდენობას მიაღწია, რომ ძალიან დიდი დატვირთვის გამო, მასობრივად დაიწყეს სამსახურის დატოვება ექიმებმა და სამედიცინო სფეროს წარმომადგენლებმა. „საშინელი“ ვითარებაა, განუცხადა Bloomberg-ს შვედეთის სამედიცინო სფეროს მუშაკთა ასოციაციის ხელმძღვანელმა, სინევა რიბეირომ.

აშშ-ში კორონავირუსით უკვე 306 ათასზე მეტი ადამიანი გარდაიცვალა – ეს უფრო მეტია, ვიდრე მეორე მსოფლიო ომში დაღუპული ამერიკელი ჯარისკაცების რაოდენობა.

14 დეკემბრისთვის, მსოფლიოში კორონავირუსით დაინფიცირდა 72 მილიონ 692 ათასზე მეტი ადამიანი. მათგან, თითქმის 1 მილიონ 620 ათასი გარდაიცვალა.

ინფიცირებულთა რაოდენობით ქვეყნების პირველი ათეული:

• აშშ — 16 737 267
• ინდოეთი — 9 884 716
• ბრაზილია — 6 901 990
• რუსეთი — 2 681 256
• საფრანგეთი — 2 376 852
• დიდი ბრიტანეთი — 1 849 403
• იტალია — 1 843 712
• თურქეთი — 1 836 728
• ესპანეთი — 1 741 439
• არგენტინა — 1 498 160

სომხეთი, საქართველო, აზერბაიჯანი

მილიონ მოსახლეზე ინფიცირებულთა რაოდენობა:

• სომხეთი მსოფლიოში მე-11 ადგილზეა (148 682 ინფიცირებული, 2 503 გარდაცვლილი);
• საქართველო მე-12 ადგილზეა (191 063 ინფიცირებული, 1 839 გარდაცვლილი);
• აზერბაიჯანი 68-ე ადგილზეა (175 874 ინფიცირებული, 1 922 გარდაცვლილი).